«كوكتەم» تۇرعىن ءۇي كەشەنى تۇرعىندارى ءۇش اي بويى ءليفتى پايدالانا المادى. ونىڭ ۇستىنە, پاتەر يەلەرى مەن ليفتكە قىزمەت كورسەتەتىن ۇيىم اراسىندا كەلىسىمشارت جاسالماعانىنا كوپ جىل بولعان. جالپى, پيك-كە بايلانىستى وزگە دە قۇجاتتاردا شيكىلىكتەر بار ەكەن. تۇرعىندار تۇيتكىلدى ماسەلەنى شەشۋ ءۇشىن قالالىق ماسليحاتقا شاعىمداندى.
ك.كۇمىسبەكوۆ, 8 مەكەنجايىندا ورنالاسقان كوپ پاتەرلى ءۇي تۇرعىندارىمەن قالالىق ءماسليحات دەپۋتاتتارى سارسەنبەك ءجۇنىسوۆ پەن يرينا مانجانوۆا ءتيىستى ورگاندار وكىلدەرىمەن بارىپ, ورىن العان جاعدايمەن تانىستى.
تۇرعىنداردىڭ ايتۋىنشا, بۇل ۇيدە ليفتەر ءجيى ىستەن شىعادى. «ليفت بۇزىلعاندا ءبىز «كوكتەم» تك «تۇتىنۋشىلاردىڭ قۇقىعىن قورعاۋ قوعامى» ۇيىمىنا ارىزداندىق. جاۋاپتى كومپانيانىڭ ماماندارى تەكسەرۋ جۇرگىزىپ, جۇيەلىك تاقتانى اۋىستىرۋ كەرەكتىگى جونىندە شەشىم شىعاردى. جۇمىستى 3 ميلليون تەڭگەدەن استام سوماعا باعالادى. ءبىز ارزانىراق تۇسەتىن جۇمىستى ويلاپ, باسقا كومپانياعا ءوتىنىش تۇسىردىك. ول جەردە 1 ميلليون تەڭگەگە ارزان ىستەپ بەرەمىز دەدى. الايدا كەلىسىمشارت جاساۋ كەزىندە پيك-ءتىڭ قۇجاتتارى دۇرىس ەمەس بولىپ شىقتى. ليفتكە قىزمەت كورسەتەتىن كومپانيامەن كەلىسىمشارتتار بولمادى. سوندا ءبىز وسى ۋاقىتقا دەيىن ليفت قىزمەتىنە نە ءۇشىن قارجى تولەپ كەلگەنبىز؟» دەدى تۇرعىنداردىڭ ءبىرى.
سوعان قاراماستان, پاتەر يەلەرى ءوز كۇشىمەن ءليفتى جوندەۋدى شەشىپ, الدىن الا تولەم ءۇشىن قارجى جينادى. بىراق قىزمەتتى ۇسىنۋشىمەن كەلىسىمشارتقا وتىرۋ ءۇشىن پيك رەكۆيزيتتەرى كەرەك بولعان. مۇنى پيك باسشىسى ۇسىنا الماعان.
«ءبىز پيك باسشىسىنىڭ جۇمىسىنا ريزا بولعان ەدىك. ونى اۋىستىرۋ تۋرالى ويىمىز دا بولعان جوق. ول ءوز جۇمىسىن تاماشا اتقارادى, الايدا قۇجاتتار جاعىنان سالاق ەكەن. ءليفتى جوندەتۋ ءۇشىن قاجەت قۇجاتتاردى قالپىنا كەلتىرۋ جاعىنان كومەك سۇرايمىز. بالكىم, پيك باسشىسىنا ءىس جۇرگىزۋدەن كۋرس الۋ كەرەك شىعار؟ سوندا قۇجاتتارمەن وسىنداي تۇسىنىسپەۋشىلىك تۋمايدى دەپ ويلايمىز» دەدى تۇرعىندار.
