ەلىمىز بويىنشا عانا ەمەس, الەم بويىنشا دا بالاماسى جوق ەرەكشە عيمارات – وقۋشىلار سارايى. ىشكى قوندىرعىلارى زاماناۋي تەحنيكالارمەن جابدىقتالىپ, سىرتى قازاقي ناقىشتا ارلەنگەن بۇل نىساننىڭ كەسكىنى مەن كەلبەتى تىم ەرەكشە. بۇل كوركەم, ءتورت قاباتتى, كوز تارتارلىق ارحيتەكتۋرا تۋىندىسى شامامەن سەگىز جارىم گەكتار جەردى الىپ جاتىر. نىساننىڭ توبەسىندە شاڭىراق ورنالاسقان. شەڭبەردىڭ بيىكتىگى – 8 مەتر, ال ديامەترى – 156 مەتر. الىپ, اسەم, سۇلباسى ەرەكشە بۇل عيمارات ارنايى ەلباسى تاپسىرماسى بويىنشا سالىنعان. ەڭ قۋانىشتىسى, وسىنداي ەرەكشەلىككە تۇنعان نىسان بالالاردىڭ يگىلىگىنە ارنالادى.
الىپ كونسترۋكتسيا – ارمان باسپالداعى
2011 جىلى بوي كوتەرگەن عيماراتتىڭ جالپى اۋدانى – 61274,6 شارشى مەتر. ءتورت قاباتتان تۇراتىن نىسانداعى بولمەلەر سانى – 842. عيماراتقا كىرىپ كەلگەن ادامنىڭ كوزى بىردەن ۇزدىكسىز اينالىپ تۇراتىن الىپ كونسترۋكتسياعا تۇسەدى. بۇل ءبىر جاعىنان سەكتسيالار باعىتىنىڭ جان-جاقتىلىعىن كورسەتەتىن ساراي ەمبلەماسى بولسا, ەكىنشى جاعىنان ءار بالانىڭ ارمانى ىسپەتتى. توقتامايدى. ۇنەمى قوزعالىس ۇستىندە. بالالاردىڭ ارمان باسپالداعى وسى جەردەن باستاۋ الادى. ەرتەڭىنە ەرىنبەي قارايتىن تالاپتى جاستىڭ جىگەرىن جانۋدى قۇددى وسى ارادان باستاپ كەپ جىبەرگەندەي. قيالىن قياعا ۇشىرىپ, قاناتتانۋدىڭ قادامى.
بۇگىندە وقۋشىلار سارايى قالاداعى قوسىمشا ءبىلىم بەرەتىن ەڭ ءىرى ۇيىم بولىپ تابىلادى. ونداعى ۇيىرمەلەردىڭ 60 پايىزى تەگىن جۇرگىزىلەدى. ءارتۇرلى الەۋمەتتىك از قامتىلعان, كوپ بالالى وتباسىلاردىڭ بالالارى كوبىنە مۇندا تەگىن ساباقتارعا قاتىسۋعا مۇمكىندىك الادى. مۇنداي ساباقتاردىڭ قاتارىندا تەحنيكالىق ساباقتار, روبوتوتەحنيكا, جەڭىل اتلەتيكا بولسا, باسقا سەكتسيالار اقىلى جۇرگىزىلەدى. ولاردىڭ باعاسى ايىنا 2500-دەن 7000 تەڭگەگە دەيىن وزگەرىپ وتىرادى.
كەشەننىڭ ىشىندەگى 125 ۇيىرمەدە 10 مىڭ وقۋشى ءبىلىم الادى. بۇدان بولەك, ءتۇرلى باعىتتاعى سپورت, عىلىمي زەرتتەۋلەر, ونەر مەكتەپتەرى دە بار. ارنايى, سالالىق مەكتەپتەردەن ءبىلىم الىپ جۇرگەن بالالاردىڭ دا قاراسى كوپ.
