ەلورداداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنا ءجيى بارامىن. تەاتردا قويىلاتىن جاڭا قويىلىمداردان قالمايمىن دەسەم بولادى. عاجايىپ ونەر ورداسىنىڭ تۇراقتى كورەرمەنىمىن. ونداعى تالاي رولدەردى سومداپ جۇرگەن ارتىستەردىڭ شەبەرلىگى ماعان جاقسى تانىس.
ماسەلەن, وزىمە بەلگىلى قالامگەر راحىمجان وتارباەۆتىڭ تۋما تالانتتىڭ ازاپقا تولى ءومىرىن ءورىپ جازعان «امىرە» دراماسى قاتتى ۇنادى. 1925 جىلى پاريجدە وتكەن بۇكىلدۇنيەجۇزىلىك «ەكسپو» كورمەسىنە قاتىسقان امىرە قاشاۋباەۆتىڭ تاعدىرىنا ارنالعان تۋىندىنىڭ ساحنالىق شەشىمدەرى كورەرمەندى بەيجاي قالدىرمادى. قويىلىمنىڭ رەجيسسەرى نۇرلان جۇمانيازوۆ تىڭ ىزدەنىستەرگە بارعان. باس كەيىپكەردىڭ پاريجگە بارعاندا حالقىمىزدىڭ تاعى ءبىر اياۋلى ۇلى مۇستافا شوقايمەن كەزدەسۋى دە, كورنەكتى قايراتكەردىڭ جات جەردە ەلدى ساعىنىپ جۇرگەنى دە شىنايى بەرىلگەن. سپەكتاكلدىڭ باس كەيىپكەرى «امىرە» بەينەسىن تەاتر ارتىستەرى قاسىمحان بۇعىباي مەن اسىلبەك قاپاەۆ كەلىستى سومدادى.
ال قاللەكي تەاترىنىڭ كوركەمدىك جەتەكشىسى, قازاقستاننىڭ حالىق ءارتىسى تالعات تەمەنوۆ قويعان «قىزىل ورامالدى شىنارىم» اتتى ليريكالىق دراماسى كورەرمەننىڭ كوڭىلىنەن شىققان سپەكتاكل بولدى. قىرعىزدىڭ ايگىلى جازۋشىسى شىڭعىس ايتماتوۆتىڭ «ارمانىم, اسەلىم» پوۆەسى نەگىزىندە ساحنالانعان تۋىندىدا قوس جاستىڭ ادال ماحابباتى ايرىقشا بەدەرلەنگەن. ۇزاتىلىپ بارا جاتقان جەرىنەن تۋعان-تۋىستارىن تاستاپ, سۇيگەنىمەن كەتە بارعان اسەلدىڭ ءومىرى دە ادامعا تەرەڭ وي سالادى. ءبىر-اق رەت جىبەرىلگەن اعاتتىق ءىلياستىڭ وتباسىنان ايىرىلۋىنا اكەپ سوعادى. مىنە, وسى وقيعالاردىڭ ءبارى دە ءومىردىڭ وزىنەن الىنعان.
قىسقاسى, شاھارداعى باس تەاتردىڭ ءار قويىلىمىن قالت جىبەرمەيمىن. العاش اقمولادا قازاق تەاترى اشىلعاندا قۋانىشىمىزدا شەك بولمادى. بۇگىنگى «استانا» كونتسەرت زالىندا كورنەكتى سۋرەتكەر عابيت مۇسىرەپوۆتىڭ «اقان سەرى–اقتوقتى» تراگەدياسىمەن تەاتر شىمىلدىعى ءتۇرىلىپ ەدى. سودان بەرى ءبىراز ۋاقىت ءوتتى. ونەر ورداسىنىڭ ارناسى كەڭەيدى. «استانالىق» دەگەن مارتەبەسى دە بار. ۇنەمى تەاتر ۇجىمىنا تىلەكتەس بولىپ وتىرامىن. ءبىزدى ولار جاقسى دۇنيەلەرىمەن قۋانتا بەرسىن!
ساعات باقىرشىقوۆا,
زەينەتكەر ۇستاز
