Астанадағы Есіл өзенінің бетіне Жаңа жыл қарсаңында маңайға жарық шашатын үлкен сағат орнатылды. Жарық диодтар түнде әдемі композицияны құрайтын сағат циферблатының диаметрі – 17 метр. Оның өзенде орналасуы конструкцияны ерекшелендіріп тұр.
Сағаттың айналасында қыста демалуға жайлы орын жасалған. Мұнда елорда тұрғындары мен қонақтарына арналып сырғанақтар мен 8000 шаршы метрді алып отырған үлкен мұз айдыны салынды. Сағат нақты механизммен жабдықталған және Жаңа жыл түні ол сол маңайда өтетін отшашудан белгі беретін болады.
Есіл өзенінде орнатылған бұл сағат әлемдегі ашық аспан астындағы ең үлкен сағат болып саналып, Гиннестің рекордтар кітабына енуі мүмкін. Манхэттендегі (Нью-Джерси штаты) Гудзон өзенінде орнатылған баршаға танымал Colgate сағатының диаметрі – 15,24 метр. Әзірге АҚШ-тағы бұл конструкция ең алып сағат болып саналады.
2017 жылдың қарсаңындағы Астана ертегілердегі әдемі кейіпке еніп отыр. Есілдің бетіне орнатылған үлкен сағат елорданың ажарын тіпті аша түсті. Өзен бойында серуендегенді жақсы көретін халық та сағаттың жарығы маңайды қараңғы түскенде де күндізгідей етіп отырғанын айтуда. Жалпы, бас қаланың Жаңа жыл алдында құлпырып шыға келуіне қалалық Мәдениет, мұрағаттар және құжаттама басқармасы үлкен еңбек сіңірді. Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің Астана қаласы бойынша департаменті тарапынан да бұл басқарманың еңбегі еленіп, «Астана қаласы бойынша кадр қызметінің жұмысын үздік ұйымдастыратын мемлекеттік мекемесі» аталымында жеңімпаз атанды.
