جىلۋسىز قالدىرعاندار جۇمىستان كەتتى
ەلوردانىڭ ەنەرگەتيكالىق كەشەنىن جاقسارتۋ ماقساتىندا جىل سايىن وسى سالاعا 30-40 ملرد تەڭگە باعىتتالادى. ەسەسىنە جىلىتۋ ماۋسىمى بىرقالىپتى وتەدى.
دەرەكتەرگە سۇيەنسەك, وتكەن جىلى 18,8 شاقىرىم جىلۋ جەلىسى قايتا جوندەلىپ, 16,4 شاقىرىم جاڭادان سالىندى. ءناتيجەسىندە «يۋجنايا ساراندا» كەشەنىنىڭ تۇرعىندارى, قازمزۋ ۋنيۆەرسيتەتى, ترانسفۋزيولوگيا عىلىمي-وندىرىستىك ورتالىعى جانە دە سول جاعالاۋداعى تۇتىنۋشىلار ورتالىق جىلۋمەن قامتىلدى.
«وتكەن جىلى استانادا ەكسپو-2017 كورمەسىن, جاڭا تەمىرجول ۆوكزالىن, «مىڭجىلدىق», «باتىعاي» اۋدانى مەن الەۋمەتتىك جاعىنان ماڭىزدى نىسانداردى ەلەكتر جارىعىمەن قامتاماسىز ەتكەن «تۇران», «جاڭاجول», «بايتەرەك», «يكي», «پرومزونا» شاعىن ستانسالاردىڭ قۇرىلىس جۇمىستارى مەن قالپىنا كەلتىرۋ جۇمىستارى اياقتالدى. اپاتتى جاعدايلاردىڭ سانىن ازايتۋ ماقساتىندا جەلىلەردىڭ 100 شاقىرىمى سالىنىپ, 81 ءبولۋ پۋنكتى قايتا قالپىنا كەلتىرىلدى. بيىل 10 ترانسفورماتورلى شاعىن ستانسانى قالپىنا كەلتىرۋ جوسپارلانۋدا. سونداي-اق, «مىڭجىلدىق» اللەياسى اۋدانىندا 6 جاڭا تاراتۋ پۋنكتىنىڭ قۇرىلىس جۇمىستارى باستالاتىن بولادى» دەدى اسەت يسەكەشەۆ. بەلگىلى بولعانداي, «قازبەك» شاعىن ستانساسىنىڭ قۇرىلىسى جالعاسسا, «جۇلدىز» شاعىن ستانساسىن قايتا قالپىنا كەلتىرۋ جۇمىستارى باستالماق. اتالمىش نىساندار «تەمىرجولشىلار» جانە «مىڭجىلدىق» اللەياسى تۇرعىن ءۇي الاپتارىن ەلەكتر جارىعىمەن قامتاماسىز ەتۋ ءۇشىن كەرەك.
سونداي-اق, وتكەن جىلى ەلەكتر قۋاتىمەن قامتاماسىز ەتۋ قىزمەتىندە اپاتتى تۇردە اجىراتۋدىڭ 956 وقيعاسى تىركەلگەن. ولاردىڭ 166-سى «استانا-اەك» اق جەلىسى بويىنشا ورىن السا, 790 وقيعا جەكە قۇرىلىس كومپانيالارىنىڭ كەسىرىنەن بولعان. قالا باسشىسى ءار وقيعا ەگجەي-تەگجەيلى تەكسەرىلىپ, بىرقاتار لاۋازىمدى تۇلعالار قىزمەتىنەن بوساتىلعانىن مالىمدەدى.
گۇلميرا ايماعانبەت