«Astana» konsert zalynda üş arys – Säken Seifullin, Iliias Jansügırov jäne Beiımbet Mailinnıŋ tuǧandaryna 125 jyl toluyna arnalǧan «Qazaqtyŋ ırılerı» atty keş öttı.
Qazaq ädebietı negızı qalanuyna ölşeusız üles qosqan tūlǧalar qairatkerlık qyrlarymen de belgılı. Atap aitqanda, Säken Seifullin qazaq önerınıŋ ülken janaşyry boldy. Halyq komissarlary keŋesınıŋ töraǧasy qyzmetınde bolǧanynda öner zertteuşı, etnograf Aleksandr Zataevichke «Qazaqtyŋ 1000 änı» jinaǧyn şyǧaru üşın 2480 rubl qarajat bölgızdı. Jaryssözge şyqqandardyŋ: «Onsyz da jetkılıksız respublika biudjetın Orynbordaǧy şeberhanalardy jaŋǧyrtuǧa, qyzyl äskerdı qarjylandyruǧa bölınsın» degenderıne qaramady. Özı de A.Zataevichke ekı küi, tört än oryndap berıp, jazdyrady. Būdan keiın Säkennıŋ nūsqauymen özge de önerpazdar öner zertteuşınıŋ qorjynyn toltyrdy.
Elordanyŋ memlekettık akademiialyq filarmoniiasynyŋ qazaq orkestrı, halyq änı bölımı, «Şalqyma» halyq bi ansamblı Säken, Iliias, Beiımbettıŋ ūltqa sıŋırgen eŋbegın teatrlandyrylǧan qoiylym arqyly jan-jaqty jarqyrata körsettı. Körermenderdı Säkennıŋ änderı men öleŋderımen, Iliias pen Beiımbettıŋ jyrlarymen susyndatty. Sondai-aq üş arysqa arnalǧan tuyndylardy oryndady. Sonyŋ ışınde kompozitor Mūrathan Egınbaevtyŋ aqyn Käkımbek Salyqovtyŋ öleŋıne jazylǧan «Üş arys» änı men Äbıken Hasenovtıŋ «Qoŋyr» küiı erekşe oryn alady.
Däl osyndai keş «Qazaqstan» ortalyq konsert zalynda «Üş bäiterek» atauymen ūiymdastyryldy. Onda «Astana sazy» etno-folklorlyq ansamblı tūlǧalardyŋ mereitoiyna konsertın arnady. Konsertke kelgender atalmyş ansambl men Asqar Mūqiiat, Aiaulym Qamajan, Denislambek Jailaubai sekıldı daryndy änşılerdıŋ önerıne qol soqty.
