Astana qalasynyŋ äkımdıgınde Memlekettık qyzmet ısterı agenttıgınıŋ Astana qalasy boiynşa departamentı janyndaǧy «Tälımgerler keŋesı» konsultativtık-keŋesşı organynyŋ otyrysy öttı. Otyrysty Astana qalasy Qoǧamdyq keŋesınıŋ töraǧasy Sansyzbai Esılov jürgızdı.
Qazır memleketımız üşın käsıbi deŋgeiı joǧary mamandar daiyndau qandai özektı bolsa, jas mamandarǧa qoldau körsetu de däl sondai maŋyzǧa ie. Būl tūrǧyda aldyŋǧy tolqynnyŋ keiıngı tolqynǧa aqyl-keŋesın aityp, baǧyt-baǧdar sılteuı de artyqtyq etpeidı. Osyǧan orai memlekettık qyzmettıŋ bedelın nyǧaityp, memlekettık qyzmetşınıŋ imidjı men bolmysyn qalyptastyru maqsatynda Tälımgerler keŋesı qūrylǧan edı.
Mıne bügın sol Tälımgerler keŋesı müşelerınıŋ aldyna aqyl-keŋesın tyŋdap, batasyn alu üşın qyzmetke jaŋadan taǧaiyndalǧan Astana qalasy Qoǧamdyq densaulyq saqtau basqarmasynyŋ basşysy Äliia Rüstemova men Astana qalasy Aktivter jäne memlekettık satyp alu basqarmasynyŋ basşysy Nūrlan Älımjanov keldı.
Elordanyŋ qoǧamdyq densaulyq salasy – öte kürdelı sala. Mūnda şeşımın taba almai, qordalanyp qalǧan tüiındı tüitkılder men alda jüielı de maqsatty türde atqarylatyn san-salaly ıster az emes. Qazır qalada 12 memlekettık, 29 jekemenşık auruhana men emhana bar. Osy mekemelerdıŋ jūmysyndaǧy ıstelgen ıster men oryn alǧan kemşılıkter būryn osy salada orynbasar bolǧan jaŋa basşyǧa etene tanys. Endı solardy şeşudıŋ joly qandai? Mıne osy jäne basqa da mäselelerdı Äliia Şaizadaqyzy ortaǧa saldy.
Al būǧan deiın Astana qalasy äkımı apparaty basşysynyŋ orynbasary bolǧan Nūrlan Talǧatūly da Astana qalasy Aktivter jäne memlekettık satyp alu basqarmasynyŋ basşysy lauazymyndaǧy özınıŋ jaŋa qyzmetınıŋ jai-japsaryn baiandap, alda atqarylar jūmystardyŋ legıne toqtaldy.
Qalalyq memlekettık organdarǧa taǧaiyndalatyn bırınşı basşylardyŋ ömırbaiany men jūmys-josparyn tyŋdaǧannan keiın Memlekettık qyzmet ıster agenttıgınıŋ Astana qalasy boiynşa departament basşysy, Ädep jönındegı keŋes töraǧasy Äli Kömekbaev, Tälımgerler keŋesı müşelerı Qaiyrjan Toqyşov, Mūhtar Erketaev, Däuletkerei Rahmatullin ūsynys-pıkırlerı men aqyl keŋesterın aityp, olardyŋ basşylyq qyzmettegı jūmysyna sättılık tıledı.
