Erkeǧali Rahmadiev atyndaǧy Memlekettık akademiialyq filarmoniia sahnasynda Qazaqstan men Tatarstannyŋ Halyq ärtısı, Memlekettık syilyqtyŋ laureaty Nūrjamal Üsenbaevanyŋ şyǧarmaşylyq keşı öttı. «Elıme taǧzym» konsertı Qazaqstan Respublikasynyŋ Memlekettık rämızder künıne, ūstazy Beken Jylysbaevtyŋ 100 jyldyǧyna arnaldy. Keşte Nūrjamal Üsenbaeva özınıŋ bai, är aluan repertuaryn körermenge paş ettı.
«Elıme taǧzym» konsertı Tatarstannyŋ Halyq ärtısı, Qazaqstannyŋ eŋbek sıŋırgen qairatkerı, Qūrmanǧazy atyndaǧy Ūlttyq konservatoriianyŋ qūrmettı professory, şaqyrylǧan maestro Renat Salavatovtyŋ jetekşılıgımen, filarmoniianyŋ simfoniialyq orkestrınıŋ süiemeldeuımen ūiymdastyryldy.
Elorda jäne qala qonaqtaryn taŋǧaldyrǧan tamaşa konsertte elorda filarmoniiasynyŋ kameralyq hory öner körsettı. Astana sahnasynda älemdık jäne otandyq operanyŋ maitalmandary, öner jūldyzdary än şyrqap, Memlekettık rämızder künınıŋ körıgın qyzdyra tüstı.
Nūrjamal Üsenbaevanyŋ oryndauyndaǧy Mūqan Tölebaevtyŋ «Baqyt valsı», A.Jūbanov pen L.Hamididıŋ «Abai» operasynan Ajar ariiasy – qazaq ūlttyq operasynyŋ jauharyna ainalǧan tuyndylar.
Nūrjamal Üsenbaeva – elımızdıŋ ūlttyq opera önerınıŋ bolaşaǧyna talmai eŋbek etken erek öner iesı. Osy benefisınde ol M.Tölebaevtyŋ «Bırjan men Sara» operasynan äigılı «Aitysty» änşı, konserttıŋ arnaiy qonaǧy, Qazaqstannyŋ eŋbek sıŋırgen qairatkerı tenor dauysty Medet Şotabaevpen duette şyrqap, körermennıŋ zor yqylasyna ie boldy, zal toly halyq şeber oryndalǧan keremet duettı du qol şapalaqpen qūrmettep otyrdy. Joǧary märtebelı muzyka saltanat qūrǧan keş älemdık jäne qazaq opera maestrolarynyŋ önerın, ölşeusız eŋbegın taǧy bır jarqyratyp körsettı. Zalda ine şanşar oryn qalmai, keş qonaqtary, körermender muzykanttardy gülmen kömkerıp, şeksız alǧysyn bıldırdı. Konsert anşlagpen öttı.
«Muzykada şekara joq» degendei, cheh opera änşısı, Europa öner odaǧynyŋ körkemdık jäne mädeni qyzmet salasyndaǧy eŋ joǧary marapaty – «Altyn Europa» (Golden Europea) iegerı Filip Bandjak salǧan äuen adamzat tudyrǧan tamaşa opera tuyndylarynyŋ ǧūmyry ūzaq bolaryn taǧy bır däleldedı, maestronyŋ elorda sahnasynda öner körsetuı astanalyqtardyŋ biık talǧamyn, myqty taŋdauyn körsettı, erekşe äser ettı.
Būl konsertte airyqşa duet astanalyqtardy dür sılkındırdı. Nūrjamal Üsenbaevamen bırge Özbekstan memlekettık konservatoriiasy muzykalyq teatrynyŋ solisı, Özbekstan, Qaraqalpaqstan jäne Başqūrtstan Respublikalarynyŋ Halyq ärtısı Jeŋısbek Piiazov T.Mūhamedjanovtyŋ «Men senımen kezdestım» şyǧarmasyn oryndady.
Özbekstanda tūratyn qandasymyz Jeŋısbek Piiazovtyŋ özbek basşysy Şavkat Mirziioevtıŋ qolynan «Halyq ärtısı» ataǧyn alǧany belgılı. 33 jasynda būl ataqqa laiyq dep tanylǧan Jeŋısbek – älemge äigılı «La Skala» teatrynyŋ sahnasynda än şyrqaǧan tūŋǧyş özbekstandyq änşı. Önerlı otbasynan şyqqan Jeŋısbektı köpşılık student kezınen-aq «Halyq ärtısı» dep atap ketken eken. Jeŋısbek būl joly qazaqstandyq maestrolarmen bırge elorda sahnasyna şyǧyp, keştı qyzdyra tüstı. Jeŋısbekpen bolǧan sūhbatymyzdy gazetımızdıŋ aldaǧy sanynan oqi alasyzdar.
Elge önerımen taǧzym etken Nūrjamal Üsenbaeva men keştıŋ qūrmettı qonaqtary, änşıler, muzykanttar Dj.Rossinidıŋ «Sevil şaştarazy» operasynan Figaro ariiasy, Bernard Herrmannyŋ «Citizen Kane» operasynan Salambo ariiasy, Dj.Puchchinidıŋ «Turandot» operasynan Kalafa ariiasy, V.Herberttıŋ «The Enchantress», Manuel Ponsenıŋ «Estrellita», Agustin Laranyŋ «Granada» ariiasy, D.Modunonyŋ «Volare» sekıldı opera önerınıŋ keremet tuyndylaryn körermenderge ūsyndy.
Konserttıŋ soŋynda barlyq oryndauşy bırlesıp oryndaǧan T.Mūhamedjanovtyŋ «Otan» şyǧarmasy şyrqalǧan sätte körermender oryndarynan tūryp, märtebelı muzyka ielerıne zor qūrmet körsettı.