سونداي-اق, مۇندا زاماناۋي تەحنولوگيامەن جابدىقتالعان تاڭعالارلىق زەرتحانالار وتە كوپ. وقۋشىلاردىڭ ساناسىن سەرپىلتۋ ءۇشىن ءتۇرلى قىزىقتى ويىندار دا وتكىزىپ تۇرادى. ماسەلەن, ءبىر عانا نايزاعايلار سوعىپ تۇرعان «تەسلا شوۋ» دەپ اتالاتىن ويىنىن الساق, بۇل ۆيرتۋالدى الەمدە بالالار وزدەرىنىڭ ويلاۋ قابىلەتىن ءوسىرىپ, جاڭا قىرىنان كورسەتە الادى. ەڭ عاجابى, بۇل زەرتحانادا ويىن ويناۋعا, سۋرەتكە تۇسۋگە, بالالاردىڭ سانا-سەزىمىن وسىرۋگە بارلىق مۇمكىندىك جاسالعان.
بالاعا قاجەتتىنىڭ ءبارى بار
وقۋشىلار سارايى – جاستاردىڭ رۋحاني جانە مادەني دامۋىنىڭ ماڭىزدى ورتالىعى. وقۋدان تىس ۋاقىتتا پايدالى دۇنيەمەن اينالىسقىسى كەلەتىن, بوس ۋاقىتىن دۇرىس ۇيىمداستىرعىسى كەلەتىن ءاربىر وقۋشىنىڭ باسىن قوساتىن جەر – بۇل. جان-جاقتى سالالار قامتىلىپ, بالاعا قاجەتتىنىڭ ءبارى تابىلاتىن سارايدىڭ ءدۇبىرى دە ەرەكشە.
بۇگىندە مۇندا 10 مىڭ بالانى قامتي وتىرىپ, ءتۇرلى باعىتتا جۇمىس جاسايتىن 650-گە جۋىق توپ, 125 ءۇيىرمە بار. ولارعا 200-گە جۋىق قوسىمشا ءبىلىم بەرۋ پەداگوگتارى ساباق جۇرگىزەدى.
بۇگىندە وقۋشىلار سارايىندا ديپلوماتيالىق كورپۋس, زەرتحانا مەن نانوتەحنولوگيالار سەكتسياسى جۇمىس ءىستەيدى. بۇدان باسقا, اناتوميا, فيزيكا سەكتسيالارى دا اشىلعان. بۇل – ءۇيىرمەلەردىڭ از عانا بولىگى. وقۋشىلار سارايىنداعى كوپتەگەن سپورتتىق جانە بي كوماندالارى, سپورتشىلار جاسوسپىرىمدەر اراسىندا الەم چەمپيونى اتانعان. جەڭىمپازداردى تاربيەلەۋشى جەرگىلىكتى پەداگوگتاردىڭ ىشىندە عالىمدار دا, بەلگىلى ماماندار دا, مۋزىكانتتار دا, قازاقستان رەسپۋبليكاسىنىڭ ەڭبەك سىڭىرگەن عىلىم, مادەنيەت جانە سپورت قايراتكەرلەرى دە بار.
بۇل عيماراتتا جەڭىل, اۋىر اتلەتيكا الاڭى, سۋدا ءجۇزۋ باسسەينى, مۇز ايدىنى, فۋتبول, حوككەي, باسكەتبول الاڭى, تەننيس زالدارى بار. ستۋديالارمەن قاتار تەاتر, دايىندىق الاڭدارى, وركەستر, حور, بي, بالەت جانە دراما توپتارىنا ارنالعان ساحنا, كورمە زالى, امفيتەاتر ورنالاسقان. سارايدىڭ ءوز اسحاناسى مەن مەديتسينا ورتالىعى, ءتۇرلى تەحنيكالىق قىزمەتتەرگە ارنالعان بولمەلەرى بار. سونداي-اق, وقۋشىلار سارايىندا قىزىل كىتاپقا ەنگىزىلگەن, سيرەك كەزدەسەتىن وسىمدىكتەرى بار قىسقى باق, 3د تەحنولوگياسىن پايدالانۋ ارقىلى پانورامالىق, سفەرالىق جانە عالامشارلىق كەسكىندەمە كورۋ مۇمكىندىگىن بەرەتىن پلانەتاري, يننوۆاتسيالىق شەشىمدەر جيىنتىعى توپتاستىرىلعان ۆيرتۋالدى زەرتحانا سەكىلدى زاماناۋي ورتالىقتار ورنالاسقان. بۇل از دەسەڭىز, سارايدا بالالارعا ارنالعان «مەدياورتالىق», اتوم ەنەرگەتيكاسى جونىندەگى اقپاراتتىق ورتالىق, ۇلتتىق ينتەراكتيۆتى پارك قىزمەت اتقارادى. وقۋشىلار سارايى اشىلعان كۇننەن باستاپ ءتۇرلى تەماتيكالىق كورمەلەر, سونىمەن قاتار تانىستىرىلىمدار, كورمە بايقاۋلارى, بەينەلەۋ ونەرى ۇيىرمەسىنىڭ جاس سۋرەتشىلەر شىعارماشىلىقتارى مەن قولدانبالى ساندىك ونەرى, قازىرگى زاماناۋي ديزاينى, شىعارماشىلىق كەزدەسۋلەر جانە ماستەر-كلاسس ۇيىمداستىرىلىپ, وتكىزىلىپ كەلەدى. تەوريالىق جانە پراكتيكالىق ءبىلىم الۋ ءۇشىن بۇكىل جاعداي جاسالعان وقۋشىلار سارايىندا بالالار مۇعالىمدەردىڭ, كاسىبي مامانداردىڭ كومەگىمەن مەكتەپتە العان بىلىمدەرىن دە نىعايتادى.
