Byltyr Astanadaǧy oquşylar sany 16 myŋ balaǧa artqan edı. Mektepke deiıngı balalardyŋ sany tuu men köşı-qon körsetkışınıŋ joǧary deŋgeiıne bailanysty artyp otyr. Biylǧy oqu jylynda bır ǧana 1-synypqa 22 myŋǧa juyq oquşy qabyldanady dep kütılude.
Aita keteiık, biyl elımızdıŋ mektepterınde nöldık synyptar paida bolady. Ol synypqa qabyldanǧan balalar alfavittı «Älıppe» boiynşa oqidy. Jaqynda ǧana Bılım jäne ǧylym ministrı Erlan Saǧadiev mūnyŋ bırınşı synypqa keletın balalardyŋ daiyndyq deŋgeiı arasyndaǧy üilesımsızdıktı joiuǧa mümkındık beretının aitty. «Bügıngı taŋda bırınşı synyp oquşylarynyŋ 80 paiyzy jügırtıp oqi alsa, al 20 paiyzy ärıp te tanymaidy.
Sol sebeptı synyp tügel barlyq baǧdarlamany basynan bastap ötuge mäjbür» degen edı. Rasynda da, osyǧan deiıngı jüie boiynşa daiyndyq tobyna barǧan bala, barmaǧan bala bolyp bölınıp, ara jıgı ajyrap qalǧan balalardy bır deŋgeide oqytu jaǧy da yŋǧaisyzdyq tudyrǧan edı. Endı osy jüie saqtalatyn bolsa, ata-analar üşın de, mūǧalımder üşın de būl oŋ şeşım bolar edı. Nöldık synypty būrynǧydai mektepte de, balabaqşada da ötuge bolady.
Balabaqşalarmen bırge qalamyz boiynşa 49 şaǧyn ortalyqtar jūmys jasaidy. Onyŋ 46-sy – memlekettık, al 3-euı – jekemenşık. Jūmys uaqyty jarty kün. Onda mektepke baratyn balalardy tört jastan bastap tegın türde daiyndaidy. Ortalyqqa joldama alu üşın bala Astana qalasy boiynşa balabaqşa kezegınde resmi türde tūruy kerek. Būdan bölek, är mekteptıŋ janynan «Baldyrǧandar mektebı» aşylǧan. 13 mausym-13 tamyz aralyǧynda balany mektepke baruǧa beiımdeitın daiarlyq synyptary är sabaǧy 25-30 minuttan üş saǧat oqytady.
Qaladaǧy tūrǧyndardyŋ, onyŋ ışınde balalardyŋ köbeiuıne bailanysty oquşylar men mektep jasyna deiıngı balalardy bılım ordasymen, balabaqşamen qamtamasyz etu mäselesı kün tärtıbındegı eŋ negızgı mäselege ainalyp otyr.
Güljan RAHMAN
