Almaty audandyq №2 sotynyŋ sudiasy Ubaidulla Qoşanov Astana qalasynyŋ aiyqtyrǧyşynda nauryz aiynda köz jūmǧan Nikolai Krivenkoǧa qatysty qylmystyq ıstı qarady.
Aiyptaluşy oryndyǧynda – tört adam. Olar – polisiianyŋ küzet qyzmetınıŋ serjanty Berık Myrzabekov jäne Astana qalasyndaǧy Medisinalyq-äleumettık oŋtailandyru ortalyǧynyŋ qyzmetkerlerı – Saiat Satyn, Farhat Qambetov jäne Sūŋǧat Temırǧaliev.
Polisiia qyzmetkerıne «qyzmet ökılettıgın asyra paidalanu» jäne «abaisyzda kısı ölımıne äkelgen densaulyqqa qasaqana auyr jaraqat salu» aiyby taǧylsa, aiyqtyrǧyş feldşerı men sanitarlary «abaisyzda kısı ölımıne äkelgen densaulyqqa qasaqana auyr jaraqat salu» baby boiynşa kınälanyp otyr.
Köktemnıŋ jaima şuaq künderınıŋ bırınde Nikolai Krivenkony dostary qonaqqa şaqyrady. Aldyna kelse, aşy sudan köp tartyna qoimaityn jiyrma toǧyz jastaǧy jıgıt būl joly öz şama-şarqyn baǧamdai almai qalsa kerek, otyrystyŋ orta tūsynda şataq şyǧaryp, qasyndaǧylar ony taza auaǧa alyp şyǧady. Aulada bıraz otyrǧan soŋ Nikolai özıne ılesıp jürgen serıgıne «üiden tıskebasar men bır şişa araq alyp şyqşy» dep būiyrady. Ol mūnyŋ aitqanyn ekı etpeidı. Osydan keiın Nikolai «keter aiaq» dep bır-ekı riumkany tamaǧynan ötkızıp jıberedı de, «üige kettım» dep ornynan tūryp ketedı.
Arada qanşa uaqyt ötkenı belgısız. Jetı tünde Bauyrjan Momyşūly daŋǧyly boiyndaǧy aulada tūrǧan avtokölıkterdıŋ faralary bırınen soŋ bırı pytyrlap synyp, äinekterı şaǧyla bastaidy. Tūrǧyndardyŋ dabyly boiynşa jedel jetken tärtıp saqşylary qolyndaǧy bılektei temırdı ainala sıltep, aiqai salyp jürgen N.Krivenkony ūstap, aiyqtyrǧyşqa jetkızedı.
Tärtıp saqşysy men aiyqtyrǧyş qyzmetkerlerınıŋ aituynşa, ol būlarǧa auzyna kelgenın aityp, ainala qolyn sermep, pärmendı qarsylyq körsetken soŋ ony sabasyna tüsıru üşın şarasyzdan küş qoldanuǧa mäjbür bolǧan. Al osy sättıŋ keibır tūstary mekemedegı beinekameraǧa jazylyp qalypty. Ol sotta aiǧaq retınde körsetıldı. Sol beinejazbada qolyna kısen salynǧan Nikolai Krivenkonyŋ aiaǧy da kendır jıppen matalyp tastalǧany anyq baiqalady. Etpetınen jatyp būlqynyp jatqan N.Krivenkoǧa Medisinalyq-äleumettık oŋtailandyru ortalyǧynyŋ feldşerı S.Satyn alkotester alyp keledı. Ol ony qoldandy ma, qoldanǧan joq pa, ol jaǧy körınbeidı. Keiın anyq körıngenı – bıraz uaqyt ötkende N.Krivenkonyŋ qol-aiaǧy bosatylady da, ol temır torly kameraǧa otyrǧyzylady. Osy kezde qoly bosaǧan Nikolai Saiatty qūlaq şekeden qūlaştap ūrady.
Aşuǧa bulyqqan feldşer men polisiia serjanty qol jūmsauşyny edenge alyp ūryp, tepkıleidı. Bıraz uaqyttan keiın polisiia qyzmetkerı jügırıp ketıp, kelesı bölmeden taiaǧyn alyp kelıp, qūlap jatqan adamdy üstı-üstıne tömpeşteidı. Tıl tigızgen boluy kerek, sälden keiın ekı sanitar da N.Krivenkony ūryp-soǧa bastaidy. Osy soqqylardan keiın N.Krivenko aiyqtyrǧyşta köz jūmady.
Ainalasyna aibat şegıp, keude soqqan marqūm Nikolai Krivenko kım edı? Pıkırler ärtürlı. Eŋ negızgısı – orda būzar otyz jasqa qadam basqan onyŋ orta bılımı bolǧan. Stepnogorsk qalasynyŋ tumasy. Küibeŋ tırşılık qamymen Astana qalasyna kelgenıne ekı jylǧa taiap qalypty. Osydan jyl jarym būryn jataqhanaǧa qol jetkızıp, «alda tūrmysymdy būdan da görı jaqsartamyn» dep ūmtylǧan körınedı. Bazardan jalǧa konteiner alyp, qūrylys materialdaryn satumen ainalysqan.
Aǧaiyn-tuysqandary onyŋ ışımdıkke onşa äuestıgı joq dese, kerısınşe, ony bıletın jūmystastary «aşy suǧa ket ärı emes edı» dep baqilyq adamnyŋ artynan jaman söz aitpaitynyn bılıp, ol pıkırdı tarqatpady.
«Qoǧamdyq tärtıp saqşysy sanalatyn, pogon taqqan şendılerdıŋ qyzmet babyn asyra paidalanyp, älımjettık jasauy keiıngı kezde jiılep ketken joq pa?» Osy sūraq qazır ärkımnıŋ kökeiınde tūrary sözsız. Äzäzılge arbalyp, özı de alasūryp, älı qūryp jatqan adamdy kezekpe-kezek üstı-üstıne ūryp-soǧudy ne deimız? Qol-aiaǧy matauly jandy rezina taiaqpen basynan ūru polisiia serjantyna qajet pe edı? Meilı ol tärtıp būzsyn, tıl tigızsın, onyŋ qol-aiaǧy bailauly edı ǧoi.
Marqūm bolǧan jıgıttıŋ anasy Tatiana Krivenko sotta söilegen sözınde balasynyŋ, küdıktıler aityp otyrǧandai, şekten şyqqan daraqy, oǧaş mınezın eşqaşan baiqamaǧanyn aitty. Qaita onyŋ auzynan ömır süruge qūştarlyqty, aldyna maqsat qoiyp, «biyl üilenemın, sosyn üi alamyn» degen sözderdı jiı estitınmın dedı.
Sot būrynǧy polisiia serjanty Berık Myrzabekovtı 10 jylǧa bas bostandyǧynan aiyrdy. Al Medisinalyq-äleumettık ortalyqtyŋ feldşerı Saiat Satyn men sanitarlar – Sūŋǧat Temırǧaliev pen Farhat Qambetovke 8 jyl jaza kestı.
Ükım zaŋdy küşıne engen joq.
Taŋatar TÖLEUǦALİEV
