Ötken apta elordanyŋ mädeni ömırınde airyqşa oqiǧalarmen este qaldy. Müsılım Magomaevty eske alu keşınıŋ özı astanalyqtarǧa qanşalyqty ruhani läzzat syilasa, jeksenbı küngı D.Masuevtyŋ qoldauymen aşylǧaly otyrǧan jas pianister festivalınıŋ tūsaukeserı muzykanttar üşın ǧana emes, jalpy Astana jūrtşylyǧy üşın zor maŋyzǧa ie qūbylys desek, artyq aitqandyq bolmas.
Astana qalasy äkımdıgı men Reseidıŋ halyq ärtısı, maitalman pianist Denis Masuevtyŋ qoldauymen ötetın «Accordi di Astana» atty jaŋa muzykalyq joba keler jyldyŋ qaŋtarynan bastap şymyldyǧyn türedı. 1 qaŋtar men 10 nauryz aralyǧynda jas daryndar osynau halyqaralyq festivalge qatysuǧa öz ötınışterın beruıne bolady. Al, festivaldıŋ özı keler jyldyŋ mamyr aiynda bastalady. Älemnıŋ tükpır-tükpırınen jas talanttardy şaqyryp, jaŋa esımderdı dünie jüzıne paş etpekşı. Ümıtkerler jas erekşelıkterıne qarai ekı topqa bölınıp, saiysady. Alǧaşqy topty 11 jasqa deiıngı örender qūrasa, ekınşı topta 11-15 jas aralyǧyndaǧy jasöspırımder qatysady dep kütılude. Jüldegerlerge arnauly granttar, muzykalyq aspaptar syiǧa tartylu közdelıp otyr. Jeŋımpazdar D.Masuevtyŋ jeke qoldauyna ie bolyp, maestro olardyŋ oquy men damuyna barynşa üles qosatyn bolady. Osy festival tūsaukeserıne reseilık muzyka mamandary arnaiy at basyn būrypty. Reseidıŋ eŋbek sıŋırgen ärtısı Tatiana Berkul bastaǧan muzyka pedagogtary şeberlık synyptaryn jürgızıp, qazaq balalaryna öz tälımın üiretkenı turaly beinebaian konsertte körsetıldı.
Būl bäige halyqaralyq deŋgeide ötkızıletın tyŋ bastamaǧa ainalmaqşy. Klassikalyq muzykanttardyŋ Astanaǧa jiı-jiı kelıp tūruynyŋ özı halyqty saz önerınıŋ jauharlarymen etene jaqyndastyryp, äuezdıŋ tūnyq tūŋǧiyǧyndaǧy ınju-marjanymen qūlaq qūryşyn qandyruǧa erekşe mümkındık tudyratyn būl festivaldıŋ bererı mol bolmaq.
«Astana jūrtşylyǧy öte talǧampaz, sezımtal. Men mūndaǧy tyŋdarmandarymdy öte qatty syilaimyn. Är kelgen saiyn Astananyŋ mädeni ömırınde köptegen jaŋalyqtar bolyp jatqanyn baiqaimyn. Būl jaǧdai qatty quantady. Men Resei, Qazaqstan dep bölmeimın. Öitkenı, tyŋdarmandar ekı elde de maǧan bırkelkı, öte ystyq qabyldaidy. Men mūnda kelsem, şetelde jürgendei sezınbeimın. Sızderdıŋ dästürlerıŋızdı bılıp qaldym. Sahnaǧa şyqqanymda özıme tüsınıksız bır «himiia» sezıledı.
Bızdıŋ oilap tapqan ideiamyz «Astana akkordtary» – asa qajettı, igılıktı ıs bolatynyna senem. Menıŋ qazırgı taŋda 6 festivalım jüzege asty. «Novye imena» atty qordy basqaramyn. Daryndy balalardy oqytyp, olardyŋ muzyka älemınde qanat qaǧuyn qadaǧalaimyz. Klassikalyq muzyka özınıŋ mäŋgılık aǧartuşylyq maŋyzynan bölek, onyŋ adam janyna ruh berıp, jıgerlendıretın erekşe quaty jönınen eşbır äuezge teŋgerılmeidı. Ömırge degen qūştarlyq syilaidy. Menıŋşe, köpşılık naǧyz önerdı saǧynyp, aşyrqanyp, susamyr bolyp qalǧan siiaqty. Adamdar qazır tūma būlaqtan qanyp ışkısı kelgendei, klassikalyq muzykaǧa betbūrys jasap jatyr. Festival aiasynda arnauly baiqau ötedı. Jas ūrpaq arasynan tua bıtken talanttardy ızdestırıp, olardy älem moiyndar muzykant boluyna septesemız» dep bölıstı özınıŋ jürek-jardy tılekterımen maestro baspasöz konferensiiasynda. Maestronyŋ jan joldastary V.Spivakov, Iý.Başmet syndy älemge aty tanymal muzykanttar osy festival şeŋberınde Astanaǧa keluı äbden mümkın degen oiyn jetkızdı D.Masuev.
Jaŋa festival klassikalyq muzykanttardy tärbieleude özındık rölge ie bolarlyqtai sony qūbylys bolaiyn dep tūrǧanyn jastar jaǧy sezıne de bastaǧan syŋaily. Baspasöz konferensiiasyna jinalǧan jas muzykanttardy körıp, solai oi tüiuge bolady. Al, keşkılık konsertte D.Masuev P.İ.Chaikovskiidıŋ simfoniialyq orkestrge arnalǧan №1 konsertın oinap şyqty. Abzal Mūhitdinov dirijerlyq etken Astana qalasy Memlekettık filarmoniiasynyŋ simfoniialyq orkestrınıŋ süiemeldeuımen. Sonymen qatar ataqty pianist basqaratyn «Novye imena» qorynyŋ aşqan jas talanttary Nikita Korovin, İnga Rodina, Mariia Zaisevalar Astanaǧa arnaiy kelıp, tūsaukeser konsertınde türlı şyǧarmalardy oryndady. Olarmen qatar qazaqstandyq Aida Ahmetova, Iliias Özbekov de öz jetıstıkterımen bölıstı. Al, 7 jasar Mūrat Hidaiatov sahnaǧa şyqqanda körermen qoşemetınde şek bolmady.
|Bedelsöz
Denis MASUEV, maitalman pianist:
Menıŋşe, jalpy halyqtyq muzyka el üşın maŋyzdy. Bıraq, klassikalyq muzykanyŋ orny odan äldeqaida tereŋ, äldeqaida körkem. Men taǧy da astanalyqtarmen jüzdeskenıme öte quanyştymyn. Astana maǧan etene jaqyn bolyp barady. Äsırese, menı osy şaharmen tanystyrǧan qala äkımımen dostyǧymyzdy maqtan tūtamyn.
