Būqaralyq sportqa basa köŋıl bölıngen bas qala üşın būl jyl tabysty boldy. Astanalyq sportşylar bırtalai bairaqty bäsekede jaqsy jetıstıkke jetıp, mereiı tasydy. Onyŋ ışınde, ärine, bastysy Rio-de-Janeiro Olimpiadasyndaǧy jarqyn jeŋıster ekenı dausyz. Būǧan qosa, elordalyqtar el arasyndaǧy jäne halyqaralyq dübırlı dodalarda erekşelendı. Mūnyŋ bärı şahar jūrtynyŋ jappai sportqa bet būruyna bastauda. Osy jönınde bızge qalalyq Dene şynyqtyru jäne sport basqarmasynyŋ basşysy Berık Marjyqpaev keŋınen äŋgımelep berdı.
Olimp şyŋyn baǧyndyrǧan oǧlandar
El sportynyŋ tarihynda alǧaş ret astanalyqtardyŋ sapynan Olimpiada şyŋyn baǧyndyrǧan sportşy şyqty. Ol – bokstan Qazaqstan ūlttyq qūramasynyŋ kapitany Daniiar Eleusınov. Olimpidadaǧy qazaqtyŋ dästürlı jolyn jalǧai bılgen Daniiar būl sport türınen bızdıŋ jıgıtterdıŋ myqty ekenın taǧy bır däleldedı.
Oǧan qosa, el qorjynyna elordalyq Vasilii Levit pen Güzel Maniurova qos kümıs medal saldy. Al Rio Paralimpiada oiyndarynda Änuar Ahmetov te köŋıl könşıterlık nätije körsetıp, törtınşı orynǧa tūraqtady.
Sonymen qatar, Ündıstanda şahmattan äielder arasynda ötken älem bırınşılıgınde Dinara Säduaqasova chempion atandy. Ol bügınde şahar äkımınıŋ qoldauymen Astanadan özınıŋ Şahmat akademiiasyn aşty. Qazır onda daryndy balalar oi jarystyryp, şeberlıkterın şyŋdauda.
Eŋ būqaralyq sport türı sanalatyn futboldyŋ da qaladaǧy damuy quantarlyq. Elordalyq «Astana» kluby qatarynan üşınşı ret el chempionatynda köş basynan körındı. Sondai-aq, Europa kuboktarynda el atynan synǧa tüstı. Bırınşı ret toptyq kezeŋde alǧaşqy jeŋısın toilap, «Astana-Arena» stadiondaǧy jeŋılıssız seriiany saqtap qaldy.
Elordada hokkei de nazardan tys qalmaǧan. Būl sportqa den qoiuşylar kün sanap artyp keledı. Būǧan, ärine, bızdıŋ komandalardyŋ sättı oiyndary köp septıgın tigızıp jatyr.
Bolaşaq chempiondar ösıp keledı
Astana qalasy Dene şynyqtyru jäne sport basqarmasynyŋ basşysy Berık Marjyqpaev ösıp kele jatqan bolaşaq chempiondardyŋ da alǧaşqy qadamdary jaqsy ekenın atap öttı. Olardyŋ bırazy biyl joǧary deŋgeilı jarystarda közge tüsıp ülgerdı. Mäselen, körkem gimnastikadan Adilia Tılekenova men velosporttan Vadim Pronskii Aziia chempiondary atandy.
Qūrlyqtyq bırınşılıkte Dinara Erǧalieva, Alena Vasenkina, Ämina Qojahmet, Nūrai Qūmarova syndy körkem gimnastşy qyzdarymyz jäne veloşabandoz Valeriia Tihova qola medalǧa qol jetkızdı.
IV Halyqaralyq «Aziia balalary» oiyndarynda bokstan Aiat Marjyqpaev pen Saǧyndyq Toǧambai ekınşı oryn alsa, körkem gimnastikadan Adilia Tılekenova üşınşı oryndy ielendı.
