«Janūia» otbasy institutyn qoldau ortalyǧynda äleumettık qyzmetkerler künıne arnalǧan «Izgılık tuy – bırlıkte» atty qaiyrymdylyq ıs-şarasy öttı. Qaiyrymdylyqqa ün qosuǧa baǧyttalǧan ıs-şaraǧa halyq qalaulylary men qaiyrymdy azamattar, islamtanuşylar men qūqyq qorǧau salasynyŋ ökılderı qatysty.
Köpbalaly, tolyq emes, jaǧdaiy tömen jäne mügedek bala tärbielep otyrǧan otbasylarǧa jäne mümkındıgı şekteulı jandarǧa keşendı keŋes beru qyzmetterın körsetu, otbasy institutyn nyǧaituǧa baǧyttalǧan şaralardy jüzege asyrady.
Qaiyrymdylyq şaranyŋ män-mazmūnyna toqtalǧan qalalyq Jūmyspen qamtu jäne äleumettık qorǧau basqarmasynyŋ basşysy İlia Skub:
– Mūqtaj azamattarǧa qamqorlyq jasau – igı ıstıŋ bırı. Äleumettık qorǧau jüiesı qyzmetkerlerı künı qarsaŋynda sondai igılıktı şaraǧa ūiytqy bolǧan sala mamandaryna rizaşylyǧymdy bıldıremın.
Astana qalasynda 23 myŋ köpbalaly otbasy tūrady. Ärine, bırınıŋ äleumettık jaǧdaiy jaqsy bolsa, ekınşılerı taǧdyr tauqymetın tartyp otyr. Jyl basynan berı «Janūia» ortalyǧyna türlı sebeppen myŋdaǧan adam kelıp, tiıstı kömegın aluda. Mäselen, törtınşı toqsanda 2500 adam ortalyqqa kelıp, qajettı keŋes aldy, – dedı ol.
Mäjılıs deputaty Dinara Zakieva jeke adamdarǧa qoǧam men onyŋ qūrylymdary tarapynan ünemı qoldau körsetıp, äleumettendırude sala mamandarynyŋ eŋbegı zor ekenın atap, bırqatar äleumettık qyzmetkerlerdı alǧys hatpen marapattady.
İslamtanuşy Farhat İsaūly tüsındırgendei, qazaq halqynyŋ eŋ ızgı qasietınıŋ bırı – qaiyrymdylyq. «Janaşyrlyqqa – jan riza» degendei, qamqorlyqty qajet etetın jandarǧa qol ūşyn beru – sauapty ıs, berekelı bastama.
Şara soŋynda demeuşılerdıŋ qoldauymen alynǧan syilyqtardy ortalyqqa kömek sūrap jügıngen otbasylarǧa berdı.
