Qazaqstan-Soltüstık İrlandiia futbol matchynan keiın elordanyŋ erıktı jastary stadiondy jinauǧa kömektestı. Elımızde erıktıler qozǧalysyna erekşe män berıledı. Halyqaralyq volonterler forumynyŋ Astanada ötkenı de sonyŋ bır aiǧaǧy. Sol jiynda Memleket basşysy Qasym-Jomart Toqaev soŋǧy üş jylda elımızde erıktıler sany üş esege köbeigenın atap ötken edı. Astanada «Volonterlıktı damytudyŋ Jol kartasy» qabyldanǧan. 30-ǧa juyq ūiym belsendı jūmys jürgızedı.
Älemnıŋ 34 elınıŋ belsendı volonterlerı alǧaş ret elordadaǧy Halyqaralyq volonterler forumynda bas qosqan edı. Jiynda söz söilegen Memleket basşysy Qasym-Jomart Toqaev soŋǧy üş jylda elımızde erıktıler sany üş ese köbeigenın aitty. Bügınde respublika boiynşa 680-ge juyq volonterlık ūiym jäne 200 myŋnan asa erıktı bar.
Türkıstan qalasynda ötken Ūlttyq qūryltaida da Prezident volonterlık qozǧalystyŋ otanşyldyq ruhty köterudegı maŋyzyn airyqşa atap: «Men erıktıler turaly ünemı aityp jürmın. Sebebı erıktıler – eŋ aldymen, patriot jandar. Olar elımızdıŋ damuyna, onyŋ kelbetın jaqsartuǧa zor üles qosyp jatyr. Bız bükıl qoǧam bolyp erıktılerdı qoldauymyz kerek, olardyŋ eŋbegın baǧalap, marapattap otyru qajet» dedı.
Qazaqta būrynnan asar jasap, eş aqysyz bır-bırıne kömektesıp, qoldau körsetu dästürı bügıngı volonterlıkpen ündesetını sözsız. Künı keşe ǧana elordada ötken Qazaqstan men Soltüstık İrlandiianyŋ oiynynan keiın «Astana Arena» stadionynda bötelke, plastik, türlı qaǧazdy qaldyrǧan körermen az bolǧan joq. Al sol qoqysty tazalap, janküierlerdı tazalyqqa şaqyrǧan elordalyq erıktıler boldy. «Astana jastary» erıktılerınıŋ būl ısın Prezident airyqşa atap ötıp, alǧysyn bıldırgenı bar. İä, jan düniesınıŋ qalauymen jaqsy ıske jūmylǧan jastar jüzdep sanalady. Bas qalada qazır 30-ǧa juyq erıktıler qozǧalysy bar. Olarǧa 40 myŋnan asa adam belsendı türde qatysady. «Astana jastary» resurstyq ortalyǧy volonter qozǧalysyn damytu bölımınıŋ basşysy Elvira Esmūhanovanyŋ sözınşe, ortalyq bazasynda Volonterler jyly aiasynda jäne 2021-2023 jyldary volonterlıktı damytudyŋ «Jol kartasyn» oryndau şeŋberınde Qalalyq volonterler ştaby jūmys ısteidı. Tūraqty türde 30 volonterlık ūiymmen jäne 20 bastamaşyl toppen, 4 ÜEŪ-men bırlese qyzmet atqaruda. Ştabta 5 myŋnan asa belsendı volonter bar.
Jastardyŋ belsendılıgı baiqalady
«Erıktı bolǧysy keletınder sany artyp keledı. Äsırese jasöspırımder tarapynan qyzyǧuşylyq erekşe baiqalady. Bırı şyn peiılımen özgelerge kömekteskısı keledı, endı bırı jaŋa orta tabuǧa ūmtylady, uaqytyn tiımdı ötkızgısı keledı. Jastar event-volonterlık, äleumettık volonterlık, eco-volonterlık jäne adamdardy ızdeu sekıldı bırneşe baǧytta jūmyldyrylady. Dälırek aitqanda, event baǧyty halyqaralyq deŋgeidegı jiyndarǧa arnalsa, keiıngısınde jastar äleumettık maŋyzy bar bastamalarda qyzmet etedı. Al eco bölımınıŋ erıktılerıne tabiǧatty aialap, qorşaǧan ortany qorǧau mındetı tapsyrylady. Iz-tüssız joǧalǧan jandardy da tabuǧa kömektesedı» dedı E.Esmūhanova.
Atalmyş ortalyq biyl volonterlermen bırge 1000-nan asa ıs-şara ötkızdı. Dziudodan Aziia chempionaty, «Kazakhstan Security System» forumy, «Eurasian Book Fair», Nauryz «Ekspo» siiaqty halyqaralyq auqymdaǧy ıs-şaralarǧa ünemı qatysady. Sondai-aq Polisiia departamentı, TJD-men bırlesıp gazdandyru turaly halyqty aqparattandyru, jylytu mausymy men köktemgı su tasqyny kezındegı qauıpsızdık şaralary, şomylu mausymyndaǧy mınez-qūlyq erejelerı, halyq sanaǧy mäselesı boiynşa halyqqa aqparattyq-tüsındıru jūmystaryn tūraqty negızde jürgızedı jäne esırtkı satu turaly mälımetterı bar qabyrǧalardy boiauǧa kömektesedı.
