Juyrda «Astana Opera» teatrynda tyŋdarman qauym nazaryna Ǧ.Müsırepovtıŋ librettosyna qoiylǧan E.Brusilovskiidıŋ ūlttyq opera marjany – «Qyz Jıbek» operasy ūsynyldy. Spektakl körnektı mädeniet qairatkerlerınıŋ atauly mereitoilyq datalaryna – T.Jürgenovtıŋ 125 jyldyǧy men J.Şaninnıŋ 130 jyldyǧyna orailastyryldy.
– Bız opera jauharyn oryndaudy qazaq önerınıŋ damuyna zor yqpal etıp, 1934 jyly «Qyz Jıbektıŋ» alǧaşqy qoiylymyn jüzege asyruǧa zor üles qosqan belgılı tūlǧalarǧa arnadyq. Osy qoiylymmen operany jazuǧa bastama jasaǧan Temırbek Jürgenov jäne Qūrmanbek Jandarbekovpen qatar qoiuşy rejisser retınde qatysqan Jūmat Şaninge degen qūrmetımızdı bıldıremız. Sonymen qatar bızdıŋ teatrdaǧy atalmyş spektaklder jarqyn vokalisterdıŋ maŋyzdy debiutterımen atalyp ötkenın aita ketken jön: qoiylymnyŋ bırınşı künı Tölegennıŋ partiiasymen sahnaǧa alǧaş ret Astana Opera Halyqaralyq opera akademiiasynyŋ tyŋdauşysy Talǧat Allabırınov şyqsa, kelesı künı Qarlyǧaş beinesınde teatr solisı Elena Ganja öz debiutın jasady, – dedı spektakldıŋ dirijerı Ruslan Baimurzin.
«Astana Opera» solisı Elena Ganja osy operada Düriia beinesınde bırneşe ret sahnaǧa şyqqan, al qazır Qarlyǧaş obrazyn jarqyrata tanytty.
– Maǧan keiıpkerım öte qatty ūnady, sondyqtan menıŋ köpten berı osy partiiany oryndap, Qarlyǧaştyŋ Tölegenge degen qaryndastyq ystyq yqylasyn, aǧasyn qalai qoldaitynyn, kömektesetındıgın, bauyryna baǧyt berıp, kerek kezınde sabyrǧa şaqyratyndyǧyn körsetkım keldı. Sondai-aq būl jerde muzykalyq tūrǧydan aşylyp, dauystyŋ sūlulyǧyn körsetuge mümkındık beretın tamaşa äuendı keremet ariia bar. Dybystaludy mınsız jetkızu üşın aitylu boiynşa köp eŋbektı qajet etetın jūmys jürgızıldı, – deidı Elena Ganja.
– Sahnaǧa jaŋa partiiany alyp şyǧu – būl ärdaiym tolqynys, öz keiıpkerıŋnıŋ qyrlaryn barynşa aşuǧa, keipıne enıp, keiıpkerdı barlyq basqa interpretasiiaǧa ūqsamaityn jaŋa jaǧynan körsetuge degen ūmtylys, özındık bır dünie qosu. Baqytyma orai, partiia menıŋ bolmysyma «qūiyp qoiǧan köilektei» dälme-däl keldı. Ärine, ärbır jaŋa partiia ärqaşan ösu bolyp tabylady. Bız özımızdıŋ şyǧarmaşylyq jolymyzda üzdık boluǧa, jetıluge, şeberlıktıŋ tyŋ qyrlaryn aşuǧa tyrysamyz, – dep sözın jalǧady solist.
Bolaşaǧynan zor ümıt küttıretın jas tenor Talǧat Allabırınov üşın Tölegennıŋ partiiasyn oryndau ülken sahnadaǧy alǧaşqy basty rölı boldy.
– Men būl kündı taǧatsyzdana ärı şabyttana küttım desem bolady, bärı joǧary deŋgeide ötedı dep ümıttendım jäne sendım, sebebı alǧaş ret bas partiiany oryndau menıŋ ärtıstık jolymdaǧy maŋyzdy paraqşa ǧoi. Dostarym, ärıptesterım solister, hor, orkestr, dirijer – barlyǧy da zor demeu körsettı, osynyŋ özı menı jıgerlendırdı. Özıŋnıŋ alǧaşqy bas partiiaŋdy qalai oryndap şyqsaŋ, keiıngı ärtıstık jolyŋ da solaişa qalyptasady, öner bılgırlerı, körermender men ärıptester de solaişa qabyldaidy degen senımdılık bar, sol sebeptı jaqsy äser qaldyryp, abyroimen oryndap şyǧu negızgı maqsat boldy, – dep oi bölıstı Talǧat Allabırınov.
Elorda törındegı «Qyz Jıbek» astanalyqtar men qala qonaqtaryna airyqşa merekelık köŋıl-küi syilady.
