«ەكسپو-2017» حالىقارالىق كورمەسىنىڭ مۇراسىنا اينالعان «نۇر الەم» پاۆيلونى ەلوردانىڭ عاجايىپ عيماراتتارى قاتارىن بىلتىر عانا تولىقتىردى.
كورمەنىڭ ارحيتەكتۋرالىق سيمۆولى سانالاتىن «نۇر الەم» – الەمدەگى ەڭ ۇلكەن سفەرا. ونىڭ ديامەترى – 80 مەتر, ال بيىكتىگى – 100 مەتر. حالىقارالىق بايقاۋعا قاتىسقان 105 كومپانيانىڭ ىشىندە Adrian Smith+Gordon Gill Architecture اقش ساۋلەتشىلەرى توبىنىڭ جوباسى ۇزدىك بولىپ تانىلدى. عيماراتتىڭ العاشقى قاباتى قازاقستاننىڭ تاريحى, مادەنيەتى, ءداستۇرى, كورىكتى جەرلەرى مەن ەلىمىزدىڭ سوڭعى جەتىستىكتەرىنە ارنالعان. پاۆيلون «قازاقستانمەن تانىسۋ» جانە «جاسامپازدىق ەنەرگياسى» اتتى ەكى باستى تاقىرىپتى قامتيدى. ال 2-8 قاباتتارى بولاشاقتىڭ مۋزەيى ىسپەتتەس. تارقاتىپ ايتساق, ساندىق, مۋلتيمەديالىق جانە ينتەراكتيۆتى تەحنولوگيالاردىڭ كومەگىمەن جاسالعان ءاربىر قابات ءتۇرلى ەنەرگيانىڭ مۇمكىندىگىن تانىستىرادى. كەلگەن قاۋىم 2-قاباتقا كوتەرىلگەندە سۋ ەنەرگياسىن وندىرەتىن قۇرىلعىلاردى كورەدى. كەلەسى قاباتتا كينەتيكالىق ەنەرگيانىڭ تاريحي جادىگەرلەرى ساقتالعان. ال بيوماسساعا ارنالعان 4-قاباتقا كىرسەڭىز, جايقالعان جاسىل جەلەكتىڭ ىشىندە اڭ-قۇستى بايقايسىز. 5-قاباتتا جەل قۋاتىن كورنەكى تۇردە كورسەتەتىن اۋا فونتانى بار. ءبىر قابات جوعارى كوتەرىلگەندە كۇن جۇيەسىنىڭ قالاي پايدا بولاتىنىن بايقاپ, كۇن ساۋلەسىنەن قۋات الاتىن كولىككە وتىرىپ, جارىسقا قاتىسا الاسىز. 7-قاباتتا عارىش الەمىنە ساياحات جاساپ, عارىشكەرلەردىڭ كيىمدەرى مەن كەمەسىن كورەسىز. سوڭعى سەگىزىنشى قابات «استانا – بولاشاقتىڭ قالاسى 2050» دەپ اتالادى. الىپ ەكراننان قالا قۇرىلىسىنىڭ قارىشتاپ دامۋىن بەينەلەيتىن ءفيلمدى تاماشالاۋعا بولادى. ودان بولەك بولاشاقتا جوسپارلانعان جوبالارمەن تانىس بولاسىز. سونداي-اق, بۇل قاباتتا 93 مەتر بيىكتىكتە ورنالاسقان «شىنى كوپىر» بار. عيماراتتىڭ جوعارعى بولىگىندەگى شولۋ الاڭىنا ليفت ارقىلى كوتەرىلىپ, بۇكىل ەكسپو قالاشىعىن تاماشالاۋعا بولادى.
«استانا ەكسپو-2017» ۇلتتىق كومپانياسىنىڭ باس مەنەدجەرى روزا اسانباەۆانىڭ ايتۋىنشا, ساۋلەتتىك شەشىمى مەن كەلبەتى كوز تارتاتىن «نۇر الەمنىڭ» بىرنەشە ەرەكشەلىگى بار. «نۇر الەمنىڭ» قۇرىلىسىنا 13000 توننا مەتالل كەتكەن. شار 2800 اينەك جابىندىسىنان جاسالعان. ءار اينەكتىڭ سالماعى 600-800 كەلىگە دەيىن جەتەدى. قۇرىلىمنىڭ كۇن ەنەرگياسىن ەلەكتر قۋاتىنا اينالدىراتىن جابدىعى بار. سفەرانىڭ جوعارعى جاعىندا 2 الىپ جەل گەنەراتورى ورناتىلعان. نىساننىڭ جالپى اۋماعى – 22000 شارشى مەتر. بۇل – ءتورت فۋتبول الاڭىنىڭ كولەمىمەن پارا-پار. كورمەنىڭ بارلىق نىساندارىنىڭ قۇرىلىسى ءۇشىن 56 مىڭ توننا مەتالل مەن 500 مىڭ توننا بەتون جۇمسالعان. ەسەپتەسەك, بۇل الەمدەگى ەڭ بيىك ەكى مۇنارانى تۇرعىزۋعا جەتەدى.
عيماراتتىڭ «كىرپىشى» ەندى قالانىپ جاتقاننىڭ وزىندە ساۋلەت ونەرىنەن حابارى بار ادامدار ونى لوندونداعى حرۋستال سارايىنا, پاريجدەگى ەيفەل مۇناراسىنا, بريۋسسەلدەگى «اتوميۋم» ىسپەتتى بەلگىلى نىسانعا اينالاتىنىنا سەنىم ءبىلدىردى.
قازىردىڭ وزىندە «نۇر الەم» عيماراتى تۋريزم جانە حالىقارالىق كورمەلەردىڭ الەمدىك مۇراسىنا ەندى.