«Mäselen, «Adresa zaboty» jobasy aiasynda «Astana jastary» volonterlerı jalǧyzbasty 40 zeinetkerdıŋ jeke aulasyn tazalauǧa qol ūşyn sozdy. Käsıporyndar men volonterlık ūiymdar qar tazalau boiynşa 20 aksiia ūiymdastyrdy. Oǧan 2 myŋnan asa volonter men käsıporyn qyzmetkerı jūmyldyryldy. Bügınde volonterlık ūiymdarmen bırlesıp «BizBirgemiz», «Qauıpsız qala», «Qamqorlyq mekenjailary», «Ardagerlerdı ardaqtaiyq», «Taza Alem» sekıldı myŋǧa juyq aksiia ötkızıldı. Mūqtaj jandarǧa azyq-tülık sebetterın taratu, kiım-keşek jäne jihazben qamtamasyz etu, oqytu jäne taǧy basqa da kömek türlerı körsetıldı. «Taza Alem» ekologiialyq jobasy da qarqyndy jüzege asyp keledı. Bügınde volonterler atalmyş aksiia aiasynda özen jaǧasyn, Aqbūlaqtyŋ saǧalaryn tazartty» dedı volonter qozǧalysyn damytu bölımınıŋ basşysy.
Volonterlık jas talǧamaidy
Qoǧamdyq jūmystarǧa belsendı aralasu üşın ädette 14-17 jas aralyǧyndaǧy jastar niet bıldıretın körınedı. Sebebı būl – olardyŋ bıluge, köruge, jaŋa ortamen aralasyp, bos uaqytty tiımdı paidalanuǧa ūmtylatyn kezeŋı. Dese de jūrtqa järdem beru, köpke kömek körsetu jas taŋdamaidy. Qazır erıktılerdıŋ sapyn tüzegenderdıŋ basym bölıgı – 29 ben 54 jas aralyǧyndaǧy azamattar. Būl volonterlık tek jastardyŋ ısı degen taptauryn tüsınıktı yǧystyryp şyǧardy. Sondai jandardyŋ qatarynda BŪŪ-daǧy Qazaqstannan şyqqan alǧaşqy halyqaralyq volonter Teljan Jünısbekov bar. Qaiyrymdy jannyŋ basty ūstanymy – «Keŋ bolsaŋ, kem bolmaisyŋ». «Volonterlık qozǧalystyŋ paidasy qandai, jastarǧa bererı ne?» degen saualdy belgılı erıktıge qoiǧan edık.
– Volonterlık jetkınşekterdıŋ boiyndaǧy jalqaulyqtan aryluǧa kömektesedı, özgelerge kömek körsetuden azamattyŋ adamgerşılık sezımı oianady. Olar tegın jūmys ıstese de, qoǧamnyŋ damuyna äser etıp otyr. Erıktı bolu adamnyŋ sana-sezımın keŋeitedı, adam köpşıl, janaşyr bolady. Öz basym Afrika elderınde jūmys ıstep, köp jannyŋ alǧysyna bölendım. Erıktı üşın odan asqan marapat joq, – dedı T.Jünısbekov.
Erekşe mektepten ötedı
Jaqynda Astanada Ortalyq Aziia elderıne ortaq keŋse – Halyqaralyq volonterler ortalyǧy aşyldy. Mūnda ärbır erıktı öz bastamasyn jüzege asyra alady. Al «jastarǧa būl qyzmettıŋ qyr-syryn üiretetın, tärbielep, oqytatyn mekeme bar ma?» degen sūraǧymyzǧa Astana qalasynyŋ Jastar saiasaty basqarmasynyŋ basşysy Qairat Qambarov jauap berıp, qazır «Volonterler mektebı» jūmys ıstep tūrǧanyn aitty. Mūnda türlı salanyŋ mamandary şaqyrylyp, konfliktologiia, psihologiia sabaqtaryn oqytyp, qalanyŋ körıktı jerlerınıŋ tarihy turaly, özge elderdıŋ azamattarynyŋ mentalitetın zertteu boiynşa därıster ötıp qana qoimai, alǧaşqy medisinalyq kömek körsetudıŋ joldaryna deiın üiretedı eken. Mūnyŋ bärı volonterlerge qiyndyqtardyŋ aldyn aluǧa yqpal etedı. «Erıktıler mektebı» jobasy jaqynda bastau alady. Tolyq aqparatty «Astana jastary» JRO bıluge bolady.
«Ekı jyldan asa uaqyt erıktıler qataryndamyn. Men üşın būl ömırımnıŋ bır bölşegı. Şarapatqa mūqtaj adamǧa demeu bolyp, qariialardyŋ batasyn alu arqyly yntam artyp, alǧa qarai jüruge ūmtyldym. Ärine, volonterlık ūiymdardyŋ bolaşaqta qarjylyq jaǧynan täuelsız bolǧanyn qalaimyn. Sebebı kei ūiymdar üşın demeuşılık qarajat tartu qiynǧa soǧady» dedı öz sözınde elordalyq erıktı Nūrgül Mūratbai.
Erıktılerdıŋ jobalaryn qoldau maqsatynda qalalyq Jastar saiasaty mäselelerı basqarmasymen üş jyl qatarynan «Volonterlık bastamalardy qoldauǧa baǧyttalǧan şaǧyn grant» jobasy ıske asyryluda. 2022 jyly 98 qatysuşy arasynan top jarǧan 20 jeŋımpaz anyqtalyp, olarǧa 350 myŋ teŋge kölemınde şaǧyn granttar berıldı. Joba biyl da jalǧasyn tabady.
R.S: Astananyŋ aişyqty kelbetın adamgerşılıkke negızdelgen janaşyr ıster jaqsarta tüsude. San ǧasyr boiy sabaqtasyp kele jatqan jomarttyqtyŋ tını osylaişa bırıkken bırlıkke, ūiyǧan ūiymşyldyqqa ūlasyp, keiıngı buynnyŋ ızgılık otyn laulatyp, jalǧastyryp kele jatqany quantady.
