Көмектің көлемі қанша?
![](https://astana-akshamy.kz/wp-content/uploads/2023/08/365584198_3713736298902777_2538723277561486175_n-780x470.jpg)
Биыл әр балаға мектеп формасы мен оқу құралдарын сатып алуға бөлінетін материалдық көмек сомасының ең төменгі мөлшері – 40 567 теңге болып белгіленді. Бұл туралы Оқу-ағарту вице-министрі Еділ Оспан мәлім етті.
«Өткен жылы біздің министрлік көпбалалы және аз қамтылған ата-аналардың талаптарын ескере отырып, мектеп қажеттілігіне қаражат аудару туралы Үкімет қаулысына өзгеріс енгізді. Оған сәйкес әр балаға мектеп формасы мен оқу құралдарын сатып алуға бөлінетін қаражаттың ең төменгі мөлшері – 40 567 теңге болып белгіленді. Естеріңізге сала кетейік, бұған дейін бөлінетін сома 17 мыңнан басталған еді» деді Еділ Оспан Орталық коммуникациялар қызметі алаңында өткен баспасөз мәслихатында.
Оның айтуынша, ата-аналарға баласына мектеп формасы мен оқу құралдарын алу кезінде таңдау беріледі. «Енгізілген өзгерістер ата-аналар мен балаларға мектеп формасын, аяқ киімді, кеңсе тауарларын, әрі жеткізушілерді өз бетінше таңдауға мүмкіндік береді. Сонымен қатар, аталған жаңашылдық балаларға бұрынғыдай сапасыз тауарлардың берілуіне жол бермейді» дейді министрдің орынбасары.