Elımızde Azamattyq hal aktılerın tırkeu organdarynyŋ qūrylǧanyna biyl 95 jyl tolady. Osy aituly şara qarsaŋynda Astana qalasy äkımınıŋ orynbasary Andrei Lukin bır top AHAJ qyzmetkerlerın qabyldap, elorda äkımı Ädılbek Jaqsybekovtyŋ atynan alǧys hatpen marapattady.
Adam alǧaş dünie esıgın aşqanda ony aldymen arnaiy qūjatpen qamtamasyz etetın organ – AHAJ. Memleket ışınen jaŋa bır memleket, iaǧni jas otau şaŋyraq kötergende olarǧa batasyn berıp, qūjat retınde rastaityn da osy qūzyrly mekeme. Sondyqtan būl organnyŋ aituly merekesı elımız üşın de maŋyzdy. Sala qyzmetkerlerıne qūttyqtau lebızın jetkızgen A.Lukin osyǧan aiyryqşa toqtaldy.
Bızdıŋ ärqaisymyz ömırge maŋyzdy qadam jasap, şaŋyraq kötergende sızderdıŋ tarapyŋyzdan jyly sözder, qūttyqtaular men jaqsy tılekter estimız. Şynaiy nietpen aitylǧan jaqsy sözderıŋız qanşama otbasynyŋ berık qalyptasuyna septıgın tigızdı. Jas şaŋyraqtyŋ alǧaşqy qadamyn qūjat retınde rastau da käsıbi bılıktılıktı talap etetın jūmys. Sızder odan özge de köptegen maŋyzdy qyzmetterdı abyroimen atqaryp, aldynǧy buyn – ardagerlerdıŋ tälımdı täjıribesın laiyqty jalǧastyryp kelesızder. Otbasylyq qūndylyqtardy nasihattau , saqtau baǧytynda sıŋırıp jatqan eŋbekterıŋız ūşan-teŋız. Sızderdı qazaqstandyq otbasylardyŋ üzdık dästürın jalǧastyruşylar dep bılemız. Merekelerıŋız qūtty bolsyn! – dedı qala äkımınıŋ orynbasary qūttyqtau sözınde.
AHAJ qyzmetkerlerınıŋ kielı mındetınıŋ kuäsındei bolyp, būl şaraǧa şirek ǧasyrdan astam uaqyttan berı jūptaryn jazbai kele jatqan erlı-zaiyptylar da qatysty. Biyl Qairat Qarataev pen Qarlyǧaş Äbdırahmanovanyŋ şaŋyraq kötergenderıne 50 jyl tolypty. Altyn toi ielerıne sol künı qūttyqtaular men alǧystar köp aityldy. Al Mihail Sergeev pen Lidiia Sergeevanyŋ otbasyn qūrǧandaryna 60 jyl! Gauhar toi ielerı de qūrmet pen alǧysqa bölendı. Qala äkımınıŋ orynbasary olarǧa estelık syilyqtar tabys ettı.
Otbasylyq qūndylyqtyŋ kuäsı – sızderge bızdıŋ qūrmetımız şeksız. Sızder ırgesı berık şaŋyraq köterıp, barşamyzǧa ülgı bolyp kelesızder. Adaldyq, dostyq, mahabbat siiaqty ömırlık qūndylyqtardyŋ bar ekenın de ıspen däleldedıŋızder. Sızderge zor densaulyq tıleimın, baqytty otbasylyq ǧūmyrlaryŋyz ūzaqqa jalǧasa bersın! – dep Andrei Lukin mereitoi ielerıne jyly lebızın bıldırdı.
Būdan soŋ altyn toi jäne gauhar toi ielerı Astana qalasynyŋ mereitoi ielerınıŋ jylnamasy – Qūrmet kıtabyna estelık qoltaŋbalaryn qaldyrdy.
Aituly dataǧa orai, AHAJ qyzmetkerlerın elordanyŋ audandyq äkımdıkterı, qalalyq Ädılet departamentı, bılım basqarmasy, köşı-qon polisiiasy jäne basqa ūiymdar qūttyqtap, alǧys hattarmen marapattady.
M. NŪRYMŪLY, astana-akshamy.kz