پيك باسشىسى دەنساۋلىعىنا بايلانىستى بۇل كەزدەسۋگە قاتىسا الماعاندىقتان, ماسەلە شەشىلمەدى. سوندىقتان دەپۋتاتتار ارادا ەكى اپتاداي ۋاقىت وتكەن سوڭ, ونى تىڭداۋ ءۇشىن سول ورىنعا تاعى باردى.
بۇل ۋاقىتتان سوڭ ىستەن شىققان ليفت ماسەلەسى شەشىلگەنى انىقتالدى. كوتەرگىشتىڭ كۇردەلى جوندەۋى باستالدى. الايدا قۇجاتتار جاعىنان ءالى دە شەشىمىن كۇتەتىن ماسەلەلەر بار ەكەن. پيك باسشىسى جەرگىلىكتى اتقارۋشى ورگاندارى, ءماسليحات دەپۋتاتتارى جانە تۇرعىندار الدىندا اقتالۋعا تىرىستى. ۇزاققا سوزىلعان داۋلار, پىكىرتالاستار مەن ايىپتاۋلاردان كەيىن ءار توقسان سايىن تۇرعىندارعا قارجىلىق ەسەپتەر بەرىلەتىنى ايتىلدى. ال ليفتكە قىزمەت كورسەتەتىن ۇيىممەن كەلىسىمشارت جىل باسىندا جاسالعان. بۇل ۇيىم توعىز جىلدان بەرى قىزمەت كورسەتىپ كەلەدى ەكەن.
اۋىزبىرشىلىك بولماعان سوڭ, ءۇي تۇرعىندارى ءتيىستى قۇجاتتاردى ۋاقىتىندا الا المادى. ەندى ليفت شارۋاشىلىعىنا تاۋەلسىز ساراپتاما جاساي المايدى. اتالمىش ساراپتاما ليفتەردىڭ بۇزىلۋىن انىقتاپ بەرەر ەدى. ەگەر كوتەرگىشكە ءتيىستى دەڭگەيدە كوڭىل بولىنبەگەندىگى انىقتالسا, وندا قىزمەت كورسەتۋشى كومپانيا جوندەۋ شىعىندارىنىڭ ءبىر بولىگىن جابۋى ءتيىس ەدى. بىراق بۇگىندەرى تۇرعىندار باسقا ليفت كومپانياسىمەن كەلىسىمشارتقا وتىرىپ, ءوز كۇشىمەن جوندەتىپ جاتىر. كومپانياعا الدىن الا تولەم جاسالدى, قارجىنىڭ قالعانى «استانا بەو» تۇبىرتەكتەرى ارقىلى جاسالماق.
«تەحنيكالىق قىزمەت كورسەتۋ – بۇل ءليفتىڭ جاعدايىنا, ۇساق بولشەكتەردىڭ توزۋىنا تەحنيكالىق باقىلاۋ جاساۋ. بۇعان اعىمداعى جانە كۇردەلى جوندەۋ كىرمەيدى. باسقاسىنا پاتەر يەلەرى جاۋاپتى. ويتكەنى بۇل – ولاردىڭ ورتاق مۇلكى. تۇرعىندارعا جۇمىستار كەستەسى, ءتيىستى كارتا كورسەتىلۋى ءتيىس. ياعني ولار تەحنيكالىق قىزمەت كورسەتۋدىڭ تىزىمىنە كىرەتىن جۇمىستاردان حاباردار بولۋى كەرەك. تۇرعىندار اتقارىلعان جۇمىستىڭ ساپاسىن قاداعالاۋى قاجەت» دەگەن ي.مانجانوۆا ليفت جوندەلگەن سوڭ ءتيىستى كەلىسىمشارتقا وتىرىپ, قىزمەت كورسەتۋشى كومپانيا جۇمىسىن جۇيەلى تۇردە تەكسەرىپ وتىرۋدى ۇسىندى.
