استانادا وسى جىلدىڭ 1 جەلتوقسانىنان باستاپ «Seedstars» حالىقارالىق تەحنولوگيالىق ستارتاپ-ينكۋباتورى اشىلادى. ونىڭ ورتالىعى «Hilton Astana» قوناقۇيىندە ورنالاسقان.
مەملەكەت باسشىسىنىڭ «رۋحاني جاڭعىرۋ» باعدارلامالىق ماقالاسى مەن «استانا – يننوۆاتسيالار قالاسى» ستراتەگياسى قاعيدالارىن جۇزەگە اسىرۋ ماقساتىندا قالالىق ينۆەستيتسيالار جانە كاسىپكەرلىكتى دامىتۋ باسقارماسى مەن حالىقارالىق بيزنەس ينكۋباتورلارى «Seedstars» جانە «BI Property» جشس اراسىندا ارىپتەستىك تۋرالى مەموراندۋمعا قول قويىلدى.
كەلىسىم بويىنشا كومپانيالار سالعان ينۆەستيتسيانىڭ ارقاسىندا ەلوردادا ادام كاپيتالىن دامىتۋ ءۇشىن بىرەگەي الاڭ قۇرىلماق. وندا قالانىڭ ءاربىر تۇرعىنى جاڭا تەحنولوگيا سالاسىندا تاجىريبە الىپ, جەكە جوباسىن ىسكە اسىرۋىنا جاعداي جاسالادى, بۇعان قوسا جاستاردىڭ الەۋەتىن دامىتۋعا باسىمدىق بەرىلمەك.
– ۇلكەن مەگاپوليستەردىڭ تاجىريبەسىنە قاراپ-اق جاھاندىق قالالاردىڭ تەپە-تەڭ دامۋى كرەاتيۆى جوق يندۋسترياسىز مۇمكىن ەمەستىگىن بايقاۋعا بولادى. سول سەبەپتى ءبىز كرەاتيۆتى كلاستەردىڭ نەگىزىن قالىپتاستىراتىن قالالىق يننوۆاتسيالىق الاڭ قۇرماقپىز. مۇندا ەلوردانىڭ يننوۆاتسيالىق ەكوجۇيەسى قالىپتاسادى, – دەدى استانا قالاسىنىڭ اكىمى اسەت يسەكەشەۆ.
جوبا سەرىكتەستەرىنىڭ ءبىرى دەۆيد دەكومبەس ورتالىقتا الەم بويىنشا 70 مىڭنان استام ستارتاپەر, كاسىپكەر مەن ينۆەستورلار بارىن ءمالىم ەتتى. جوبا ىسكە اسقاننان كەيىن استانا بىرىڭعاي جەلىگە قوسىلىپ, تۇرعىنداردىڭ تاجىريبە الماسۋىنا جاعداي جاسالادى, سونداي-اق تەحنولوگيانىڭ دامۋىنا مۇمكىندىكتەر اشىلادى.
ال قاتىسۋشىلارعا قويىلاتىن باستى تالاپ – يننوۆاتسيالىق ءارى تەحنولوگيالىق ءونىم جاساۋ. جوبا الدىمەن استانادا, ءارى قاراي ەلىمىزدىڭ وزگە جەرلەرىندە ىسكە اسىرىلادى.
