25 säuır künı qazaq käsıbi teatr önerınıŋ negızın qalauşylardyŋ bırı Qalibek Quanyşbaevtyŋ tuǧanyna 130 jyl toldy. Sahna saŋlaǧynyŋ atyn ielenıp, sonyŋ köşesınde ornalasqan Q.Quanyşbaev atyndaǧy Memlekettık akademiialyq qazaq muzykalyq-drama teatry däl osy künı äz-Nauryz ben Halyqaralyq teatr künı merekelerın atap öttı.
Öner ūjymy bes auylǧa bölınıp, kiız üiler tıktı. Ūlttyq taǧamdar men ūlttyq oiyndardan saiystar, qolöner şeberlerınıŋ jarysy ūiymdastyryldy. «Ölı razy bolmai, tırı baiymaidy» degendei, dünieden ötken teatr qyzmetkerlerınıŋ ruhyna qūran baǧyştaldy. Teatr üzdıkterıne, qallekilıkterdıŋ bırde-bır qoiylymyn qaldyrmaityn körermenderge, osy teatrdy nasihattaityn BAQ ökılderıne öner ordasy basşylyǧy atynan alǧys hat tapsyryldy. Üzdıkterdı qūrmettı qonaqtar qataryndaǧy memleket jäne qoǧam qairatkerlerı, ziialy qauym ökılderı, qalamgerler, Parlament deputattary marapattady.
Mädeniet jäne sport ministrınıŋ orynbasary Nūrǧisa Däueşov soŋǧy üş jylda Memleket basşysy Qasym-Jomart Toqaevtyŋ önerdı qoldauynyŋ arqasynda Qalleki teatry jaŋa, eŋselı ǧimaratqa ie bolyp, tehnikalyq jaǧynan jabdyqtalǧanyn atap öttı.
– Şyn mänınde, qazaqty qoldaityn bolsaq, aldymen teatrymyzdy oŋdasaq, teatrda qoiylatyn bükıl qoiylymdardy jatqa bılsek, qazaqtyŋ mädenietı ösedı, qazaqtyŋ oi-örısı ösedı, jalpy qazaq alǧa jyljidy, – dedı memleket jäne qoǧam qairatkerı, belgılı qalamger Darhan Myŋbai.
Jazuşy-dramaturg, Abai atyndaǧy Memlekettık syilyqtyŋ laureaty Roza Mūqanova, Mäjılıs deputaty, aqyn Janarbek Äşımjan jyly lebızın jetkızdı. Akademik, «Qazaq gazetterı» JŞS bas direktory Dihan Qamzabekūly qazaq teatryn qūrǧan Alaş ardaqtylarynyŋ eŋbekterın teatr muzeiıne syiǧa tartty. Sonyŋ ışınde Qyzylordada qazaq teatryn aşqan Smaǧūl Säduaqasūlynyŋ, ūlttyq teatrda sahnalanǧan alǧaşqy «Altyn saqina» pesasynyŋ avtory Qoşke Kemeŋgerūlynyŋ kıtaptary bar. Resmi bölımdı tüiındegen Q.Quanyşbaev atyndaǧy Memlekettık akademiialyq qazaq muzykalyq-drama teatrynyŋ direktory Aibolat Jaudyr Qalleki teatry ūlttyq märtebege laiyq ekenın, osy ataqtan ümıttı ekenın aitty.
