«Senderge būrynǧylarǧa paryz etılgendei oraza paryz etıldı» dep Allanyŋ Kälämı būiyrǧan mındettı būljytpai oryndap, şıldenıŋ şılıŋgırın eleŋ qylmai oraza tūtqan künder de öttı. Barşa mūsylman qauymnyŋ ūlyq merekesı – Oraza ait bastaldy.
Taŋmen talasa «Nūr Astana» meşıtıne aǧylǧan qauymnyŋ qatarynda bız de boldyq. Ait namazynda syrtta qalmai, erterek baryp meşıttıŋ ışıne kırıp, aldyŋǧy qatardan oryn alsaq degen oi bızdıkı. Qanşa erte barsaq ta meşıt ışı lyq toly adam. Bırın bırı Oraza aittarymen qūttyqtap, sälemdesken jūrt seŋdei soǧylysady. Jüzderınen şattyq lebı esken köpşılıkke qarap erıksız klassik jazuşymyz Beiımbet Mailinnyŋ «Ait künderı» atty şaǧyn äŋgımesı sanaŋa sap etedı. Qazaqtyŋ basyna qara būlt üiırılgen zaman oiyŋa oralǧanda, Täuelsızdıgıŋe täu etpei kör. «Jasasyn azattyq!» dep imamnyŋ jasaǧan dūǧasyna bet sipap, belı bügılgen qariialardyŋ tılegıne tık tūryp «aumin» aitasyŋ. Sebebı… sebebı ait azap sekıldı zaman bolǧan. Beiımbet aitady, tarih söileidı. «…Auyldan oŋaşa, tomardyŋ jel jaǧynda üş qara üi tūr. Maŋaiynda qybyr etken mal da joq, yzyndaǧan masa da joq, asylǧan qazan da joq, kezıp jürgen adam da joq… Künbatys jaq şettegı üidıŋ köleŋkesınde, üstı-basy örım-örım bolyp, bükşiıp on ekı-on üş jasar bır kyz bala men bır orta jasty äiel otyr. Jüzderı sarǧylt, közderı ısıŋkı… «Uf!» dep kürsınedı. Äldenenı oilaidy… Aidai älem quanyp jatqan «ait» oǧan azap sekıldı…». Osybır süreŋsız suretke üŋılıp, täubeŋe kep, Allaǧa sansyz madaq aitasyŋ…
Būl künı «Nūr Astana» meşıtıne ait namazyna kelgen jūrttyŋ ūzyn sany oilanbai-aq alty-jetı myŋdy körsettı. Meşıttıŋ ışın qoiyp, syrtyna simai iın tıresken köpşılık imamnyŋ uaǧyzyn tyŋdap, namazǧa ūiydy. Jämiǧat marqūm bolǧandarǧa Qūran baǧyştap, tırıge bereke tıledı. Ūlyq merekege orai osy meşttıŋ bas imamy Nauryzbai qajy Taǧanūlyna jolyǧyp, bır-ekı auyz sözge tarttyq.
– Bismillahir rahman rahim! Jaratuşy Jappar İemızdıŋ syilaǧan qasiettı merekesı – Oraza aity barşamyzǧa berekelı de qūtty bolsyn. Ait degen sözdıŋ maǧynasy mereke degendı bıldıredı. Būl künı barlyq adam köŋıldı, keŋ, keşırımdı bolyp, köp jaqsylyq jasauy kerek. Ait – könenı artqa tastap, jaŋany alǧa baǧyt-baǧdar qyp, jaŋaǧa qadam aiaq basu. Būl mūsylman qauymynyŋ quanyşqa keneletın künı. Paiǧambarymyz būl meiramdy qatty qasterlep, osy künı köŋıldı jurudı bızge eskertıp ketken.
Qazaqstan Mūsylmandary Dıni Basqarmasy 2018 jylǧa deiıngı aralyqty «Dın men dästür jyly» dep jariialady. Mūndaǧy maqsat qazaq halqynyŋ dästürın jaŋǧyrtu. Qoldan kelgenşe dästür men dındı sabaqtastyryp halyqqa jetkızu. Öitkenı bızdıŋ keibır bauyrlarymyz dästür men dındı qarsy qoiyp, kereǧar pıkırler aityp jatady. Sol üşın osy bastama qolǧa alyndy. Sonyŋ aiasynda bügın Astana qalasyndaǧy Äzıret Sūltan meşıtınde, Säduaqas qajy Ǧylmani meşıtınde, «Nūr Astana» meşıtınde bızdıŋ ökıldık arnaiy mädeni şaralardy ūiymdastyryp jatyrmyz. Meşıtter aldyna kiız üiler tıgılıp, dästürlı änder şyrqalady. Ūlttyq oiyndar ozdyrylyp, jeŋımpazdarǧa syi-siapat ülestırıledı. Barlyǧymyz bauyrymyz bütın, basymyz esen, orazadan orazaǧa aman-sau jete bereiık, – dedı bas imam. «Äumin!» aittyq.
Yrysbek DÄBEI
