Elımızde ūlttyq qauıpsızdık jüiesı nyqtalyp, küş qūrylymdarynyŋ materialdyq-tehnikalyq bazasy nyǧaiyp, äskeri qyzmetşılerdıŋ äleumettık mäselelerı şeşımın tauyp keledı. Sonyŋ bırı «Äskeri baspana» memlekettık baǧdarlamasy der edım.
Qazaqstan Respublikasy Ūlttyq ūlanynyŋ men qyzmet etıp otyrǧan bır ǧana bölınısı – astanalyq jedel qūramanyŋ özınen atalmyş baǧdarlama aiasynda 58 äskeri qyzmetşı baiqaudan öttı. Soŋǧy üş-tört aidyŋ ışınde eŋbek ötılı men otbasy müşelerınıŋ sany boiynşa baspanaly bolu mümkındıgıne ie bolǧan qyryqqa juyq otbasy jaŋa päterge qol jetkızdı. Solardyŋ qatarynda özım de barmyn. Baǧasy basqa öŋırlerden erekşelenetın bas qalamyzda baspanaǧa qol jetkızudıŋ – ülken quanyş ekenın bılesızder. Jyldar boiy jaldamaly päterde tūrǧandyqtan ba, şynyn aitsam, üilı bolu üşın döŋgelegen biznesıŋ, ia bolmasa tūraqty bır kırıs közı bolu kerek dep oilaitynmyn. Üş bölmelı päterdıŋ iesı atanuymyz – Elbasynyŋ äskerilerge körsetken memlekettık qoldauy men el qalqanyna ainalǧan Ūlttyq ūlan sapyndaǧy on üş jyldyq qyzmetımnıŋ jemısı dep bılemın.
Elorda ırgesınde ornalasqan jedel qūrama – 5573 äskeri bölımı elorda tynyştyǧynyŋ küzetın küşeitu maqsatynda qūrylǧan bolatyn. 2014 jyldyŋ 14-qaraşasynda Nūrsūltan Nazarbaevtyŋ qatysuymen saltanatty türde aşylu saltanaty ötıp, Jauyngerlık Tu tabystalǧan edı. Sodan berı aru Astanamyz pen qala halqynyŋ qauıpsızdıgın küzetıp, halyqaralyq, respublikalyq maŋyzy bar basqosular, sporttyq-mädeni ıs-şaralar, resmi kezdesuler kezınde tynyştyqtyŋ kepılı bolyp keledı. Kün saiyn qyzmetke respublikamyzdyŋ barlyq aimaǧy boiynşa Ūlttyq ūlannan 5000-dai sarbaz bölınse, qalamyzdyŋ tört audanynda ışkı ıster organdarymen bırge köşe tärtıbın qadaǧalauǧa 5573 äskeri bölımınen jūmyldyrylatyn äskeri jasaqtar qataryndaǧy jauyngerler sany myŋǧa juyqtaidy.
Osyndai alyp qūramadaǧy ofiserlık qūram bolsyn, kelısım-şart negızınde qyzmet atqaratyn äskeri qyzmetşıler bolsyn, qala tynyştyǧyna ärbır mamannyŋ qosar ülesı zor. Tırşılıgı täulıktıŋ jiyrma tört saǧatynda toqtamaityn, batalondary men jeke qūramy bırın-bırı almastyryp otyratyn, el merekelep jatqanda, kerısınşe küşeitılgen rejimdegı qyzmetke köşetın elordalyq ūlandyqtar üşın 2018 jyl joǧaryda aitylǧan jaqsy jaŋalyǧymen, äleumettık tūrǧydaǧy eŋ ülken mäsele – baspana mäselesınıŋ şeşıluımen berekelı jyl boldy deuge tolyq negız bar. Memleket tarapynan qoldau tauyp otyrǧan Otan qorǧauşylar da mūndai qamqorlyqqa öz kezegınde käsıbi şeberlıgımen jäne adal qyzmetımen jauap qaitarary sözsız.
Möldır NÄLIBAEVA,
Ūlttyq ūlan ofiserı
