Astanada 71-ınşı Kann festivalınıŋ «Eŋ üzdık äiel beinesı» jüldesınıŋ iegerı Samal Esliamovanyŋ baspasöz mäslihaty öttı. Jiynǧa Mädeniet jäne sport ministrı Arystanbek Mūhamediūly qatysty. Appaq köilektı aru qasymyzǧa aqyryn ǧana keldı. Aldyndaǧy 30-40 diktofonǧa tıl qatty sosyn. Ünı jaryqşaqtana şyqty. Auzynan qatty quanyp tūrmyn degen söz şyqqan joq mülde. Jai ǧana «quanyştymyn» dedı. Tarbaǧataidy toǧyz ainalyp, qolyndaǧy syilyqqa jetken jan siiaqty jaibaraqat.
Ministr Samaldyŋ jeŋısın Olimpiada oiyndarynan da joǧary baǧalady. Kannda älemdı özıne qaratqan arudyŋ qazaqşa söilegenıne quanǧanyn jetkızdı. Samalǧa qazaqtyŋ zerlı şapany jabyldy. Qyzdyŋ sūlulyǧymen astasyp, närkes közderımız qaryqty.
«Aktrisa bolu armanym emes edı» dedı sybyrlai Samal. Oǧan ömırdıŋ özı äkelıptı. «Būl Kannǧa jetı jyl ter töktım» dedı aqyryn ǧana. Onyŋ aldynda 12 jasynda «Qyzǧaldaq» filmınde oinaǧan. Qazaq qyzy turaly. Endıgısı – qyrǧyz arudyŋ taǧdyry. Balasyn tastap ketetın tasjürek eken. Aq qar, kök mūzda tabanynan ötken syzdan ökşesı jarylypty. Suyq qaryp, jylapty.
Filmdegı ana rölı – Samaldyŋ jan jüregındegı obrazy. Būǧan deiın de bırneşe anany oinaǧan. Endı ömırde ana bolǧysy keledı.
Samaldy tanyǧan rejisser Sergei Dvorsevoi da bızdıŋ topyraqtan. Özımızdıŋ Şymkentte tuǧan. Rejisserdıŋ äke-şeşesı älı de Şymqalada tūrady. «Aikanyŋ» rejisserı «Qazaqfilmge» şaqyrylǧanyna quandyq. Ol da «endıgı jerde qazaqqa qyzmet etuge daiynmyn» dep kesıp söiledı.
Kannǧa deiın aktrisa älemdık rejisserden şaqyrtu alǧan. Jüldelı bolǧan soŋ dat kinogerler qyzyǧypty. Samalǧa «Özıŋızdı qai jerde erkın sezınesız? Kinoda qandai biıktı taǧy baǧyndyrasyz?» degen saualǧa «Qazaqstanda» dep jymiyp jauap berdı. «Būl – men üşın ülken jetıstık. Toqtap qalmaimyn. Osy saladan ketpeimın. Esımımnıŋ özı qozǧalysty bıldıredı. Şyŋǧa bıtken şynar bop tūra beremın» dedı. Samaldyŋ beinesı – qyryq şyraqty äieldıŋ bolmysy. Müjılıp, tausylyp ketpeidı. Ömırdıŋ şyŋ-qūzy şynardy teŋseltuı mümkın. Tübırınen jūlyp kete almaidy tek. Mūny soltüstıkte kolledjdı tauysyp, GİTİS-ke tüsken şynaşaqtai kezınde-aq baiqatqan.
Ol sabyrly eken. Şi jügırtken sūraqtarǧa da salmaqty jauap berdı. Qazaqşa qysylmai söiledı.
İran rejisserınıŋ kinolaryn ūnatady eken. Al Kannda jūmysy ekranǧa şyqpai jatyp, bastapqy nūsqasy bäigege tüsken. Dvorsevoidyŋ aituynşa, kinonyŋ montajy, tolyq jūmysy bır jarym aidan soŋ ǧana aiaqtalady. Älemnıŋ tükpır-tükpırı men qazaqstandyq körermen «Aikany» tek küzde ǧana köre alady.
Qūşaǧy qatty halyqtyŋ ūly ekenımızdı taǧy baiqattyq. Bekzat bahadür jeŋıspen oralǧanda da söitkenbız. Ystyq emosiiany salqyn aqylǧa jeŋdıre almaimyz ǧoi sol! Jurnalister jamyrai mazaladyq.
Samaldyŋ üzdık oiynynan keiın bala tastau tyiylatyn şyǧar. Bala asyrap alǧysy keletınder köp qoi. Solarǧa naqty oi saldy Samal. Sol üşın de raqmet, sabyrly sūlu!
