بيىل قازاق جۇرتى ەلىمىزدىڭ زاماناۋي كەلبەتىن تانىتاتىن, جاستارعا ۇلگى بولاتىن «100 جاڭا ەسىمدى» انىقتادى. جوبانى قولعا الۋ تۋرالى ەل پرەزيدەنتى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى وسى جىلعى ساۋىردە جاريالانعان باعدارلامالىق ماقالاسىندا ۇسىنىس جاساعان بولاتىن.
بۇل جوبا جايىندا ەلباسى «جاستار ومىرگە شىنايى كوزبەن قاراپ, ءوز تاعدىرلارىنا وزدەرى يەلىك ەتە الاتىن ازاماتتار بولۋى ءۇشىن ولارعا ۇلگى ۇسىنۋىمىز كەرەك» دەپ ايتقان ەدى. ناتيجەسىندە قازاقستاننىڭ تۇكپىر-تۇكپىرىنەن 2200 ۇمىتكەر سايلانىپ, قالىڭ جۇرتشىلىق 100 ەمەس, 102 ازاماتتى لايىق تۇلعا دەپ تانىدى.
ونلاين داۋىس بەرۋگە ءتۇسىپ, ەلىمىزدىڭ «جاڭا ەسىمى» رەتىندە تانىستىرىلعان ازاماتتار 1 جەلتوقسان كۇنى پرەزيدەنتپەن كەزدەستى. مەملەكەت باسشىسى ازاماتتارعا قوعام تاراپىنان ارتىلعان جاۋاپكەرشىلىكتىڭ مول ەكەنىن ەسكەرتتى.
– سىزدەر بايقاۋدىڭ ىرىكتەۋ تۋرىنان وتتىڭىزدەر. داۋىس بەرۋ ينتەرنەت ارقىلى جۇرگىزىلدى. سىزدەر بىرەگەي تۇلعاسىزدار. تاۋەلسىزدىگىمىز سىزدەرگە تالانتتارىڭىزدى شىڭداپ, بولاشاققا جول سالۋعا مۇمكىندىك بەردى. سىزدەر وسكەلەڭ ۇرپاققا ۇلگى بولاسىزدار, – دەپ نۇرسۇلتان نازارباەۆ جەڭىمپازدارعا قاراتا ءسوز سويلەدى.
«100 جاڭا ەسىم» جوباسىنا استانالىقتاردىڭ اراسىندا دا عىلىم, مادەنيەت, مەديتسينا, بيزنەس جانە قوعامنىڭ بەلدى وكىلدەرى كىردى. ايتالىق, نازارباەۆ ۋنيۆەرسيتەتىنىڭ وقىتۋشىسى ءارى عالىم زارينا ساۋىتباەۆا زەرتتەۋ توبىمەن بىرىگىپ, قاتەرلى ىسىكتىڭ پايدا بولۋىنا اكەلىپ سوقتىراتىن اقۋىز ءتۇرىن انىقتادى. بۇگىندە زارينا عىلىمنىڭ كومەگىمەن ناۋقاس ادامدى جاي عانا ەمدەپ قويماي, اۋرۋدى مۇلدەم بولدىرماۋدىڭ امال-تاسىلدەرىن ىزدەۋدە. ال مادەنيەت سالاسىندا «استانا وپەرا» تەاترىنىڭ جەتەكشى ءسوليسى, حالىقارالىق بايقاۋلاردىڭ جەڭىمپازى مەدەت شوتاباەۆ پەن تۋعان جەرىنەن جىراقتا جۇرسە دە, قازاق كينوسىنىڭ دامۋىنا ۇلەسىن قوسۋعا تىنىمسىز ەڭبەك ەتىپ جۇرگەن ايديە ايداربەكوۆتىڭ ەسىمدەرى جوباعا ەندى. ال اناتولي دوبروۆولتسەۆ بولسا بيزنەسكە كەلگەن قادامىمەن ەرەكشەلەندى. ول ەلورداداعى جوعارى لاۋازىمىن تاستاپ, تۋعان جەرىنە ورالىپ, بال اراسىن باپتاۋعا كىرىسەدى. قازىرگى تاڭدا ايىنا 4 توننا بال ءوندىرىپ, بۇكىل اۋداندى بالمەن قامتاماسىز ەتۋدە. ودان بولەك, جاستار استانالىق كاسىپكەر نۇرجان التاەۆ, IT مامانى نۇرجان جولدىبالينوۆ, 20-دان استام ءموبيلدى ءونىمنىڭ اۆتورى ارمان سۇلەيمەنوۆ جانە ەرىكتىلەر قوزعالىسىنىڭ جەتەكشىسى گۇلميرا ءابدىراشوۆادان ۇلگى الۋلارىنا بولادى.
ەندى ولاردىڭ يگى ىستەرى مەن جەتكەن جەتىستىكتەرىن ناسيحاتتاۋ مەن ابىرويىن اسقاقتاتۋعا مادەنيەت جانە سپورت مينيسترلىگى كۇش جۇمسايدى. ارىستان مۇحامەديۇلى «تاۋەلسىز قازاقستاننىڭ بۇگىنگى كەلبەتىن قالىپتاستىرۋعا ۇمتىلعان تۇلعالاردىڭ بەينەسى ادەبيەتتە, كينودا, بەينەلەۋ ونەرىندە كورىنىس تابادى» دەپ ۋادە بەردى.
گۇلدانا تالعاتقىزى
