98 jasqa qaraǧan şaǧynda Qazaqstannyŋ Halyq jazuşysy, KSRO Memlekettık syilyǧynyŋ laureaty, Qazaqstannyŋ Eŋbek Erı Äbdıjämıl Nūrpeiısov dünieden ozdy. Keşe Almatyda jūrtşylyq ädebietımızdıŋ abyzyna ainalǧan klassik qalamgerdı soŋǧy saparǧa şyǧaryp saldy.
Memleket basşysy Qasym-Jomart Toqaev qalamgerdıŋ jaqyndary men tuystaryna köŋıl aitu jedelhatyn joldady.
Jedelhatta Äbdıjämıl Kärımūlynyŋ sūrapyl soǧysty bastan keşkenın, elge oralǧan soŋ qazaq ädebietın örkendetuge sübelı üles qosqanyn atap öttı.
– Ūzaq jylǧy şyǧarmaşylyq qyzmetı jemıstı boldy. «Qan men ter» trilogiiasy, «Soŋǧy paryz» dilogiiasy siiaqty tuyndylary synşylar men oqyrmandar tarapynan joǧary baǧasyn aldy. Zaman jügın kötergen romandary älemnıŋ köptegen tılderıne audaryldy. Äbdıjämıl Kärımūlynyŋ jaŋa belestı baǧyndyrǧan qazaq ädebietın şetelge tanytuǧa sıŋırgen eŋbegı orasan zor. Ömır boiy qolynan qalamy tüsken joq. Qazaq elınıŋ ruhani-mädeni salasyn damytu jolynda ölşeusız qyzmet atqardy. Önegelı ǧūmyr keşıp, soŋyna ädebi mol mūra qaldyrǧan Äbdıjämıl Kärımūlynyŋ jarqyn beinesı ūmytylmaidy. Halqymyz esımın ärdaiym ardaq tūtady.
Marqūmnyŋ imany salamat, jany jännatta bolsyn, – delıngen Prezidenttıŋ jedelhatynda.
1924 jyldyŋ 22 qazanynda Qyzylorda oblysy Aral audanynda tuǧan maidanger-jazuşy sūrapyl soǧysta jürıp «Kurliandiia» romanyn jazdy. Būl roman 1958 jyly «Kütken kün» degen atpen qaita jaryq kördı. Otanǧa oralǧan soŋ Qazaq Memlekettık universitetı men M.Gorkii atyndaǧy Ädebiet institutynda oqydy.
1962-1964 jyldary «Jūldyz» jurnalynyŋ bas redaktory boldy. QazKSR Joǧarǧy Keŋesınıŋ deputaty boldy. 1964 jyldan berı ūzaq jyldar boiy bıryŋǧai şyǧarmaşylyqpen ainalysty.
Jazuşynyŋ abyroiyn asyrǧan «Qan men ter» trilogiiasy men «Soŋǧy paryz» romany dünie jüzı halyqtarynyŋ köptegen tılderıne audarylǧan. Sonymen qatar ol Anton Chehovtyŋ, Aleksei Gorkiidıŋ, Nazym Hikmettıŋ, ispan jazuşysy A.Kesonyŋ şyǧarmalaryn qazaq tılıne tärjımalady. Ūlttyq ädebiettı damytudaǧy airyqşa eŋbegı üşın ekı jarym jyl būryn jazuşyǧa Memleket basşysy Qasym-Jomart Toqaevtyŋ Jarlyǧymen Qazaqstannyŋ Eŋbek Erı ataǧy berıldı.
Jazuşymen qoştasu räsımıne Memlekettık hatşy Erlan Qarin qatysyp, söz söiledı.
