«Qazaq tılın bılıp tūryp, biık mınbeden ädeiı söilemeitın (dūrysy söilegısı kelmeitın) aqjaǧalylar da, deputattar da bar. Olardy baspasözde, äleumettık jelılerde jabyla synaǧannan tük şyqpaidy. Ūlttyq partiianyŋ qyzmetın atqaryp otyrǧan (Erlan Qarinnıŋ sözı) qazaq baspasözın olar oqymaidy» dep jazyp edım būrynǧy bır maqalamda.
Mäjılıstıŋ särsenbıdegı alqaly jiynyna qatysyp, «Mäskeude bıraz jyl tūryp, ana tılımdı ūmyttym» degen Ūlttyq ekonomika ministrımız Timur Süleimenovtıŋ 15 minuttyq baiandamasyn taza qazaqşa müdırmei jasaǧanyn közben körıp, qūlaqpen estıp, süiınış sezımın bastan keştım. Timur Mūratūly Euraziialyq ekonomikalyq odaqqa qatysty zaŋ jobasy boiynşa deputattar qoiǧan saualdarǧa tolyq qazaqşa jauap qaiyrdy. Timur myrzanyŋ tabandylyǧy qazaqşany qalamaityn özge aqjaǧalylarǧa ülgı bolarlyq-aq!
Şyny kerek, bız jurnalister qit etse: «Oibai, anau ministr qazaqşa söilemedı!», «Mynau deputat orysşa zuyldady» dep synai ketuge qūmarmyz ǧoi. Bıraq T.Süleimenovtıŋ qazaqşa müdırmei söilegenıne quanǧan ärıptesterımız az boldy. Jiyn soŋynan Ūlttyq ekonomika ministrıne jolyǧyp, az-kem saual qoidym.
– Timur myrza, bıraz uaqyt būryn qazaqşaǧa qinalatyn edıŋız. Bügıngıdei nätijege qalai jettıŋız? Qanşa uaqytta taza qazaqşa söilep üirendıŋız?
– (Küldı). Öte jaqsy söileimın dep aituǧa bolmaidy. Öitkenı keide qinalatynym ras. Ökınışke qarai, qazaqşadan praktikam az. Bıraq 1 jyldyŋ ışınde osyndai deŋgeige jettım. Özımnıŋ mūǧalımım bar. Öz betımmen de daiyndalamyn. Künde taza qazaqşa söileuge tyrysamyn. Qazır Ükımettegı, Parlamenttegı jinalystarda qazaq tılınde baiandama jasap jürmın. Eŋ bastysy, qazaqşa oilai bastadym. Miyma küş tüsırıp, qazaqşa söilemderdı qūraimyn. Qazaqşa sūraq qoiǧandarǧa ana tılımızde jauap beremın. Būl – menıŋ ömırımdegı eŋ maŋyzdy özgerıs, eŋ ülken jaŋalyǧym dep sanaimyn!
Qazaq jurnalistikasynyŋ körnektı ökılı, «Qazaq gazetterı» JŞS basşysy Şämşiddin Pätteev «1-studiia» tok-şouynda: «Qazaq baspasözı sorly emes, qazaqşa gazet oqymaityn bızdıŋ ministrlerımız sorly» degen pıkır aitty. Ärine, būl – bır adamnyŋ jeke pıkırı. Şyn mänısınde solai ma? Bızdıŋ ministrler qazaqşa gazetterdı oqi ma? Osyndai saualdy kökıregıme tüiıp, Mäjılıstıŋ jiynyna kelgen lauazym ielerıne turasynan qoidym. Jauaptary tömendegıdei bolyp şyqty:
Timur SÜLEIMENOV, Ūlttyq ekonomika ministrı:
«Ärtürlı gazetterdı oqimyn. Kündelıktı şyǧatyn elımızdıŋ bas basylymy «Egemen Qazaqstandy» üzbei oqimyn. Sonymen bırge, qazaqşa saittardy, Feisbuk äleumettık jelısındegı qazaqşa jazbalardy oqimyn. Būryn qazaqşasyn ötkızıp jıberetın edım. Qazır oqimyn».
Qaiyrbek ÖSKENBAEV, İnvestisiialar jäne damu ministrınıŋ orynbasary:
«Bas qalanyŋ tūrǧyny bolǧandyqtan «Astana aqşamy» gazetın oqyp tūramyn. Elordanyŋ ömırındegı barlyq jaŋalyqtardan habardar bolyp otyru är adamnyŋ paryzy dep bılemın. Özım jergılıktı jerdıŋ azamatymyn. Būl qaladaǧy är özgerıske, är jaŋalyqqa quanatynym ras».
Elvira ÄZIMOVA, Ädılet ministrınıŋ orynbasary:
«Jaŋalyqtardy kün saiyn internet arqyly oqimyn. Mysaly, «Tengrinews.kz», «NUR.KZ», «Zakon.kz» siiaqty saittardy oqimyn. Olardyŋ orysşa da, qazaqşa da nūsqalary bar ǧoi. Sodan keiın «Kazahstanskaia pravda» gazetın oqimyn. Elımızdegı kündelıktı barlyq jaŋalyqtardy osy gazet basady».
Tölen TILEUBAI