ۇلتتىق ينتەراكتيۆتى ساياباق
وقۋشىلار سارايىنىڭ ىشىندە ورنالاسقان ءتۇرلى ورتالىقتاردىڭ اراسىنان ۇلتتىق ينتەراكتيۆتى ساياباقتى ەرەكشە اتاپ وتۋگە بولادى. ول ەلباسى نۇرسۇلتان نازارباەۆتىڭ تاپسىرماسىمەن سالىنعان بولاتىن. ساياباقتىڭ باستى ماقساتى – ءار بالانىڭ تۇلعا رەتىندە جان-جاقتى دامۋىنا, سونداي-اق بالالاردىڭ ءوز بەتىنشە ءبىلىم الۋىنا جانە ءوزىن-ءوزى جەتىلدىرۋىنە جاردەم بەرۋ.
بۇل پارك زاماناۋي عىلىمي زەرتحانالارمەن, سپورت جابدىقتارىمەن جانە ينتەراكتيۆتى ەكسپوزيتسيالارمەن جابدىقتالعان. وقۋشىلار سارايى بۇگىندە ءبىلىم الۋشىلار ءۇشىن ينتەراكتيۆتى پاركتىڭ «عىلىم مەن تەحنولوگيا», «سپورت جانە دەنساۋلىق», «ونەر, بي جانە مۋزىكا» اتتى نەگىزگى ءۇش كلاستەرىن ۇسىنىپ وتىر.
1400 شارشى مەتر اۋماقتى الىپ جاتقان پارك, ەڭ الدىمەن, بالانىڭ دامۋىنا ەرەكشە ىقپال ەتەدى. زەرتتەۋلەر جۇرگىزىپ, كەلۋشىلەردىڭ بىلگىرلىگىن دامىتۋعا جانە شىعارماشىلىق قابىلەتىن ارتتىرۋعا مۇمكىندىك بەرەدى.
ءابۋ ناسىر ءال-فارابي «عىلىم ادام ساناسىنا بولمىسى بولەك, ەرەكشە ۇتقىرلى ۇعىمداردى ورنىقتىرۋ ارقىلى عانا تەرەڭ ۇيالايدى» دەگەن. بۇل پارك تە بۇگىندە ءبىلىم الۋشىلاردىڭ ونەر جانە سپورت سالاسىنا بايلانىستى ۇيىرمەلەرگە قاتىساتىن, سونداي-اق, عاجايىپ ەكسپوناتتار, ينتەراكتيۆتى بىلىمدىلىك اتتراكتسيوندارىمەن جۇمىس جاساپ, زاڭدارمەن, تابيعاتتانۋ قاعيداتتارىمەن اينالىسۋعا بولاتىن ورىنعا اينالدى. وقىتۋ ماقساتتارىنا قىزمەت ەتەتىن ەكسپوزيتسيا قۇرىپ, كەلۋشىلەردىڭ قىزىعۋشىلىعىن ارتتىرىپ, ولارعا عىلىم مەن ونىڭ ءارتۇرلى سالالارىنىڭ مۇمكىندىكتەرىن كورسەتەتىن ينتەراكتيۆتى پاركتىڭ اتقارىپ وتىرعان قىزمەتى ەرەكشە.
گۇلجان راحمان