Qala tazalyǧyna jauapty kommunaldyq qyzmetkerlerdıŋ eŋbegı erekşe. Olar kündız de, tünde de, kez kelgen aua raiynda jūmysyn toqtatpaidy. Olardyŋ qajyrly ärı jauapty jūmysynyŋ arqasynda qalada tärtıp pen tazalyq saqtalady. Kommunaldyq qyzmetkerler tūrǧyndarǧa qolaily jaǧdai jasau üşın jūmys ısteidı.
«Astana tazalyq» käsıpornynda qazırgı künı 1848 adam jūmys ıstese, qysqa qarai olardyŋ sany köbeiedı, sebebı qar tazalau jūmysy köp adam küşın qajet etedı. Mekeme qyzmetkerlerınıŋ ışınde Auǧan soǧysynyŋ ardagerı jäne Chernobyl apatynyŋ zardabyn joiuǧa qatysqan 12 azamat eŋbek etedı eken. Sonyŋ bırı – Beisembek Narynov.
Auǧan soǧysyna kütpegen jerden baryp, ekı jyl maidanda bolǧan Beisembek aǧa osy tazalyqqa jauapty mekemede jūmys ısteidı. Özı – Astana qalasynyŋ tumasy. Qorǧaljynda ösken. Sol jaqtan äskerge ketıp, 1979-1981 jyldary oralǧan. Auǧanstandaǧy soǧys kezınde bırneşe qalasyna kırıp, äskeri qimyldarǧa qatysty, talai ret ajal auzynan aman qaldy.
Beisembek Narynov «Astana tazalyq» serıktestıgıne 2001 jyly kelgende maşinist bolǧan. Sodan berı bır mekemede taban audarmai eŋbek etıp keledı, qazırgı künı jastarǧa körgen-bılgenın üiretken ol – ūjymda syily, qūrmettı jan, eŋbek ardagerı.
– Qysy-jazy būzylyp, ısten şyqqan tehnikalardy jöndeimın. Ystyqta-salqynda temır-tersek arasynda jürıp jūmys ısteu, ärine, oŋai emes. Bıraq jastaiymnan eŋbektenıp, qara jūmysqa erte beiımdelgendıkten, qandai şarua bolsa da tartynbai jasaimyn. Qala tazalyǧyna kerektı tehnika jiı jöndeudı, synǧanyn oŋdaudy qajet etedı. Kömekşım kerek temırlerdı, qosalqy bölşekterdı äperıp tūrsa, jöndeu jūmysyna alaŋdamai kırısemın. Eskısın jöndeimın nemese qaita qūrastyramyz, äiteuır jūmysy köp, beinetı jetıp artylatyn, bıraq ūjymdastar arasynda qadırlı käsıp qoi slesar degen, oǧan jastar arasynan keletınder tym az. Bız sekıldı jürmeidı, olar tez aqşa tabatyn käsıptı meŋgergısı keledı. Osy qynjyltady menı, – deidı naǧyz eŋbek adamy Beisembek Qarabaiūly.
Kölıkterdı, tehnikalardy jöndeu jönındegı slesar – būl tehnikalyq qyzmet körsetıp, bölşekteudı, jöndeudı, auystyrudy, dänekerleudı, jinaudy jäne retteudı jürgızetın maman. Slesardıŋ mındetıne avtomobilderge tehnikalyq qyzmet körsetu jäne ony jöndeu, eŋbektı qorǧau, qauıpsızdık tehnikasy men örtten qorǧau erejelerınıŋ saqtaluyn baqylau, paidalanu materialdarynyŋ şyǧynyn esepke alu kıredı. Ol fizikalyq tözımdılıgı men küşı airyqşa, şiraq, tehnikalyq intellekt, zeiındı, baiqampaz, şydamdy, jauapkerşılıgı joǧary, apat dabyldaryna tez jauap beretın käsıbi maman boluy tiıs. Būl rette slesar käsıbınıŋ qyr-syryn meŋgerıp, jastardy üiretuden jalyqpaǧan Beisembek Narynov sekıldı eŋbek ardagerın atap ötu oryndy.
Şynynda da, qalanyŋ qym-quyt tırşılıgınde elorda tūrǧyndaryna qolaily jaǧdai jasau üşın jūmys ıstep jatqan kommunaldyq qyzmetkerler eŋbegı qandai da bır qoldauǧa laiyq.
