Күмәнді құрылыстың құрығына түсіп қалмаңыз
Сейсенбі күні Астана қаласы әкімінің бірінші орынбасары Сергей Хорошунның төрағалығымен көппәтерлі тұрғын үйлерге үлестік қатысу мәселелері жөніндегі ведомствоаралық комиссияның кезекті отырысы өтіп, онда нысандарды салу барысында заң бұзушылыққа жол берген 12 құрылыс компаниясының жайы талқыланды.
Елордада баспаналы болу – басты мәселе. Бірақ қалай да үйлі боламын деп, кез келген құрылыс компаниясына қаражат сала беруге болмайды. Әкімнің бірінші орынбасары Сергей Хорошунның айтуынша, бүгінде тұрғын үйге қатысты түйткілдің бірі – кейбір компаниялардың рұқсат құжаттары болмаса да пәтерлерді сатылымға шығаруы болып тұр.
Құрылыс саласы – елорда әкімдігінің ерекше назарында. Жергілікті билік әкімдік сайтындағы «Виртуалды қабылдау бөлмесі» мен «Халықтық бақылау» айдарларына келіп түскен тұрғындардың арыз-шағымына қарай құрылыстарды үнемі тексеріп, бақылап отырады. Бүгінде құрылыс салу барысында заңдылықты сақтамаған 41 нысан анықталып отыр. Тағы жеті нысанның құрылыс-монтаждау жұмыстарында кем-кетіктер мен өз еркімен басып алу деректері тіркелген.
Кезекті жиында осындай 12 құрылыс нысанының мәселесі қаралып, олардың өкілдерінен түсініктеме алынды.
Мемлекеттік сәулет-құрылыс бақылау басқармасы басшысының орынбасары Дәулет Досқұлов алдымен «АстанаДорИндустрия» ЖШС салып жатқан «Бейбарыс» тұрғын үй кешеніне тоқталды. «Бұл нысанды тұрғызу төрт кезеңге бөлінген. Құрылыс салушы нысанның бірінші кезегі бойынша эскиздік жобаны мақұлдаған, құрылысқа рұқсат құжаты бар және құрылыс-монтаждау жұмыстары басталған. Алайда, құрылысшылар нысанның екінші, үшінші кезегін ешқандай рұқсат құжаттарынсыз жүргізіп отыр. Бұған қоса, олар тиісті лицензияның жоқтығына қарамастан, үлескерлердің қаражатын тартып, пәтерлерді заңсыз сатумен айналысқан» деді басқарма басшысының орынбасары.
«SatConstructionGroup» ЖШС салып жатқан «Семейный» тұрғын үй кешенінің рұқсат құжаттарының қатарында эскиздік жобаның келісімі мен жұмыс жобасының мемлекеттік сараптамасы бар, ал құрылыс салуға рұқсат әзірше нысанның қаңқасын тұрғызуға ғана беріліпті. Қалған құжаттары түгел емес.
Ал Сығанақ пен Ш.Бейсекова көшелерінің қиылысында орналасқан «Көркем Тауэр» тұрғын үй кешенінің (Құрылыс салушы – IndustrialInnovationGroup» ЖШС) құжаттарында эскиздік жоба келісімі, жұмыс жобасының мемлекеттік сараптамасы болғанымен, барлық нысанды салуға берілетін рұқсат құжаты болмай шықққан.
Бұдан өзге, заңды белден басып, тиісті құжаттары түгел болмаса да жарнамасын жариялап, пәтерлерді сатып келген мынадай құрылыс нысандарының аты белгілі болды:
«Елімай» ТК («ОтауСити» ТҚК), «Тұран кварталы» (ТОО «Қазстрой Т-И-А»), №199 бен С304 көшелерінің қиылысында орналасқан тұрғын үй кешені (құрылыс иесі – «Агропромгражстрой»), «ЭкоДом» ТК («НҰР НҰР» ТҚК),»Зере – 2» ТК («Алтын Сапа 2011» ЖШС), «Лея+» пен ТК «Лея Сарыбұлақ» («BestRealEstate» ЖШС), «Лазурный берег» ТК («Симург 2000» ЖШС) және Сығанақ көшесінің оңтүстік бөлігінде, Тұран даңғылының батысында жобаланған көппәтерлі тұрғын үй кешені, құрылыс салушысы – Литвак Григорий Борисович.
Аталған нысандардың құжаттары толық емес, әрқайсысында шикіліктер бар. Соған қарамастан құрылыс салушылар пәтерлерді саудаға шығарып келген.
Астана әкімінің бірінші орынбасары Сергей Хорошун қала тұрғындарын қаражатын үйге саларда күмәнді компаниялардан аулақ болуға шақырды. Алдымен құрылыс компаниясының құжаттарын сұрастырып, тиісті рұқсат қағаздарын түгел тексеріп алғаны жөн немесе әкімдікке, оған қарасты тиісті басқармалардың көмегіне жүгінуге болады. Мұндай ақпаратты білгісі келген тұрғындар Астана қаласы әкімдігінің www.astana.gov.kz сайтын қарауға немесе Сәулет және қала құрылысы басқармасы мен Мемлекеттік сәулет-құрылыс бақылау басқармасына хабарласуға болады. Олар сұрау жіберілген құрылыс нысаны туралы толыққанды мәлімет беруге әрқашан дайын.
Қымбат ТОҚТАМҰРАТ
Материалды “Астана ақшамы” газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.