Aziia kubogynda baidarka jäne kanoe esuden Aleksandra Kim, Kristina Absinskaia jäne Dmitrii Chernega altynnan alqa taqty. Al Vadim Dynko men Asiia Amankeldı qola jüldeger atandy.
Studentter arasynda ötken älem chempionatynda jas boksşy Rahat Marjyqpaev qola medal aldy.
Ötıp bara jatqan jyldyŋ mamyr aiynda elordada bokstan äielder arasynda älem chempionaty ūiymdastyryldy. Onda astanalyq Läzzat Küngeibaeva men Valentika Halzova chempion bolyp, Qazaqstan Respublikasynyŋ eŋbek sıŋırgen sport şeberı ataǧyna laiyq dep tanyldy.
Sondai-aq, Aziia chempionatynda grek-rim küresınen Dosjan Qartyqova qola jüldenı ielendı.
Al biyl soŋǧylardyŋ bırı bolyp Sankt-Peterburgte bokstan jastar arasynda ötken älem bırınşılıgınde Sadriddin Ahmetov qarsylastarynan bärınen basym tüsıp, kök tuymyzdy jelbırettı.
Būqaralyq sportqa betbūrys
Sonymen, aǧymdaǧy jyly Astanada 99 sport şeberı, halyqaralyq därejedegı 19 sport şeberı, 321 sport şeberıne ümıtker, 50 bırınşı razriadty sportşy şyqty.
«QR eŋbek sıŋırgen sport şeberı» ataǧy 4 sportşyǧa, «QR eŋbek sıŋırgen jattyqtyruşysy» qūrmetı 11 adamǧa berıldı.
Astanalyq sportşylar jalpy sany 3139 medal jeŋıp aldy. Onyŋ ışınde respublikalyq 833 altyn, 796 kümıs jäne 851 qola jülde bar. Al halyqaralyq dodalardaǧy altyn medaldyŋ esebı – 199, kümıs – 215, qola – 245.
«Bız osy jyly qalamyzda 500-den astam būqaralyq sport şaralaryn ötkızdık. Sonyŋ arasynda eŋ este qalarlyǧy 4 qyrküiekte ötken «Astana Marafon-2016» qaiyrymdylyq jarysy boldy. Būǧan 4500 şamasynda adam qatysty. Sol uaqytta şaharda «Astana – sport qalasy» atty aksiia ötıp jatty. Onyŋ şeŋberınde 7000-nan asa halyqty qamtyǧan 15 qalalyq şara ūiymdastyryldy. Qysqy mausymda ötken būqaralyq sport jarystaryna 300 myŋnan asa adam qatysty. Elordada sportqa bet būrǧan jūrttyŋ qatary jyldan jylǧa artyp keledı» deidı Berık Marjyqpaev.
Ökınışke qarai, elordalyq Dene şynyqtyru jäne sport basqarmasynyŋ basşysy Astanada qysqy olimpiadalyq sport türlerınıŋ damuynda qiyndyqtar baryn aitty. Mysaly, snoubord, fristail, tau şaŋǧysy syndy sport türlerın qolǧa aluda köptegen kedergıler bar. Oǧan qosa, būl saladaǧy bılıktı bapkerler qūramy joqtyŋ qasy. Sondai-aq, infraqūrylymdy äldeqaida jetıldıre tüsu qajet.
2016 jyldyŋ soŋǧy sporttyq şarasy jaŋa jyl tünı ūiymdastyrylatyn būqaralyq jügıru bolmaq. Osylaişa astanalyqtar sportty, salamatty ömır saltyn qoldaityndaryn, kez kelgen küreste qajyr-qairat körsete alatyndaryn körsetedı.
Kelesı jyly Almaty jäne Japoniianyŋ Sapporo qalalaryndaǧy qysqy trassalarda jaŋa synaqtar, oǧan qosa, Universiada-2017 men Aziia oiyndary kütıp tūr. Osyndai bairaqty bäsekelerde astanalyqtar aianyp qalmasy anyq.
Orynbek ÖTEMŪRAT
