Ädılbek Jaqsybekov, Astana qalasynyŋ äkımı: ASTANALYQTARDYŊ ARYZ-ŞAǦYMDARY AIRYQŞA NAZARǦA ALYNADY
Keşe Astana äkımdıgınde qala basşysy Ädılbek Jaqsybekovtıŋ töraǧalyǧymen apparattyq keŋes öttı. Keŋes barysynda äkım qaladaǧy aǧymdaǧy jaǧdai boiynşa eseptı tyŋdap, problemalyq jäne äleuettı mäselelerge toqtaldy.
– Memleket basşysy aldymyzǧa auqymdy ärı kürdelı mındetter qoidy. Olar ekonomikalyq ösımge, elordanyŋ investisiialyq klimatyn jaqsartuǧa serpın beredı. Būl qūrylys, kölık jäne basqa da maŋyzdy salalarǧa, sonyŋ ışınde energiia tiımdılıgın arttyruǧa baǧyttalǧan salalarǧa qatysty, – dedı Ä.Jaqsybekov.
Atalǧan mäsele «EKSPO-2017» halyqaralyq mamandandyrylǧan körmesın ötkızu qarsaŋynda asa özektı. Bügınde Astanany el ordasy, Euraziianyŋ geografiialyq ortalyǧy retınde ǧana emes, sondai-aq, «jasyl ekonomikany» damytuǧa bet alǧan tehnologiialyq, ǧylymi, «aqyldy» qala retınde de tanystyru kerek.
Jaŋa mındetterdı jüzege asyru üşın barlyq qalalyq qūrylymdar jūmylyp jūmys ısteu kerek.
– Sızderdıŋ ärqaisylaryŋyz Astanany damytudyŋ ortaq, jahandyq maqsatyn tüsınuge, tūtastai jaǧdaidy körıp, özara qalai äreket etu keregın ūǧynuǧa tiıssızder. Apta saiyn ötkızıletın osyndai jinalystar sol üşın qajet, – dedı elorda äkımı.
Qala basşysy kommunaldyq qyzmetterdıŋ jūmysyn jaqsartu jönındegı mäselelerge basa nazar audardy. Būl eŋ aldymen qar tazalauǧa, qalany jylu men elektr energiiasymen qamtuǧa qatysty.
Äkım Astana äkımdıgınıŋ resmi saityndaǧy «Virtualdy qabyldau», «Halyqtyq baqylau» aidarlaryna jäne «051» qyzmetıne kelıp tüsken ötınışter men şaǧymdardy jeke baqylauyna aldy. Qala äkımı orynbasarlary men audan äkımderıne bırınşı kezekte azamattardan kelıp tüsken aryz-şaǧymdardy tiıstı şeşımın tapqanşa nazarda ūstaudy tapsyrdy.
Sonymen qatar, qala basşysy avtotūraqtar mäselesın de köterdı. Jaqynda jol qozǧalysy erejelerınıŋ jaŋa redaksiiasy qaita jaryq körgen edı. Oǧan säikes kölıktı jol boiynda qaldyruǧa
tyiym salynǧan. Alaida, qala basşysy bügınde qalada avtotūraqtar men kölık qoiatyn arnauly oryndardyŋ jetıspeuşılıgıne bailanysty kölık ielerın qoldap, IID qyzmetkerlerıne osyndai jaǧdailardy nazarǧa aludy tapsyrdy.
Būdan basqa, äkım Prezidenttıŋ jaiau jürgınşılerge arnalǧan jerasty jäne jerüstı ötkelderın salu jönındegı tapsyrmasyn oryndau qajettıgıne toqtaldy. Būl da jol qauıpsızdıgıne, keptelısterdıŋ azaiuyna oŋ äserın tigızbek.
Sonymen qatar, qala basşysy zaŋsyz sauda faktılerı boiynşa reid jürgızudı, tärtıp būzuşylarǧa qatysty tiıstı äkımşılık şaralar qabyldap, būdan bylai mūndai jaǧdailarǧa jol bermeudı tapsyrdy.
Sondai-aq, apparattyq keŋeste jaŋadan taǧaiyndalǧan Astana qalasy äkımı apparatynyŋ basşysy Edıl Mamytbekov, Astana qalasynyŋ prokurory Sabyrjan Bekbosynov pen Astana qalasy boiynşa Memlekettık kırıs departamentınıŋ basşysy Äbılqaiyr Sqaqov tanystyryldy.