Prezident Q.Toqaevtyŋ tarapynan elordanyŋ damuy men örkendeuıne qatysty bırqatar mındetter men tapsyrmalar berıldı. Osy mındetter men tapsyrmalar jüzege asyrylsa, elorda tūrǧyndarynyŋ ömır süru sapasy arta tüsedı. Memleket basşysynyŋ töraǧalyǧymen ötken elımızdıŋ äleumettık-ekonomikalyq damu mäselelerı jönındegı keŋeste bas qalany damytudaǧy negızgı baǧyttar turaly baiandadym. Solardyŋ keibırıne qysqaşa toqtalyp öteiın.
Bırınşı. Tırşılıktı qamtamasyz etu nysandary turaly.
Biyl bırqatar maŋyzdy infraqūrylymdyq jobalardyŋ qūrylysyn aiaqtap, ıske qosudy josparlap otyrmyz. Olar: №3 su sorǧyş stansiia, №3 jylu-elektr ortalyǧy, ekı gaz jylu stansiiasy. Olar qalany qosymşa kölemde sumen jäne jylumen qamtamasyz etuge mümkındık beredı.
Sondai-aq sumen tūraqty qamtamasyz etu üşın Nūra jerasty su qūbyrynyŋ qūrylysy men Telman sorǧy stansiiasyn keŋeitu boiynşa jobalardy jüzege asyrudy bastaimyz. Sonymen qatar Sätbaev atyndaǧy kanaldan su aludy közdeitın törtınşı sorǧy-süzgı stansiiasyn jobalaudy josparlap otyrmyz.
Ekınşı. Äleumettık nysandar qūrylysy turaly.
Ekı jylda 40 mektep saludy josparlap otyrmyz. Onyŋ ışınde qazırgı künı jergılıktı biudjet esebınen – 16,5 myŋ orynǧa arnalǧan 11 mektep, jeke investisiia esebınen 4 mektep salynady. Sondai-aq biyl «Jaily mektep» jobasy boiynşa 90 myŋ orynǧa arnalǧan (ekı auysymdy) 24 mekteptıŋ qūrylysyn bastaimyz. Būl oquşy oryndary tapşylyǧy mäselesın tolyǧymen şeşuge mümkındık beredı.
Ekı jyl ışınde memlekettık-jeke ärıptestık qaǧidatyna säikes jeke investisiialar esebınen 30 balabaqşa salynady. Sondai-aq jyl saiyn jeke balabaqşalarǧa ornalastyru üşın memlekettık tapsyrys bölemız.
Sapaly medisinalyq kömek körsetuge qatysty bırqatar ıs-şara atqaryluda. Densaulyq saqtau ministrlıgımen bırlesıp, 12 jobany jüzege asyryp jatyrmyz: 2 perinataldy ortalyq pen tūrǧyndarǧa qoljetımdı 8 ambulatorlyq keşen, medisinalyq jäne oŋaltu ortalyqtary.
Üşınşı. Apatty üilerdı būzu, qūrylysy ūzaqqa sozylǧan nysandardy aiaqtau turaly.
Osy jyldyŋ nauryzynda qalalyq jaŋǧyrtu baǧdarlamasynyŋ merzımı 2030 jylǧa deiın ūzartyldy. Sonyŋ nätijesınde 206 apatty üidıŋ tūrǧyndaryn köşıru josparlanyp otyr. Sonymen qatar biyl 6 myŋǧa juyq äleumettık päter saludy, qūrylysy ūzaqqa sozylǧan nysandardy (30-dan astam tūrǧyn üi keşenı) aiaqtaudy josparlap otyrmyz.
Törtınşı. Jūmys oryndaryn aşu
Biyl biznestıŋ, äkımdıktıŋ jäne bılım beru instituttarynyŋ tyǧyz yntymaqtastyǧy arqyly 60 myŋnan astam jaŋa jūmys ornyn aşudy josparlap otyrmyz. Negızgı jūmys oryndary şaǧyn jäne orta biznes salasynda qūrylyp jatyr, onda qazır elordanyŋ ekonomikalyq belsendı tūrǧyndarynyŋ 70%-y eŋbek etedı.
Sonymen bırge ŞOB üşın jaǧdai jasaudy, qala ekonomikasyna jeke investisiialar tartudy ärı qarai da jalǧastyramyz. Elordada 154 investisiialyq joba puly qūryldy. Biyl 25 käsıporyn ıske qosylady dep kütılıp otyr.
Besınşı. Abattandyru
Biyl bır millionǧa juyq jasyl jelek otyrǧyzudy josparlap otyrmyz. Būl qalany jappai kögaldandyruǧa; qaladaǧy saiabaqtar men gülzarlardy qaita qūruǧa jäne jöndeuge, aulalar men qoǧamdyq oryndardy abattandyruǧa, 70-ten astam köşenı jöndeuge jäne t. b. mümkındık beredı.
Jeŋıs QASYMBEK,
Astana
qalasynyŋ äkımı
