Täuelsızdıktıŋ 30 jyldyǧy aiasyndaǧy Ǧ.Müsırepov atyndaǧy Qazaq memlekettık akademiialyq balalar men jasöspırımder teatrynyŋ elordaǧa gastroldık sapary anşlagpen öttı. Almatylyq baiyrǧy öner ūjymy balalarǧa bazarlyq retınde «Jetı laq» orys halyq ertegısı jelısımen sahnalanǧan «Tuǧan kün» spektaklın, Iliias Jansügırovtıŋ «Qūlager» saundramasyn, Saiyn Mūratbekovtıŋ «Jusan iısı» jäne Äzılhan Nūrşaiyqovtyŋ «Mahabbat, qyzyq mol jyldar» qoiylymdaryn ūsyndy.
«Tuǧan kündı» qazaq tılıne audaryp, inssenirovkasyn jasaǧan – Ūlan Bolatbek. Al qoiuşy rejisserı – Şaǧuan Ümbetqaliev. Al «Qūlagerdı» jas rejisser Farhat Moldaǧali sahnalady.
Qazaq ädebietın teatr sahnasyna köşıru kerek. Būl oi köpten berı aitylyp jür. «Jusan iısı» dramasy osy oidy bekıte tüsedı. Biyl tuǧanyna 85 jyl tolyp otyrǧan klassik qalamger Saiyn Mūratbekovtıŋ «Jusan iısı» jäne «Jabaiy alma» povesterınıŋ sintezınen tuǧan spektakl öte äserlı şyqqan. Tıptı, jazuşynyŋ qos tuyndysyn oqymaǧan adam spektakldegı oqiǧa bır şyǧarmadan alynǧan dep oilap qaluy mümkın. Būl tūrǧydan dramanyŋ qoiuşy rejisserı Jūldyzbek Jūmanbaidyŋ eŋbegın erekşe atap ötu kerek. «Jusan iısı» men «Jabaiy almadaǧy» oqiǧalardy ol ädemı qabystyrǧan.
Al qazaq ädebietın sahnaǧa köşırude orys teatrlarynan üirenu kerek. Olardy būl – qalyptasqan dästür. Dälel retınde elordadaǧy M. Gorkii atyndaǧy Memlekettık akademiialyq orys drama teatry repertuaryndaǧy Vasilii Şukşinnıŋ äŋgımelerınen qūralǧan «Jarqyn oilar» spektaklın aluǧa bolady. Tek qazaq teatry rejisserlerıne «qazır dramaturgiia joq» dep auyzdy qu şöppen sürtpei, audarma spektaklderge äues bola bermei, töl ädebietımızge bet būru kerek, ızdenıs kerek.
Äzılhan Nūrşaiyqov – baqytty jazuşy. «Mahabbat, qyzyq mol jyldar» romany HH ǧasyrdyŋ şiregındegı jastardyŋ ǧana emes, HHI ǧasyr ūrpaqtarynyŋ da süiıktı şyǧarmasyna ainalyp kele jatyr. Būǧan tuyndynyŋ ekrandaluy, teatr sahnasyna şyǧaryluy ülken sebep bolyp otyr.
Ǧ. Müsırepov atyndaǧy Qazaq memlekettık akademiialyq balalar men jasöspırımder teatrynda belgılı qalamgerdıŋ äigılı şyǧarmasy jelısımen qoiylǧan spektakldıŋ premerasy biylǧy jazda ǧana öttı. Osy qoiylymmen teatrdyŋ elordadaǧy gastroldık sapary tüiındeldı.
Spektakldıŋ qoiuşy rejisserı Farhad Moldaǧali qoiylymdy zamanaui nūsqada ūsynyp, osy zamanǧa tym jaqyndatyp jıbergendei. Būl, bır jaǧynan, zaman aǧymynan qalmaudyŋ amaly bolsa, ekınşıden, qazırgı jastardy qyzyqtyru üşın jasalǧanyn tüsınemız. Alaida aǧa buynnyŋ talǧamy mülde eskerılmegen siiaqty.
Keibır körınısterdı özımız de qabyldai almadyq. Mäselen, Erboldyŋ soǧystan oralyp, oquǧa qaita kelgendegı kurstas qyzdarynyŋ biı ersı körındı. Rasymen, jiyrmasynşy ǧasyrdyŋ qyrqynşy jyldardaǧy jastar būlai bilemedı.
Spektaklde pauza da köp. Qoiylymda şyrqalatyn änder de jastardy bolmasa, ülkenderdı qyzyqtyrmaidy. Akterlerdıŋ oiyny da älı şikı, eş äserlendırmeidı. Premera taiauda ǧana bolǧannan keiın kele-kele ysylatyn şyǧar.
Öz basymyz, Müsırepov teatryn emes, elordadaǧy «Jastar» teatrynyŋ spektaklın tamaşalap otyrǧandai boldyq. Farhad Moldaǧali plastikaǧa bıraz köŋıl bölgen eken. Ol bızge taŋsyq emes, Nūrqanat Jaqypbaidyŋ qoltaŋbasynan tanyspyz. Rejisserge spektakldı älı de jetıldıru kerek siiaqty.
