استانا قالاسىنداعى №3 كوپسالالى قالالىق اۋرۋحانادا 500-گە جۋىق مەدبيكە جۇمىس ىستەيدى. ونىڭ 80-نەن استامى جوعارى مەديتسينالىق ءبىلىمى بار ماماندار, قازىرگى ۋاقىتتا تاعى 50 مامان وقۋىن جالعاستىرۋدا.
وپەراتسيالىق مەدبيكە – حيرۋرگتىڭ وڭ قولى. حيرۋرگپەن بىرگە ول وپەراتسيانىڭ بارىسىن باقىلايدى, نۇسقاۋلاردى ءسوزسىز تۇسىنەدى, وتىنىشتەردى بولجايدى. ولاردىڭ اۋرۋحاناداعى ءرولى ايرىقشا. بىراق وپەراتسيالىق مەدبيكەنىڭ جۇمىسى ۇنەمى كوزگە كورىنبەي, ەلەۋسىز قالادى. ناۋقاستار اق حالاتتى مەدبيكەنىڭ حيرۋرگيالىق توپتىڭ جۇمىسىنا قوسقان ۇلەسى قانشالىقتى ماڭىزدى ەكەنىن بىلە بەرمەيدى.
سونداي مىقتى مامانداردىڭ ءبىرى – ۇلبالا سارىمبەكقىزى ءاربىر جۇمىس كۇنىن تاڭعى ساعات 08:00-دە باستايدى. ءبىر ساتتە ول وپەراتسيالىق بلوكتان كۇلىمسىرەپ شىعىپ كەلە جاتادى. مۇنىڭ سەبەبى, ناۋقاسقا جاسالعان وتا ءساتتى ءوتتى دەگەن ءسوز. ونىڭ كەلەسى وتاعا دەيىن 20 مينۋتتىق دەمالاتىن ۋاقىتى بار. ودان ءارى تاعى ۇيرەنشىكتى ىسىنە كىرىسەدى.
ۇلبالا شۋتوگاەۆا – 23 جىلدىق ەڭبەك ءوتىلى بار مەدبيكە. ول ءوزى ىسىنە ۇقىپتى, ماماندىعىنا بەرىلگەن ادام, ءارى ومىردە جىگەرلى دە اقكوڭىل ايەل. اقمولا مەديتسينالىق كوللەدجىن «مەدبيكە ءىسى» ماماندىعى بويىنشا بىتىرگەن. 2022 جىلى رەسپۋبليكالىق مەديتسينا اكادەمياسىنىڭ ديپلومىن الدى. 2023 جىلى قازاق ۇلتتىق ۋنيۆەرسيتەتىن «دەنساۋلىق ساقتاۋ باكالاۆرى» دارەجەسىمەن ءبىتىردى. «بۇكىل حيرۋرگيالىق بريگادانىڭ ىشىندە ءبىرىنشى بولىپ وتا جاسايتىن بولمەگە مەدبيكە كىرەدى. ءبىز الداعى وپەراتسيانىڭ ۇڭعىل-شۇڭعىلىن الدىن الا ءبىلۋىمىز كەرەك. وتاعا قاجەتتى نارسەلەردىڭ ۇقىپتىلىقپەن دايىنداپ, رەتتەپ قويامىز. پروتسەدۋرا كەزىندە ءبىر سەكۋند تا كىدىرىس بولماۋى كەرەك. وتا جاساپ تۇرعان حيرۋرگ-دارىگەرگە قاجەتتى قۇرالدارىن جەدەل, ءۇنسىز بەرىپ, ءمىنسىز قىزمەت ەتۋگە ءتيىسپىز. وپەراتسيا بولمەسىنەن سوڭعى بولىپ شىعاتىن دا ءبىز: ول جەردى جينايمىز, قۇرالداردى زارارسىزداندىرۋعا جىبەرەمىز. بارلىعىن رەتكە كەلتىرىپ, كەلەسى وتاعا دايىندايمىز. بۇل – ءبىزدىڭ سۇيىكتى ءىسىمىز ءارى جاۋاپتى مىندەت. ادامنىڭ دەنساۋلىعى مەن ومىرىنە اراشا تۇسۋدەن ارتىق قانداي ماڭىزدى نارسە بار؟» دەيدى ۇلبالا سارىمبەكقىزى.
