Астанада Өзбекстан Республикасының тұңғыш президенті Ислам Кәрімовтің құрметіне көше аты беріледі.
Осы жөніндегі Тілдерді дамыту басқармасының басшысы Тілеуғали Қышқашбаев ұсынған шешімді Астана қаласы Қоғамдық кеңесінің мүшелері бірауыздан қолдады.
Бұдан басқа, Сансызбай Есіловтің төрағалымен өткен Кеңес отырысында бірнеше нормативтік құқықтық актілердің жобалары талқыланды. Кеңес мүшелері Астана
қаласының көшелерін күтіп ұстау, ағымдағы орташа және күрделі жөндеу кезінде орындалатын жұмыс түрлерінің жіктелімін бекіту туралы ережемен танысты. Ол туралы баяндама жасаған Автомобиль жолдары басқармасының басшысы Асхат Қарағойшин талқыға салынып отырған жіктелімнің жол-жөндеу жұмыстарын жоспарлауға, жолдардың ішінара құрылысына, жол-жөндеу жұмыстары көлемдерінің негіздемесіне және олардың орындалуына жергілікті және республикалық бюджеттен бөлінетін қаржыландыру мөлшеріне қатысты мәселелерді шешуге негіз болатынын айтты. Кеңес мүшелері құжаттың маңыздылығын ескере отырып, тәуелсіз сараптаудан өткізуге кеңес беріп, құжатты кері қайтарды.
Елорданың денсаулық сақтау саласындағы мемлекеттік коммуналдық қазыналық кәсіпорындарындағы қызметтердің 2017 жылға арналған бағаларын белгілеу жөнінде Денсаулық сақтау басқармасының басшысы міндетін атқарушы Ильяс Бакиров баяндама жасады. Ол жұқпалы ауруларды емдейтін мекемелердегі ақылы қызметтің бағасын 4-10 пайыз аралығында көтеруді негіздегеннен кейін, Кеңес отырысында бұл қажеттілікті қолдау керек деген тоқтамға келді.
Айгүл УАЙСОВА
