27 qaraşa künı Qazaq ūlttyq öner universitetınıŋ Jambyl atyndaǧy konserttık zalynda Qazaqstannyŋ eŋbek sıŋırgen ärtısı, şertpe küidıŋ şeberı Äbıken Hasenovtıŋ tuǧanyna 125 jyl toluyna arnalǧan «Qoŋyr» atty küi keşı ötedı.
Äbıken Hasenov – qazaqtyŋ şertpe küi önerınıŋ käsıbi mektebınıŋ ırgetasyn qalaǧan ūly küişı. Onyŋ «Qoŋyr» atty küiı özı ömır sürgen tar kezeŋnıŋ auyrtpaşylyǧyn suretteidı.
1934 jyldan bastap Qazaq akademiialyq drama teatrynyŋ akterı bolyp eŋbek etken. Köptegen obrazdardy somdaǧan teatr tarlany retınde aty tarihta qalǧan. Äbıken Hasenov Tättımbet, İtaiaq, Maqaş, Sembek, Qyzdarbek, Äbdi siiaqty halyq küişılerınıŋ mūralaryn küitabaqqa jazyp qaldyrǧan. Şertpe küidıŋ maitalman şeberın S.Seifullin, S.Mūqanov, Ǧ.Müsırepov, Ǧ.Mūstafin syndy klassik qalamgerler süiıp tyŋdaǧan. Äbıkennıŋ esımı A.Jūbanovtyŋ monografiiasynda atalǧan.
«Qazaqtyŋ ūly küişılerınıŋ bırı, Tättımbet mektebınıŋ ozyq ökılı Äbıken Hasenovtıŋ ömır sürgen kezeŋı zar zaman emes, ker zaman boldy. Almatyǧa Äbıken Säken Seifullindı saǧalap barady. Säken Äbıkendı jaqsy qarsy alyp, qamqor bolyp, ony jaŋadan aşylǧan Qazaq drama teatryna ärtıstık qyzmetke ornalastyrady. Äbıken osy teatrda ömırınıŋ soŋyna deiın qyzmet ettı. Būl saladaǧy eŋbegı elenıp, memlekettık marapattar da aldy. Qazaqtyŋ teatr önerınıŋ ırgetasyn qalaǧan aǧa buyn ökılderınıŋ arasynda Äbıken Hasenovtıŋ esımı de qūrmetpen atalady. Onyŋ akterlık şeberlıgınıŋ teatrtanuşylar tarapynan aitylmai qalǧan kezı joq. Teatrda qyzmette jürgende Äbıkennıŋ alapat küişılıgı Almatyǧa jaiyldy» deidı osy keştı ūiymdastyruşy, belgılı küişı, QR eŋbek sıŋırgen qairatkerı Janǧali Jüzbai.
Al Astanada ötetın küi keşıne Astana men Qaraǧandy qalalarynan bırqatar belgılı küişıler men änşıler qatysady. Atap aitsaq, Qalken Qasymov, «Küi-keruen» şertpe küi ortalyǧynyŋ basşysy Qairolla Säduaqasov, Qapaş Qūlyşeva, Seken Tūrysbek, Rymhan Äbılhanūly, Edıl Basyǧaraev, Qairat Aitbaev, t.b. önerpazdar küi şertıp, än salady.
Amanǧali QALJANOV
