Qazaqta «Jaqsynyŋ jaqsylyǧyn ait, nūry tasysyn» degen taǧylymdy söz bar. Osy sözdı bügıngı keiıpkerım, aqmolalyq abyroily azamat Zeinolla RAHYMŪLYNA qaratyp aitsam artyq ketkenım emes.
Ötken ǧasyrdyŋ 80-jyldarynyŋ basy. Sıletı audanyq partiia komitetınde ıstep jürgen kezım. Bırde kabinetıme boiyna aqşyl sūr kostiumı jarasqan, orta boily aqqūba jıgıt kırıp keldı. Janynda ūiymdastyru bölımınıŋ meŋgeruşısı Vladimir Marchenko bar.
– Menıŋ ärıptesım – oblystyq partiia komitetınıŋ nūsqauşysy Zeinolla Rahymūly Şibkenov, – dep tanystyrdy älgı jıgıttı Vladimir İvanovich.
Sodan Zeinolla ınımmen bırden ana tılımızde söilep kettık. Qazaqşasy öte jaqsy, būl kısıden būryn kelıp jürgender resmi tılde söilesuge tyrysatyn. Qazaqi dästürmen bır-bırımızben jaqyn tanysa bastadyq. Zeinolla Rahymūly qaimaǧy būzylmaǧan, täuırlerdıŋ şyqqan jerı – Jaŋaarqa öŋırınde tuyp, Ombynyŋ temırjol institutyn bıtırıp, joldamamen Aqmola temırjol basqarmasyna qyzmetke kelıp, osy qalada tūraqtap qalypty.
Joldama degennen şyǧady, sözdıŋ retı kelgende aityp keteiın. Keŋes däuırınde «jūmyssyzdyq» degen termin bolmaityn. Ol kezde eŋbek etpegenge şara qoldanylatyn. Qazır bırneşe diplomy barlar jūmys tappai, keibıreulerı otbasyn asyrau üşın bazarda arba süirep jür. Ärine, būl naryqtyŋ zaŋy şyǧar, sonda da jüielı, josparly türde jūmys jürgızılse, jūmyssyzdyqtan tolyq aiyrylmasaq ta, körsetkıştı tömendetuge bolar edı dep oilaimyn. Taiauda «Astana aqşamy» gazetınde jalǧan statistika turaly maqalany oqydym. Şyndyǧynda da, statistikanyŋ körsetken sifrynan jūmyssyzdar sany äldeqaida joǧary.
Zeinolla Rahymūly kurator retınde audanǧa jiı kelıp jürdı. Tıptı jyly jaqyndasyp, eskı tanystai bolyp kettık. Qyzmetke kelgennen keiın osynda ereimentaulyq arumen otbasyn qūryp, balaly-şaǧaly boldy. Qazaqşa aitqanda, Aqmola oblysyna küieu bala bolypty. Temırjol salasynda jürgende kommunistık partiianyŋ qataryna ötıp, qoǧamdyq jūmysqa belsene aralasa bastaidy. Osyny baiqaǧan Selinograd qalalyq partiia komitetı qyzmetke şaqyrypty. Selinograd qalasy toǧyz joldyŋ torabynda, tört jaqqa şyǧatyn temırjol baǧyty osy qalada tüiısken.
Ol kezde halyqtyŋ negızgı kölıgı de poiyz, halyq şaruaşylyǧy öndırısınıŋ jükterın tasityn da poiyz boldy. Qalalyq partiia komitetınıŋ Zeinolla Rahymūly ıstegen bölımı negızgı bölımderdıŋ bırı-tūǧyn. Osy jūmysta tıs qaǧyp, täjıribe jinaǧan jäne zor jauapkerşılıkpen atqarǧanyn baiqaǧan oblystyq partiia komitetı ony özderınıŋ apparatyna alady. Mūnda ūiymdastyru bölımınıŋ nūsqauşysy qyzmetın atqarady. Osylai eŋbek etıp jürgenınde, 90-jyldardyŋ basynda kommunistık partiia ydyrap, keŋes ökımetı qūlap, barlyq respublika egemendıkke qol jetkızdı. Egemendı elımızde qiyn jyldar bastalady. Osy kezde Qazaqstannyŋ azamaty, onymen qosa täjıribelı qyzmetker retınde halyq şaruaşylyǧyn jandandyru üşın Zeinolla Rahymūly ärtürlı jauapty qyzmet atqardy.
Özımen qyzmettes bolǧan Sansyzbai Esılov ärıptesı jaily bylai deidı: «Zeken jūmysqa öte ūqypty edı. Tapsyrylǧan şaruany bılgırlıkpen oryndauǧa tyrysatyn. Soŋǧy uaqytta qalalyq Qoǧamdyq keŋestıŋ müşesı boldy. Mūnda da būl kısınıŋ belsendılıgın baiqadyq. Halyq şaruaşylyǧyna eŋ qajettılerdıŋ bırı vagondar boldy. Osy «Vagon jöndeu zauytynyŋ» qalypqa kelıp, önımınıŋ artuyna zor ülesın qosty. Osy zauyttyŋ bas direktory qyzmetın atqardy. Zeinetker retınde qalalyq Ardagerler keŋesınıŋ jūmysyna da belsene aralasyp jür».
Al qalalyq Ardagerler keŋesı töraǧasynyŋ orynbasary Satybaldy Jūmaǧatov bolsa «Özımnıŋ baiqauymşa, öte kışıpeiıl, qarapaiym azamat. Kezdeskende adamdy özıne tartyp tūrady. Eŋbegınıŋ jemısı – «Parasat», «Qūrmet» ordenderı, «Qazaqstannyŋ qūrmettı temırjolşysy» belgısı» deidı.
Kezınde Şerhan Mūrtaza «jetpıs» degen söz jettım, pıstım degen maǧynany beredı dep aitypty. Olai bolsa bız de jetpıs jasyna jetıp otyrǧan Zeinolla Şibkenovtıŋ qoǧam üşın älı de bererı köp bolatynyna senımmen qaraimyz.
Estuımşe, Zeinolla bauyrym eptep syrqattanyp jürgen körınedı. Tezırek aiyǧyp, jazylyp, qatarymyzǧa qosyluyŋyzǧa tılektespız. Jetpıstıŋ jotasyna şyqtyŋyz, endı seksennıŋ seŋgırıne, toqsannyŋ törıne şyǧyŋyz demekpın!
Erkın DÄUEŞŪLY, Qazaqstan Jurnalister odaǧynyŋ müşesı, Astana qalasy Ardagerler keŋesı mediatobynyŋ müşesı
