БАЛАЛАР ҚУАНЫШҚА БӨЛЕНДІ
Астанадағы «Kz» қоғамдық қоры мен «Дельфинарий» орталығы бірлесіп, әлеуметтік жағынан аз қамтылған отбасылардан шыққан балаларға қайырымдылық шарасын өткізді.
Оның мақсаты – көп балалы отбасылар мен мүмкіндігі шектеулі жеткіншектерге қоғам назарын аударып, мүмкіндігінше қолдау көрсету.
Игілікті шараға бас қалада тұратын 300-ден аса балалар жиналды. Олар адамның ізгі досы саналған су жануарларын өз көзімен көріп, бір сағаттан астам түрлі қызыққа толы шоу тамашалап, мәз-мейрам қуанышқа бөленді.
–Біздің қоғамдық қор үнемі әлеуметтік жағынан мұқтаж отбасыларға қамқорлық көрсетіп келеді. Бүгінгі шара – соның бір жалғасы. «Дельфинарий» орталығы біздің айтқан ұсынысымызды жерге тастамай, 3 пен 14 жас аралығындағы үш жүз балаға тамаша кеш ұйымдастырды. Бұған мүмкіндігі шектеулі жасөспірімдер де келді. Енді орталық басшылығы осы балаларды айына бір рет тегін кіргізуге мүмкіндік жасап отыр. Оларға айтар алғысымыз шексіз, – дейді «Kz» қоғамдық қорының өкілі Меруерт Сәрсетова.
Азамат ЕСЕНЖОЛ