Är deŋgeidegı äkımderdıŋ halyq aldynda esep beruı jaqsy ürdıske ainaldy. Jyl bastalysymen audan äkımderı köpşılıktıŋ aldyna şyǧyp, ötken jyldaǧy atqarylǧan ısterge toqtalyp, osy jyly ne josparlanǧany turaly baiandaidy. Būǧan qosa qala äkımı de kün tärtıbındegı mäselelerdı şeşuge negız alady.
Aşutas mäselesı äbden jyr boldy
Soŋǧy jyldary men de osyndai jiyndardan qalmai qatysatyn bolyp jürmın. Biyl Almaty audanynyŋ äkımı Ädılbek Särsenbaevtyŋ esep bergen kezdesuıne bardym. Audan äkımınıŋ baiandamasynan keiın tūrǧyndar özderın tolǧandyrǧan sūraqtaryn qoia bastady. Kezegım kelgende men de söz alyp, neşe jyldan berı eskerılmei jürgen özım tūratyn Aşutas oramyn tegısteu, inerttı materialmen sebu jūmystaryn jäne köktemde üi maŋyna otyrǧyzuǧa köşetter bölu turaly ötınışımdı jetkızdım. Menıŋ būl saualdaryma jauap bergen audan äkımı sol jiynǧa qatysyp otyrǧan tiıstı bölım basşylaryna osy mäselelerdı nazardan tys qaldyrmaudy tapsyrdy. Jalpy, Aşutas oramyn tazalau turaly ötınışım 2015 jyly bastalǧan-dy. Sol jyldyŋ 26 nauryzynda Almaty audany äkımınıŋ bas inspektory G.Esmaǧambetov qol qoiǧan hat alǧanmyn. Onda aua raiy aşylysymen osy oramdy tazalau jūmystary bastalatyny jazylǧan. Alaida sol jyly eşteŋe ıstelgen joq. Kelesı, 2016 jyldyŋ 19 qaŋtarynda sol kezdegı Almaty audanynyŋ äkımı E.Bölekpaevtyŋ esep beru kezdesuınde osy sūraqty qaita qoidym. Bır aidan keiın (19 aqpan künı) äkımnıŋ orynbasary B.Bulatbekov qol qoiǧan hat keldı. Onda «…Öz kezegınde Almaty audany äkımınıŋ apparaty aǧymdaǧy jyldyŋ ekınşı toqsanynda Aşutas köşesın tegısteu jäne inerttı materialmen sebu jūmystary jürgızıletın bolady» delıngen bolatyn. Ol jyly da eşqandai jūmys ıstelmedı.
2017 jyldyŋ basynda Astana qalasy äkımdıgı «Belsendı azamat-2017» şarasynyŋ şeŋberınde «Aşyq esık künı» ıs-şarasyn ötkızdı. Oǧan da baryp, özımdı mazalap jürgen sūraqty taǧy qoidym. Köp ūzamai qala äkımınıŋ orynbasary Q.Aitmūhametov qol qoiǧan hat keldı. Onda būl jūmystyŋ 2017 jyldyŋ ekınşı jartyjyldyǧynda jüzege asyru josparlanyp otyrǧany turaly jazylǧan. Sonymen ol jyl da öte bardy.
Biyl būl saualmen Astana qalasy äkımdıgındegı joldardy jöndeu jäne salu bölımınıŋ basşysy Asqar İsakovke bardym. Jūmystardyŋ köp ekendıgın aityp, jaqyn arada ol oramda da jöndeudıŋ bastalatynyn aityp, şyǧaryp saldy. Būl äŋgımenıŋ bolǧanyna da tört ai uaqyt öttı. Eş nätije şyqpady, jūmys älı bastalǧan joq.
Köşetterı keuıp, otynǧa ainalypty
Al köşetter böluge qatysty qoiylǧan saualǧa 19 aqpan künı İ.Tleuov qol qoiǧan hat keldı. Onda köşetter säuır aiynda ötetın jalpyqalalyq senbılık şeŋberınde bölınetındıgı turaly habarlapty. Säuır aiynyŋ basynda Almaty audany äkımdıgıne barǧanymda būl jūmystyŋ İslam esımdı mamanǧa tapsyrylǧanyn bılıp, sol jıgıtke jolyqqanymda: «Aǧa, 15 säuır künı maǧan habarlasyŋyz» dep telefon nömırın berdı ol. Sol nömırge aptasyna bır ret qoŋyrau şalyp tūrdym. Köbınde qoŋyrauyma jauap bermedı. Jauap bergen künnıŋ özınde «mıne, bergelı jatyrmyz» degen sözdermen şılde aiyna da jettık. 2 şılde künı habarlasqanymda da «bügın aparady, sızdıŋ telefonyŋyzdy berdım, ol kısı sızben özı habarlasady» dedı. Tüs aua bır azamat habarlasyp, köşet äkeletının aitty. Ol kezde men üide emes edım. Mekenjaiymdy aityp, köşetterdı esık aldyna qaldyryp ketulerın ötındım. Keşkısın üige kelsem, aulada bır arqadai otyn jatyr. Şynynda da, köşetter keuıp, otyn bolyp qalǧan. Işınen tört-beseuın taŋdap alyp otyrǧyzdym, önbedı, älı tūr. Aqyry kelesı jyly şyǧar dep ümıttengennen basqa amal qalmady.
Tym bolmaǧanda aialdamaǧa qalqa kerek
Endı «Astana aqşamy» gazetı arqyly bilık ökılderıne taǧy bır ötınışımdı aitpaqpyn. Bızdıŋ «Dostyq» dep atalatyn şaǧyn audanǧa №80 avtobus qana qatynaidy. Onyŋ jürıs uaqytynyŋ aralyǧy – 15-20 minut. Keide odan da köp kütemız. Al bızdıŋ «Bırınşı būrylys» degen aialdama aşyq alaŋda, jel ötınde tūr. Tym bolmaǧanda sol aialdamaǧa jelden, jauyn-şaşynnan qorǧaityn bır qalqa ornatyp berse eken degen tılegımız bar.
Marat ÄBDRAHMANOV,
zeinetker
