Астанада Махамбет Өтемісұлы атындағы Оқушылар сарайында ұрпақтастар сабақтастығын көрсететін маңызды іс-шара өтті. Онда елорданың барлық 5 ауданынан еңбек ардагерлері, зейнеткерлер, балалар ұжымдары өнер көрсетті.
«Ұрпақтар сабақтастығы» жобасы аясында Астана қаласы Ардагерлер кеңесі және Астана қаласы әкімдігіне қарасты «Белсенді ұзақ өмір сүру орталығының» ұйымдастыруымен «Ардагерлер көктемі» атты көктем фестивалінде «Contrasst» би театры «Шашу» биімен сахнаның шымылдығын ашты. Есіл аудандық «Белсенді ұзақ өмір сүру орталығы» жанынан құрылған «Асыл мұра» домбыра ансамблі Құрманғазының күйі «Балбырауын» мен Әбдімомын Жолдыбаевтың «Ерке сылқым» күйін күмбірлетті.
Алматы аудандық Ермек Тұрлыбаев басқаратын халықтық «Елорда» ардагерлер хоры «Туған ел» әнін, «Арқа әуендері» ансамблі халық әні «Екі жирен» мен «Қызыл көйлек» әнін шырқады. Есіл аудандық халықтық «Есіл толқындары» ардагерлер ансамблі «Елім-ай», «Бөпем-ай» халық әндерін, композитор Илья Жақановтың «Еділ мен Жайық» әнін нақышына келтіре орындады. Сахнада «Ана» бейнесін Қазақстанның Өнер және мәдениет саласының үздігі Қарлығаш Құспанова сомдады.
Сарыарқа аудандық «Ветеран» қалалық орыс хоры «Погода разгулялась» орыс халық әні мен «Спасибо деду за победу» әнін орындаған кезде №27 орта мектебінің «Шаңырақ» би ұжымы өнер көрсетті.
Концертмейстер Жабай Қалиев пен Темреш Кереев дуэті орындаған «Полонез Огинского» әні, Ерғали Зәкәрияновтың жетекшілігіндегі «Бәйтерек» ансамблінің хоры орындаған «Алма бағында», «Бейбітшілік сақталады» атты әндері көрерменнің ерекше қошеметіне ие болды.
Сарыарқа аудандық «Сарыарқа» ардагерлер ұйымы жанынан құрылған «Сағыныш сазы» ұлттық вокалдық ансамблі «Шығыстың қос жұлдызы», Ескендір Хасанғалиевтің «Айналдым елім» әндерін тамылжыта орындады.
Есіл аудандық «Белсенді ұзақ өмір сүру орталығы» жанынан құрылған «Қазына» салт-дәстүрлерді дәріптеу ұжымы «Бозторғайым» әнін орындаса, Сарыарқа аудандық Ұлттық этно-мәдени «Әжелер шаңырақ» ансамблі, концермейстер Жабай Қалиев және «Қамажай» би тобы «Катюша, Смуглянка, Ах, самара, городок» атты әскери әндер папуриін орындағанда ардагерлер де, жастар да орындарынан тұрып биледі. Кеш «Атамекен» әнімен қорытындыланды.
