كەشە استانا قالاسى اكىمدىگىنىڭ «شاراپات» الەۋمەتتىك قىزمەت كورسەتۋ ورتالىعىندا قازاقستان حالقى اسسامبلەياسى مەن قالالىق اكىمدىك جانىنداعى «قوعامدىق كەلىسىم» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن ناۋرىز مەرەكەسىنە ارنالعان قايىرىمدىلىق شاراسى ءوتتى.
«شاراپات» الەۋمەتتىك قىزمەت كورسەتۋ ورتالىعى زەينەت جاسىنا جەتكەن جاندارعا, ءى جانە ءىى توپتاعى مۇگەدەكتەرگە, ۇدايى باسقا ادامنىڭ كومەگى مەن كۇتىمىنە مۇقتاج جالعىزباستى ازاماتتارعا قىزمەت كورسەتۋ ماقساتىندا قۇرىلعان. مەكەمە 1989 جىلدان باستاپ جۇمىس ىستەپ كەلەدى. 2007 جىلى مەملەكەت باسشىسىنىڭ باستاماسىمەن اتالمىش مەكەمەنىڭ جاڭا عيماراتى اشىلعان بولاتىن. مەكەمە قىزمەتىنىڭ باسىم باعىتى – ورتالىقتى مەكەندەيتىن قاريالاردىڭ سۇرانىسى مەن قاجەتتىلىگىن تولىق قامتاماسىز ەتۋ. مۇندا تۇراقتى جانە ۋاقىتشا تۇرۋعا ارنالعان 400 ورىن قاراستىرىلعان. اتالمىش ورتالىقتا 12 ۇلتتىڭ وكىلى ءبىر-بىرىمەن تاتۋ-ءتاتتى كۇن كەشىپ جاتىر ەكەن. سوعان وراي كارىس, قاراقالپاق, تاتار-باشقۇرت سياقتى قالاداعى بىرقاتار ەتنومادەني ورتالىقتارىنىڭ ونەرپازدارى كونتسەرتتىك باعدارلامالارىن ۇسىنىپ, كوپشىلىكتىڭ كوڭىلىن كوتەردى. «پولياكي», «وبەرەگ», «ۆوزروجدەنيە», «زلاتا» سىندى قوعامدىق بىرلەستىكتەر دە قايىرىمدىلىق شارانىڭ وتۋىنە اتسالىستى. اسەم اننەن ەرەكشە اسەر الىپ, شات-شادىمان كۇي كەشكەن قامكوڭىل جاندارعا مەرەكەلىك سىيلىقتار دا تابىس ەتىلدى.
شارا بارىسىندا ءسوز العان قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا ناۋرىز مەيرامىنىڭ ءمان-ماعىناسى مەن قايىرىمدىلىق شارانىڭ ماقساتى تۋرالى ايتىپ ءوتتى.
– ەتنومادەني ورتالىقتارىنىڭ وكىلدەرى «شاراپات» الەۋمەتتىك قىزمەت كورسەتۋ ورتالىعىندا جىل سايىن ءداستۇرلى تۇردە ءتۇرلى شارالار وتكىزىپ تۇرادى. وسىنداعى جاندارعا ءتاتتى تاعامدار ۇسىنىپ, ولارعا سىي-سياپات جاسايدى, – دەيدى ل.قۇسايىنوۆا.
نۇرداۋلەت كاكىشەۆ
