جۇما كۇنى جۇمىسپەن قامتۋ ورتالىعىندا «جۇمىسپەن قامتۋ جانە حالىقتىڭ الەۋمەتتىك ءالسىز توپتارىن قولداۋ» باعىتى بويىنشا كوميسسيا مەن پارلامەنتتىك تىڭداۋلاردى دايىنداۋ جونىندەگى ارنايى ۋاقىتشا كوميسسيانىڭ بىرلەسكەن كوشپەلى وتىرىسى ءوتتى. وعان قر پارلامەنتى ءماجىلىسىنىڭ دەپۋتاتتارى, مەملەكەتتىك ورگانداردىڭ, كاسىپوداقتار مەن مەملەكەتتىك ەمەس ۇيىمداردىڭ وكىلدەرى قاتىستى.
وتىرىس بارىسىندا ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىن ىسكە اسىرۋدىڭ وتكەن جىلدىڭ قورىتىندىلارى تىڭدالىپ, مەملەكەت باسشىسى نۇرسۇلتان نازارباەۆتىڭ شاعىن نەسيەلەندىرۋدى كەڭەيتۋ تۋرالى ءتورتىنشى الەۋمەتتىك باستاماسى تالقىلاندى.
قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نۇرجان التاەۆتىڭ ايتۋىنشا, اتالمىش باعدارلاماعا بىلتىر 573 مىڭ ادام قاتىسقان. ولاردىڭ 403 مىڭى نەمەسە 70 پايىزى – جۇمىسسىز ادامدار. ال 149 مىڭ ادام (26%) – ءوزىن ءوزى جۇمىسپەن قامتىعاندار.
«جالپى بۇل باعدارلاما جۇمىسسىز ادامداردىڭ 90 پايىزىن جانە ناتيجەسىز جۇمىسپەن قامتىلعانداردىڭ 54 پايىزدان استامىن قامتىدى. باعدارلاما كاسىبي وقىتۋ, جاپپاي كاسىپكەرلىكتى دامىتۋ, حالىقتى جۇمىسپەن قامتۋ باعىتتارىندا جۇرگىزىلىپ, ەڭبەك رەسۋرستارىنىڭ ۇتقىرلىعى ەسەپكە الىنۋدا» دەدى ۆيتسە-مينيستر.
«دامۋ» كاسىپكەرلىكتى دامىتۋ قورى» اق باسقارما توراعاسى اباي سارقۇلوۆ اتالمىش ۇيىم شاعىن نەسيەلەندىرۋ ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى, «دامۋ-ميكرو», سونداي-اق, ايەلدەر كاسىپكەرلىگىنە شاعىن نەسيە بەرۋ باعدارلامالارى اياسىندا جانە ەۋروپالىق قايتا قۇرۋ جانە دامۋ بانكى قارجىسى ەسەبىنەن جۇرگىزىلىپ وتىرعانىن ايتتى.
استانا قالاسىنىڭ جۇمىسپەن قامتۋ ورتالىعىنىڭ ديرەكتورى ولجاس ومار «ەلەكتروندىق ەڭبەك بيرجاسى» پورتالىمەن تانىستىردى. وتىرىس قورىتىندىسىندا ورتالىق مەملەكەتتىك جانە جەرگىلىكتى اتقارۋشى ورگاندارعا, كاسىپوداقتارعا ءتيىستى ۇسىنىستار ايتىلدى.
امانعالي قالجانوۆ
