Elordada «Jasyl Astana» ekologiia ailyǧy bastaldy. Jalpyqalalyq senbılıkke 56 myŋnan astam qala tūrǧyny qatysyp, abattandyru, kögaldandyru jäne sanitarlyq tazalau jūmysyn atqardy. Ekologiia ailyǧy barysynda Esıl, Aqbūlaq, Sarybūlaq özenınıŋ arnasy jäne qoǧamdyq keŋıstıkter tūrmys qaldyqtarynan tazalanyp, köşetter otyrǧyzylady. Senbılıkke şyqqan azamattar 110 tonnaǧa juyq qoqys şyǧaryp, 1200-ge juyq jasyl jelek otyrǧyzdy.
Bız Aqbūlaq özenınıŋ ekı jaǧasynda ötken tazartu jäne aǧaş otyrǧyzu räsımın közben körıp qaittyq. Mūnda ötken küzgı senbılıkke Baiqoŋyr men Almaty audanynyŋ tūrǧyndary belsendı qatysty.
Almaty audanynyŋ 16 myŋdai tūrǧyny qatysyp, olar 300-ge juyq qaraǧai, üieŋkı, şaǧan köşetın otyrǧyzdy.
– Ekologiia ailyǧynyŋ maqsaty – qoǧam nazaryn qala köşelerınde tazalyq saqtauǧa audaru jäne ekologiia mädenietın qalyptastyru, öskeleŋ ūrpaqqa tärbie beru. L.Gumilev atyndaǧy Euraziia ūlttyq universitetınıŋ oqytuşylary men studentterı senbılıkke qatysyp, özen jaǧasyn, gülzarlardy, skverlerdı tazalady, – dedı Almaty audany äkımdıgı öndırıs-tehnika bölımınıŋ bas mamany Nūrǧazy Üsen.
Baiqoŋyr audanynda 10 myŋǧa juyq adam qatysyp, 50-den asa arnaiy tehnika jūmyldyryldy. Aqbūlaq özenınıŋ Baiqoŋyr audanyna jatatyn ekınşı jaǧalauyndaǧy senbılıkke şyqqandar arasynda ardagerler basym boldy. Olar özen jaǧasyn qoqystan tazartyp, 186 köşet otyrǧyzdy.
– Tazalyq – mädeniet pen köregendıktıŋ aiqyn belgısı. Qorşaǧan ortanyŋ tazalyǧyn tyŋǧylyqty saqtap, mūntazdai ūstau – örkeniettı qoǧamnyŋ ölşemı. Sondyqtan jastarǧa ülgı körsetu üşın senbılıkke şyǧyp, tazalyq ailyǧyna atsalysudy oiladym. Qimyl belsendılıgı salauatty ömır saltyn qalyptastyrudyŋ negızgı şarty desek, senbılıkke şyǧyp, bır jaǧy qozǧalys belsendılıgın arttyryp, densaulyqqa oŋ äser etuge, ekınşı jaǧy qalany tazartuǧa atsalysuǧa üles qosuǧa bolady, – dedı Baiqoŋyr audanynyŋ tūrǧyny, el aǧasy Seidulla Esqabylov.
Senbılıkke «Elorda Aqparat» JŞS-ke qarasty «Astana aqşamy» men «Vecherniaia Astana» gazetınıŋ, Elorda.info aqparat saitynyŋ jurnalisterı qatysty. Olar Tūran daŋǧyly boiyndaǧy «Ǧaşyqtar» saiabaǧyn tazalady.
