4-5 наурыз күндері елордада жалпықалалық сенбілік өтеді. Күн жылына бастағанда қыс бойы қолдарынан күрек түспеген коммуналдық қызметкерлердің жұмысы одан сайын күрделене түседі. Биыл елордада әдеттегіден тым көп түскен қардың еруі су басу қаупін күшейтетіні анық.
Бұл жағдайдың алдын алуға қала тұрғындарының да бейжай қарамағаны маңызды.
Осы мақсатта астаналықтарды асарлатып қар күреуге шақырған «Көктемгі Астана» атты жалпықалалық сенбілігі ұйымдастырылады.
Қала тұрғындарын ортақ іске ұйыстыратын шара ең алдымен су тасқынының алдын алуға бағытталып отыр. Бұл туралы елорда әкімдігінің баспасөз орталығында өткен жиында Коммуналдық шаруашылық басқармасының басшысы Нұрлан Солтамбеков пен «Астана Тазалық» ЖШС директоры Боранбай Болатбеков егжей-тегжейлі айтып берді.
Бұл сенбіліктің бұрынғыдан өзгешелігі – шаһар жұртының қыстан қалған қоқсықты жиып-сыпыруға ғана емес, күрелмей қалған күртік қарды тазалауға күш біріктіруі. Осылайша тұрғындардың тірлігімен коммуналдық қызметкерлердің біршама шаруасы түгесіліп қалмақ.
Сенбілік екі кезеңнен тұрады. Алдымен елордалықтардың қолғабыс етуімен аулалардың қары күреледі. Бұл шара екі күнге созылады. Одан кейін қалған шаруаны қаланың тазалықшылары өздері жайғастырады. Яғни, жиналған қар іргедегі полигондарға шығарылады.
Астана қаласының Коммуналдық шаруашылық басқармасының басшысы Нұрлан Солтамбековтің айтуынша, аталмыш іске 600-ге жуық жастар атсалысуға ниет білдіріп отыр. Олар жалғызілікті қарттардың, мүмкіндігі шектеулі жандардың, көмекке мұқтаж адамдардың үйіне барып, аулаларын тазалауға, жинап-реттеуге қол ұшын созады.
Елорда әкімдігінің тарапынан бұл шаруаға 180 арнаулы техника тартылады. Оның 30-ы аула ішіндегі қарларды жинауға жегілсе, 150-і қарды тиеп, қала сыртына шығарады.
«Астана Тазалық» мекемесінің басшысы Боранбай Болатбеков қыс басталғалы қалада 4,4 млн текше метр қар жиналғанын мәлімдеді. Бұл – қар күреу жұмыстарының өткен жылмен салыстырғанда еселене түскенінің айғағы. Былтыр бір қыста жалпы 2,5 млн текше метр қар шығарылған. Ал биыл жердің әлі ағарып жатқанын ескерсек, тазаланатын қардың ауқымы 5,5 млн текше метрге дейін жетуі ықтимал.
Жалпы қазіргі уақытта Астанада қар күреу шаруасына 353 техника мен 25 мердігерлік ұйым жұмылдырылған.
Бүгінде Астанада көктемгі су тасқынына қарсы шаралардың кешенді жоспары әзірленген. Қазір су басу қаупі бар 37 аймақ – бақылауда. Әсіресе, Көктал, Ильинка, Өндіріс, Железнодорожный, Пригородный, Оңтүстік-Шығыс, жаңа теміржол вокзалы, әуежай, газ аппаратурасының аймақтары айрықша қадағалануда.
Аулалар тазалығын тәртіпке келтірерде кәсіпорын нысандарының маңындағы қардың күрелуіне мән беріледі. Мәселен, Сарыарқа ауданының әкімдігі өткен аптада есік алдындағы қарын жинамағаны үшін 500-ге жуық кәсіпкерге ескерту берген. Оның біразына айыппұл белгіленіп, әкімшілік жазаға тартылған. Сондықтан бұл сенбіліктен қала тұрғындарымен қатар, шағын және орта бизнес өкілдерінің қалыс қалмағаны абзал.
Орынбек ӨТЕМҰРАТ
