«Qazaqkonsert» memlekettık konserttık ūiymynyŋ «Halyq qazynasy» ūlttyq öner ortalyǧy «Ūlylarǧa taǧzym» jobasy aiasynda Aqan serı Qoramsaūlynyŋ 180 jyldyǧyna arnalǧan ruhani öner keşın ötkızdı.
Bır boiyna bırneşe önerdı toǧystyrǧan Aqan serı küresker aqyn, änşı, kompozitor boldy. «Jıgıtke jetı öner de az» degendei, bırneşe tıldı bılıp, saiatşylyqpen ainalysty, it jügırtıp, qūs saldy, jüirık baptady. Aqannyŋ jūmbaq ta näzık jan düniesın aşu üşın konsert teatrlandyrylǧan qoiylymmen aşylyp, jabyldy. Änşı, akter, Qazaqstannyŋ eŋbek sıŋırgen qairatkerı Qūmarbek Qalqatai serını somdap, «Kökşetaudyŋ biıgı» änın äuelettı.
Önertanuşylar Aqannyŋ artynda eluge juyq än qalǧanyn aitady. Osy konsertte on beske tarta tuyndysy oryndaldy. Keştı jürgızgen öner ortalyǧynyŋ jetekşısı Jasūlan Nauryzbaiūly arasynda änderdıŋ tarihy turaly aita otyryp, halyq kompozitorynyŋ ömırınen mälımetterdı keltırdı. Mäselen, el auzynda süiıktı tūlpary Qūlagerdı Batyraş-
Qotyraş deitın bailar öltırdı dep aitylady. Jyr jüirıgı Iliias Jansügırovtıŋ «Qūlager» poemasynda, kinorejisser Bolat Mansūrovtyŋ osy attas filmınde de sondai derek berılgen. Al körnektı kompozitor, önertanuşy İlia Jaqanov būl jaŋsaq pıkır ekenın, Qūlagerdı mert qylǧan Aqanmen qastasqan Baraqbai dep jazady. Öz zamanynda örşıl aqyn Maǧjan Jūmabaev ta Qūlagerdıŋ qany Baraqbaidyŋ moinynda ekenın jazyp ketken eken. Bıraq «halyq jauy» atanǧan Maǧjannyŋ şyǧarmalaryn oquǧa tyiym salynǧandyqtan, bertınge deiın būl pıkırı belgısız bolyp keldı.
Jalpy sūlulyqqa jany qūştar Aqannyŋ şyǧarmaşylyǧynda arular, qyran qūstary men tūlparlaryna arnalǧan änder erek oryn alady. Būl tarapta «Qūlagermen» qatar «Maŋmaŋger», «Qaratorǧai», «Balqadişa», «Läilım şyraq», «Aqtoqtynyŋ aujary», «Jamal qyz» syndy änderın aituǧa bolady. Al «Maida qoŋyr» änı – dostyqqa qoiylǧan eskertkış ıspettı tuyndy. Körermender osy ändermen qatar «Şyrmauyq», «Syrymbet», «Altybasar», «Kök köbelek», «Toryny taŋ asyryp mıngen qandai» şyǧarmalaryna qūlaq qūryşyn qandyrdy. Būl änderdı Medet Salyqov, Klara Tölenbaeva, Dınislambek Jailaubai, Asqar Mūqiiat, Perizat Tūrarova, Erbolat Şaldybekov, Nūrbolat Arzamasūly, Jasūlan Nauryzbaiūly, Aiaulym Qamajan, Bırjan Aitahmet naqyşyna keltırıp saldy. Däulesker küişı, ūstaz, Qazaqstannyŋ eŋbek sıŋırgen qairatkerı Janǧali Jüzbai öner tarihynda jalǧyz «Qosbasar» küiımen qalǧan İtaiaqtyŋ osy küiın şerttı.
«Halyq qazynasy» ūlttyq öner ortalyǧynyŋ bır maqsaty – qazaqtyŋ ūlttyq aspaptaryn nasihattau. Keşte daryndy muzykant Venera Tabys jetıgendı syzyltty. Konsert soŋynda «Ardagerler ūiymy» respublikalyq qoǧamdyq bırlestıgı ortalyq keŋesı töraǧasynyŋ bırınşı orynbasary Ömırzaq Ozǧanbaev körermender atynan alǧys aitty.
