Erkeǧali Rahmadiev atyndaǧy Memlekettık akademiialyq filarmoniia jäne Ǧ.Jūbanova atyndaǧy memlekettık ışektı kvartet «Köktem şabyty» konsertın ūsyndy. Ūjym «Astana Opera» teatrynyŋ Küläş Baiseiıtova atyndaǧy kameralyq zalynda Volfgang Amadei Mosart, Edvard Grig jäne Qazanǧaptyŋ şyǧarmalaryn oryndady.
Ǧ.Jūbanova atyndaǧy memlekettık ışektı kvartettıŋ joǧary şeberlıgın muzykalyq qoǧam jäne käsıbi qoǧamdastyq äldeqaşan moiyndaǧan. Ūjymnyŋ şyǧarmaşylyq qyzmetı memleket tarapynan joǧary baǧalanyp, 1996 jyly kvartetke «Daryn» memlekettık jastar syilyǧy, al 2000 jyly «Eren eŋbegı üşın» medalı berıldı. Köptegen bedeldı halyqaralyq baiqaular men festivalderge qatysyp, jüldelı oryndardy ielengen kvartet Dmitrii
Şostakovich atyndaǧy halyqaralyq ışektı kvartetter baiqauynda top jarǧan.
Qūramynda körkemdık jetekşısı Ernar Myŋtaev (violonchel), Qazaqstannyŋ eŋbek sıŋırgen qairatkerı Aidar Toqtaliev (bırınşı skripka), Aleksei Lebedev (ekınşı skripka), Bekzat Sailaubaiūly (alt) bar ūjym Mosarttyŋ lia major klarnet pen ışektı kvartetke arnalǧan kvintetın, Grigtıŋ sol-minor ışektı kvartetın, Qazanǧaptyŋ «Tory jorǧa attyŋ bögelek qaǧuy» atty küiın oryndady. Kvartetpen bırge keş qonaǧy – Başqūrtstan Respublikasynyŋ eŋbek sıŋırgen ärtısı, Başqūrtstan Respublikasy Ūlttyq simfoniialyq orkestrınıŋ bas direktory Artur Naziullin öner körsettı.
