Memlekettık basqaru akademiiasynyŋ özektı mäselelerın talqylap, praktikalyq ūsynystardy äzırleudı negız etken «Aşyq ükımet jäne jaŋa basqaru mädenietı: estu, tüsınu, äreket etu» taqyrybynda halyqaralyq ǧylymi-praktikalyq konferensiia otandyq jäne şeteldık sarapşylardyŋ basyn qosty.
Memlekettık qyzmet ısterı agenttıgınıŋ töraǧasy Darhan Jazyqbaevtyŋ moderatorlyǧymen ötken ǧylymi ıs-şaraǧa Parlament Senatynyŋ töraǧasy Mäulen Äşımbaev, Prezident Äkımşılıgı basşysynyŋ bırınşı orynbasary Timur Süleimenov, BŪŪ-nyŋ Qazaqstan Respublikasyndaǧy tūraqty üilestıruşısı Friberg-Stori Mikaela, beibıtşılık salasyndaǧy Nobel syilyǧynyŋ laureaty Rae Kvon Chung, Astana memlekettık qyzmet haby basqaruşy komitetınıŋ töraǧasy Älihan Baimenov qatysty.
Konferensiianyŋ plenarlyq otyrysynda alǧysöz söilegen Mäulen Äşımbaev elde jürgızılıp jatqan saiasi reformalar memlekettık basqaru jüiesın jaŋǧyrtyp, servistık memleket apparatyn jäne jaŋa saiasi mädeniettı qalyptastyratynyn atady.
– Memlekettıŋ aşyqtyǧy men jariialyǧyn qamtamasyz etude azamattyq qoǧam men täuelsız jurnalisterdıŋ belsendılıgı maŋyzdy röl atqarady. Köp jaǧdaida memlekettık qyzmetkerler jauapkerşılıktı öz moinyna alyp, şūǧyl şeşım şyǧaruda joǧary jaqqa qarap otyrady. Būl ūstanym dūrys emes. Taǧy bır eskeretın jait, memlekettık ortalyq apparatta basşylyq qyzmet etetınderdıŋ 18 paiyzy ǧana öŋırlık deŋgeide täjıribesı bar. Sondyqtan ortalyqtan öŋırlerge jäne öŋırler arasynda baǧyttalǧan rotasiia jürgızudı qoldaimyz, – dedı Senat töraǧasy.
«Aşyq ükımettı» engızudıŋ halyqaralyq jäne ūlttyq täjıribelerı, «Sifrlyq memleket» ülgısın qalyptastyrudyŋ negızgı aspektılerı, memlekettık basqarudy biurokratiiadan aryltu mäselelerı turaly oiymen Timur Süleimenov bölısıp, memlekettık qyzmet salasyn damytuda aşyq talqylauǧa daiyn ekenın jetkızdı.
Plenarlyq otyrysta spikerler öz ūsynysyn ortaǧa salyp, oiynyŋ maŋyzyn tüsındırdı. Mäselen, Rae Kvon Chung «jasyl energiiany» damytu, eko-qalalar qūrudyŋ ekonomikalyq perspektivalaryn qozǧady.
Konferensiia AQŞ, Germaniia, Polşa, Bolgariia, Orta Aziia elderınen kelgen sarapşylardyŋ qatysuymen seksiialyq otyrystarmen jalǧasty. Halyq ünıne qūlaq asatyn memlekettı qalyptastyrudyŋ konseptualdy negızderı, memlekettık basqaru jüiesın biurokratiiadan aryltu jäne taǧy basqa taqyryptarda diskussiia oryn aldy.
