Отан қорғаушылар және Ұлы Жеңіс күніне орай елордадағы №28 «Жұлдыз» санаториялық балабақша бүлдіршіндері мерекелік ертеңгілік өткізді.
Шарада балақайлар майдан тақырыбына арналған өлең шумақтарын оқып, би биледі. Соғысқа аттанған әскерге, оларды шығарып салып, асыға күткен аналарға арнап ән шырқады.
Балабақшаның меңгерушісі Кенжетай Сағындыққызы Жамалиева сөз сөйлеп, жиналған қауымды мерекемен құттықтады.
– 9 мамыр – Жеңіс күнімен барлықтарыңызды шын жүректен құттықтаймын! Бұл күн тарих парақтарында үлкен әріптермен жазылған. Өз жанын аямай елімізді қорғаған, бейбіт күнге жеткізген ерлерімізге басымызды иеміз, – деді ол.Балабақшадағы бүлдіршіндер – соғысты көрмек түгіл, естімей өскен бейбіт күннің балалары. Сол себепті мерекелік концерт аясында жүргізушілер балаларға сұрапыл соғыстың жылдары туралы ақпарат беріп, құлақтандырып отырды.Балалар қойған сахналық көрініс сол жылдардың картинасын көз алдыға елестетті. Бүлдіршіндер тақпақ оқығанда, отырғандар көздеріне еріксіз жас алды. Қорыта айтқанда, қатысушылар аянып қалмай, бар өнерлерін ортаға салды. Кеш балақайлардың орындауындағы «Әрқашан күн сөнбесін» әнімен аяқталды. Концертте көрермен болған ата-аналар балаларды жастайынан отансүйгіштік пен ұлтжандылыққа баулып, тамаша кеш ұйымдастырған балабақша басшылығына алғыс білдірді.
