Keşe qalalyq äkımdıkte «Qazaqstandaǧy 100 jaŋa esım» jobasynyŋ ekınşı kezeŋıne qatysuşylardy şaqyru maqsatynda baspasöz-mäslihaty öttı.
Şaraǧa «Astana jastary» ortalyǧy KMM direktory Ükıbai Nūrpeiısov pen «Qazaqstan studentterınıŋ aliansy» respublikalyq studentter qozǧalysynyŋ jetekşısı Iliias Tüstıkbaev qatysyp, biylǧy jobanyŋ erekşelıkterı jaiynda baiandap berdı.
«100 jaŋa esım» jobasy Qazaqstanda erekşe talantty jäne tūlǧalyq sipatqa ie adamdardy ızdep, jobaǧa belsene qatysuǧa şaqyrady. Atalǧan joba käsıbi salada jetıstıkke jetken, özgege ülgı bolatyn adamdarǧa arnalǧan. Osymen ekınşı jyl ūiymdastyrylyp otyrǧan jobanyŋ ötken jylǧydan özgeşelıgı ümıtker byltyrǧydai özın-özı ūsyna almaidy. Olar tek ūiym atynan ūsynylady. Sonymen qatar biyl ükımettık emes ūiymdar ökılderıne basymdyq berılmek. Sol siiaqty ötken jylǧy ırıkteu kezeŋınen ötpei qalǧan ümıtkerler biyl taǧy da ötınım beruge qūqyly.
– Bız Astanadaǧy joǧary oqu oryndary men kolledj-mektepterge aldyn ala hat jazǧan bolatynbyz. Äzırge mekemege 50 ümıtkerden ötınış tüstı. Ötınış qazan aiyna deiın qabyldanady. Joba jeŋımpazdaryn jyl soŋyna deiın Aqparat jäne kommunikasiialar ministrlıgı janyndaǧy komissiia anyqtaityn bolady, – deidı Ükıbai Nūrpeiısov.
