قالالىق ءماسليحاتتىڭ كوپشىلىك تىڭداۋلارىندا «جۇمىسپەن قامتۋ 2020 جول كارتاسى» باعدارلاماسى اياسىندا جۇمىسسىزدىقتى تومەندەتۋ جانە حالىقتى جۇمىسپەن قامتۋعا قول جەتكىزۋ جونىندەگى جۇمىس جاعدايىن قارادى. وسى تاقىرىپتا بايانداما جاساعان جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى باسشىسىنىڭ مىندەتىن اتقارۋشى ارتەم ءابىلدينوۆ ەلوردا ەڭبەك نارىعىنداعى احۋال تۋرالى اقپارات بەردى.
اعىمداعى جىلدىڭ ءۇشىنشى توقسانىنداعى مالىمەتتەر بويىنشا قالاداعى جۇمىسسىزدىق دەڭگەيى 4,6 پايىزدى قۇرايدى. بۇل – جۇمىسسىزدىقتىڭ ەڭ تومەنگى دەڭگەيى رەتىندە رەسپۋبليكا بويىنشا وڭ ناتيجە.
2016 جىلدىڭ 1 جەلتوقسانىنا دەيىن جۇمىسپەن قامتۋ ورتالىعىنا 12 912 ازامات وتىنىشپەن كەلسە, ونىڭ ىشىندە 10 193 ادامعا جۇمىسسىزدىقتان قورعاۋدىڭ الەۋمەتتىك شارالارى كورسەتىلگەن. اتاپ ايتقاندا, 5 ء985–ى تۇراقتى جۇمىسقا ورنالاسسا, 2 137 ادام قوعامدىق جۇمىستارعا تارتىلعان, 661 وقۋ ورىندارىنىڭ تۇلەكتەرى جاستار تاجىريبەسىنەن وتكەن. الەۋمەتتىك جۇمىس ورىندارىنا 121 ادامدى قامتىپ, 590 ادام ينفراقۇرىلىمدىق جوبالارعا قامتىلعان. بايانداماشى 2020 جىلعا دەيىن جۇمىسسىزدىق دەڭگەيىن 4,5 پايىزعا تومەندەتۋ كوزدەلىپ وتىرعانىن ايتتى.
بۇل ماقساتتا مەملەكەتتىك باعدارلامالارعا قاتىسۋمەن قاتار تۇرعىندارمەن اقپاراتتىق جۇمىستاردى قاتار جۇرگىزۋدىڭ ماڭىزدىلىعىنا توقتالدى.
جىل باسىنان بەرى بۇقارالىق اقپارات قۇرالدارىمەن تىعىز جۇمىس جۇرگىزىلگەن. اقپاراتتىق-تۇسىندىرمە جۇمىستارى الەۋمەتتىك جەلىلەردەن دە تۇراقتى بەرىلىپ وتىر.
بيىل وتكىزىلگەن 12 بوس ورىندار جارمەڭكەسىندە جاستار مەن ايەلدەردىڭ جانە مۇمكىندىگى شەكتەۋلى جانداردىڭ دا جۇمىس تابۋىنا مۇمكىندىكتەر جاسالدى.
جۇمىسپەن قامتۋ ورتالىعىنىڭ 5 وكىلدىگى «استانالىق» بازاردا, «گۇلجان», «راحمەت-2», «ارۋجان» جانە «استىقجان» ساۋدا ۇيلەرىندە ورنالاسقان. سونىمەن قاتار, قالاداعى ءۇش مەشىتتە اپتا سايىن ورتالىقتىڭ ماماندارى كوپشىلىكپەن سۇحباتتاسىپ, جۇمىسقا ورنالاسۋ بويىنشا كەڭەستەر بەرۋدى داستۇرگە اينالدىرعان. بۇدان دا وزگە, جۇمىسسىزدىققا قارسى شارالار ۇيىمداستىرىلىپ, بۇل ماسەلەنى شەشۋدە تۇرعىنداردىڭ بەلسەندىلىگى ارتىپ كەلەدى.
بايانداماشىنىڭ ەسەبىنەن كەيىن ءماسليحات دەپۋتاتتارى جۇمىسسىزدىقتى تومەندەتۋ شارالارىنا قاتىستى سۇراقتارىنا جاۋاپ الدى, سونىمەن بىرگە, بۇل سالاداعى جۇمىستى جانداندىرۋ ماقساتىندا ءوز ۇسىنىستارىن ايتتى.
ايگۇل ۋايسوۆا
