استانا اكىمدىگىنىڭ №11 قالالىق ەمحاناسىندا بوسانۋعا دايىندىق مەكتەبى جانە وتباسىن جوسپارلاۋ كابينەتى رەسمي تۇردە جۇمىس ىستەي باستادى.
كابينەتتىڭ اشىلۋىنا «اقنيەت» قايىرىمدىلىق قورى قولداۋ كورسەتتى. ەندى بولاشاق انالار بوسانۋعا دايىندىق كۋرستارىنان وتۋگە جانە جۇكتىلىكتى جوسپارلاۋدىڭ ماڭىزدىلىعىن ۇعىنىپ, ءتۇرلى تۇقىم قۋالايتىن اۋرۋلار, تۋا پايدا بولاتىن اقاۋلار, جۇقپالى جانە تاعى باسقا دەرتتەر بويىنشا اكۋشەر-گينەكولوگ, پەدياتر جانە پسيحولوگ سىندى مامانداردان بىلىكتى كەڭەس الا الادى.
– ءبىزدىڭ ماقساتىمىز – جاستارعا, وتباسى قۇرعاندارعا نەمەسە شاڭىراق كوتەرۋدى جوسپارلاپ جۇرگەندەرگە اقپاراتتىق ءبىلىم بەرۋ, سونىڭ ىشىندە مەديتسينالىق كومەك كورسەتۋ, سونداي-اق, الەۋمەتتىك ماڭىزدى اۋرۋلاردىڭ الدىن الۋ جانە ولاردىڭ تۋىنداۋ فاكتورلارىن تومەندەتۋ ماسەلەسى بويىنشا كومەك كورسەتۋ, – دەدى №11 ەمحانانىڭ باس دارىگەرى جاڭالىق ساعاندىقوۆ.
بۇگىنگى تاڭدا اتالمىش ەمحانادا بالا تۋعا قابىلەتتى جاستاعى 16 مىڭ ايەل تىركەلگەن, ولاردىڭ 60 پايىزى جۇكتىلىكتەن ساقتانۋدىڭ قۇرالدارىمەن قامتىلىپتى. وسى جونىندە ايتا كەلە, ەمحانا باسشىسى انا مەن بالا دەنساۋلىعىن ساقتاۋ – دەنساۋلىق ساقتاۋ جۇيەسى الدىندا تۇرعان ماڭىزدى مىندەتتەردىڭ ءبىرى ەكەنىنە توقتالدى. ايتۋىنشا, ماماندار وتباسىن جوسپارلاۋ كابينەتىندە بولاشاق انالار مەن اكەلەر ءۇشىن جاعىمدى ءارى قولايلى جاعداي قالىپتاستىرۋعا بارىنشا كۇش جۇمساپتى. ولار ەرلى-زايىپتى جۇپتارعا جۇكتىلىكتى جوسپارلاۋ ماسەلەلەرى, جۇكتى جانە بوسانعاننان كەيىنگى كەزەڭدەگى كۇتىم بويىنشا كەڭەس بەرۋگە ارقاشان دايىن. اسىرەسە, جاستارمەن جۇمىس ىستەۋگە بارىنشا كوڭىل بولىنەدى ەكەن. بۇل رەتتە اتالمىش كابينەت ماماندارى ستۋدەنت جاستارمەن ءتۇرلى تاقىرىپتاردا اڭگىمە وتكىزىپ وتىرادى.
«اقنيەت» قايىرىمدىلىق قورىنىڭ ءتورايىمى باعيلا بيسەمباەۆا بولسا وسىنداي كابينەتتەر باسقا ەمحانالاردا دا اشىلسا دەگەن تىلەگىن جەتكىزدى.
گۇلبارشىن وكەشقىزى
