Балалар шығармашылығының бастауы
Елордада өткізіліп жатқан шаралардың көбісін «EXPO-2017» халықаралық көрмесімен байланыстырып жататынымыз жасырын емес. Бейбітшілік және келісім сарайында балалар мен жасөспірімдер арасында өткен «Шаттық-2017» шығармашылық байқауының гала-концерті де бұл үрдістен қалыс қалмады.
Осымен 11-рет байқау талантты жастарға есігін айқара ашты. Фестиваль елордамыздың жақсы дәстүріне айналды. Дәл осы байқау арқылы жас өнерпаздар бойындағы дарынын жалпақ жұртқа жария етіп, үлкен сахнаға жолдама алып жатыр.
Мерекелік кеште «Нұр Отан» партиясының Астана қалалық филиалы төрағасының орынбасары Еділ Мамытбеков қала әкімі Әсет Исекешевтің құттықтау сөзін жеткізді.
– Фестивальде жеңімпаз атанған жастарды шын жүректен құттықтаймын. Бұл жеңіс, ең алдымен, оқушылар мен олардың әке-шешелерінің, ұстаздарының еңбегі. Конкурс алдағы EXPO көрмесінің аясында өткізіліп жатқаны – біз үшін ерекше мәртебе. Біздің міндет – 25 жылда жеткен жетістіктерімізді паш
ету, қазақи қонақжайлық танытып, ұлтымызға тән қасиеттермен бөлісу. Бүгінгі шараға қатысып отырған жас дарындарымыз болашақта еліміздің туын биікке көтеретін азаматтар болатынына сенемін, – деді ол.
Иә, расымен де, «Шетелдік қонақтарды немен таңқалдырамыз?» деп дал болудың қажеті жоқ. «Шаттық» фестивалінің маңайында елордамыздың ең талантты өнерпаздары шоғырланған. Ұлттық ән, ұлттық киім, мың бұралған бишілер мен домбыраның құлағында ойнайтын қыз-жігіттер – осының бәрі – ұлттық колорит, ұлттық бренд. Сөзіме дәлел болсын, 2015 жылы Миланда өткен EXPO көрмесінде қазақстандық павильонға келушілердің қатары көп болды.
Оны шетелде жүрген қандастарымыз да, ел намысын қорғап, көрмеге атсалысқандар да айтқан еді.
Концерттік бағдарламада көрермен дүниежүзілік көрменің тарихымен танысты. Өнерпаздар EXPO көрмесі алғаш ұйымдастырылған Ұлыбританияға, оның ізін жалғаған Франция, АҚШ, Германия және басқа елдерге сапар шегіп, театрландырылған музыкалық қойылым қойды.
Фестивальдің биылғы бір ерекшелігі оның қазақ, орыс және ағылшын тілдерінде жүргізілуі болды.
11 жыл ішінде «Шаттық» шығармашылық қалалық байқауы астаналық білім беру ұйымдарының арасында басты жобаға айналды. Биыл байқауға 6000-нан астам өтінім келіп түсті, оның 4000-ға жуығы негізгі айналымға жолдама алды. Балалар мен жасөспірімдер музыка, хореография, фотосурет, театр, бейнелеу өнері, хор, вокал, соны жанрлары және киім дизайны бойынша өзара бәсекелесті.
Байқау қорытындысы бойынша жеңімпаздарға 32 алтын, 55 күміс және 79 қола статуэткалары салтанатты түрде табыс етілді.
Гүлдана ТАЛҒАТҚЫЗЫ